كەلەستىك پوليتسەيلەر 70 جاستاعى اقساقالدى توناعان كۇدىكتىنى ۇستادى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
كەلەس اپب-نە جەرگىلىكتى تۇرعىن ەگدە جاستاعى ازامات ارىزدانىپ كەلەدى. ونىڭ ايتۋىنشا، تۇنگى ساعات 9 شاماسىندا 45-50 جاس شاماسىنداعى بەلگىسىز ادام “ۇدەرباي” اتتى ءدامحانانىڭ الدىندا دەنساۋلىعىنا قاۋىپتى ەمەس كۇش قولدانعان. سودان قالتاسىنداعى “سامسۋنگ ا50” ۇيالى تەلەفونى مەن 80 مىڭ تەڭگە اقشاسىن اشىق تۇردە تارتىپ الىپ، ارىزدانۋشىعا جالپى 200 مىڭ تەڭگە شىعىن كەلتىرگەن.
تەرگەۋ بارىسىندا انىقتالعانداي، 49 جاستاعى كۇدىكتى ازامات قازىعۇرت اۋدانىنىڭ تۇرعىنى ەكەندىگى بەلگىلى بولدى. سونداي-اق، ونىڭ بۇرىن قر قك-ءنىڭ 188-بابى (ۇرلىق) بويىنشا جانە قر قك-ءنىڭ 191-بابى (توناۋ) مەن سوتتى بولعانى انىقتالدى.
قولدى بولعان ۇيالى تەلەفوندى كۇدىكتى ءوز قاجەتتىگى ءۇشىن بازارلاردىڭ بىرىنە 35 مىڭ تەڭگەگە ساتىپ جىبەرگەن. بۇگىنگى تاڭدا ۇيالى تەلەفون مەن اقشا جابىرلەنۋشىگە قايتارىلدى. كۇدىكتى ەشقايدا كەتپەۋ تۋرالى قولحاتتا.
ءوز كەزەگىندە جابىرلەنۋشى كۇدىكتىنى ۇستاعان پوليتسەيلەرگە العىسىن ءبىلدىردى.
– مەنى ۇرىپ-سوعىپ، باعالى زاتتارىمدى توناپ كەتكەن كۇدىكتىنى ۇستاعان پوليتسيا قىزمەتكەرلەرىنە ۇلكەن العىسىمدى ايتامىن! جۇمىستارىڭىزعا ارقاشاندا ساتتىلىك تىلەيمىن! قىزمەتتەرىڭ ابىرويمەنەن اسا بەرسىن. راحمەت سىزدەرگە!– دەدى 70-تەگى اقساقال.
«ادىرنا» ۇلتتىق پورتالى
