قر تۇڭعىش پرەزيدەنتى – ەلباسىنىڭ قورى «التىن توبىلعى» جۇلدەسىنىڭ لاۋرەاتتارىن ماراپاتتادى.
«التىن توبىلعى كونكۋرسىمىز وسىمەن ەكىنشى رەت ءوتىپ جاتىر. بۇل ماعىنالى، مازمۇنى تەرەڭ شارا. جاستارعا قامقورلىق جاساپ، جاس ادەبيەتكە جول اشۋدىڭ جارتىلاي مەملەكەتتىك، جارتىلاي قوعامدىق سيپاتى بار كونكۋرسقا اينالىپ جاتىر. التىن توبىلعى دەگەن اتتىڭ ءوزى قازاقى سيپات، ۇلتتىق سيپاتتى بەرىپ جاتىر. ونىڭ نەگىزگى قۇرىلتايشىسى — العاشقى پرەزيدەنت قورى. ال يدەيانىڭ اۆتورى — جازۋشىلار وداعى»، — دەپ اتاپ ءوتتى ءوز سوزىندە قازاقستان جازۋشىلار وداعىنىڭ توراعاسى نۇرلان ورازالين.
ادەبيەتتىڭ جاس وكىلدەرىن ىنتالاندىرۋدى ماقسات سانايتىن جوباعا ون سەگىزدەن وتىز بەسكە دەيىنگى دارىندى قىز-جىگىتتەر قاتىسا الادى. قازىلار القاسىنىڭ ايتۋىنا قاراعاندا، بيىل ۇسىنىلعان شىعارمالار قاتارى ارتقان. 110 ۇمىتكەردەن التاۋى ۇزدىك شىققان. قانات تىلەۋحان مەن وكسانا المازوۆاعا ىنتالاندىرۋ سىيلىعى تابىس ەتىلدى. بىلتىر پوەزيادا جۇيرىك تابىلماعان، ەسەسىنە بيىل ەكى بىردەي اقىن ۇزدىك شىقتى. ولار ەركەعالي بەيسەنوۆ پەن ولجاس قاسىم. «ۇزدىك پروزا» نوميناتسياسى بويىنشا الماس ءنۇسىپ «التىن توبىلعى» يەگەرى اتاندى. درامماتۋرگيادا الىبەك بايبول جۇلدە الدى. «ۇزدىك بالالار شىعارماسى» بويىنشا سەرىكبول حاساننىڭ تۋىندىسى اتالدى. ەل تاۋەلسىزدىگىنىڭ 25 جىلدىعىنا ارنالعان «تاۋەلسىزدىك تۇعىرى» تاقىرىبىنا ارنالعان دۇنيەلەر اراسىندا تاتيانا كرەتوۆانىڭ «قازتابان» تۋىندىسىنىڭ شوقتىعى بيىك شىقتى. كرەتوۆاعا ءبىر جارىم ميلليون، وزگەلەرىنە ءبىر ميلليون تەڭگە كولەمىندە سەرتيفيكاتتار تاپسىرىلدى.
ەركەعالي بەيسەنوۆ، «التىن توبىلعى» جۇلدەسىنىڭ لاۋرەاتى:
- بۇل مەنىڭ اراعا تۋرا ون جىل سالىپ ماراپاتتالۋىم. العاش رەت 2006 جىلى وتكەن حالىقارالىق «شابىت» فەستيۆالىندە جۋرناليستيكادا جۇلدە العام. جالپى «التىن توبىلعىنى» جۇزدەن جۇيرىك مىڭنان تۇلپار شىققانداردى ءوزىنىڭ ءادىل باعاسىن بەرىپ ماراپاتتايتىن بىرەگەي بايقاۋ دەپ بىلەم. سەبەبى مۇندا تۇسكەن شىعارمالار قازىلار القاسىنىڭ الدىندا اتى-جوندەرى كورسەتىلمەي تۇسەدى.
24.kz
