اتىراۋلىق پوليتسەيلەر اۋدان تۇرعىننىڭ ۇيىنەن زاڭسىز ساقتالعان 106 دانا كيىك ءمۇيىزىن تاركىلەدى، – دەپ حابارلايدى «ادىرنا» ۇلتتىق پورتالى Polisia.kz-كە سىلتەمە جاساپ.
قۇرمانعازى اۋدانى بالقۇدىق اۋىلىنىڭ 34 جاستاعى تۇرعىنى ءوز ۇيىندە 106 كيىك ءمۇيىزى مەن ەكى دانا تىركەلمەگەن تەگىس ۇڭعىلى اڭشى مىلتىعىن زاڭسىز ساقتاعان. تەكسەرۋ بارىسىندا پوليتسەيلەر اتالعان ازاماتتىڭ تۇنگى ۋاقىتتا “Yaqi” موتوكولىگىمەن زاڭسىز اڭشىلىقپەن اينالىسىپ جۇرگەنىن انىقتادى. سونداي-اق، بالقۇدىق اۋىلىنىڭ ماڭىنان مۇيىزدەرى كەسىلگەن ءتورت كيىكتىڭ دەنەسى تابىلدى.
اتالعان فاكت بويىنشا قر قك-ءنىڭ 339-بابىنىڭ 3-بولىگى (وسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن، سونداي-اق پايدالانۋعا تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) سوتقا دەيىنگى تەرگەۋ امالدارى جۇرگىزىلۋدە.
«ادىرنا» ۇلتتىق پورتالى
