الماتىدا «قازاق ەلى» سەريالىنىڭ كينونۇسقاسى – «الماس قىلىش» ءفيلمىنىڭ تۇساۋكەسەر كورسەتىلىمى ءوتتى.
ءىلياس ەسەنبەرلين جازعان «كوشپەندىلەر» تريلوگياسىنىڭ العاشقى كىتابىنىڭ جەلىسى بويىنشا تۇسىرىلگەن فيلم، قازاق حاندىعىنىڭ قۇرىلۋ وقيعاسىن باياندايدى. وردا ەجەننىڭ ۇرپاقتارى – كەرەي مەن جانىبەك كوشپەندى حالىقتى اياۋسىز قيناعان ابىلقايىر حاندىعىنان ءبولىنىپ شىعىپ، جەتىسۋ جەرىنە قونىستانادى. قازاقتىڭ يگى جاقسىلارى قۇرىلتاي وتكىزىپ، كەرەيدى حان سايلايدى.
فيلم كورسەتىلمەستەن بۇرىن تۇسىرۋشىلەر مەن اكتەرلەر قۇرامى جۋرناليستەرمەن كوپشىلىك قاۋىمعا ارناپ ءباسپاسوز ماسەليحاتىن وتكىزدى. وندا ءسوز العاندار بارشا وتانداستارىمىزدى كينونىڭ جارىققا شىعۋىمەن قۇتتىقتاپ، ەلگە بەرەتىن ونەگەسىن ايتىپ جاتتى. مىسالى، بەلگىلى ءانشى بەكبولات تىلەۋحانوۆ: «قازىرگى زاماندا كوپشىلىك قاۋىمنىڭ تانىمى كىتاپ وقىعاننان گورى كوزبەن كورىپ قابىلدايتىن دارەجەدە بولعاننان كەيىن، وسى كينونىڭ ماڭىزى جوعارى دەپ ويلايمىن، ونىڭ ۇستىنە وسى شارۋاعا كاسىبي شىڭدالعان رۇستەمنىڭ كىرىسۋى وتە ءبىر قولايىنا كەلگەن شارۋا بولدى. وسى ءفيلمدى تۇسىرۋگە قالىپتاسىپ بارىپ كەلدى. سوندىقتاندا كوپ نارسەنى تۇسىندىرگەننەن گورى كوزبەن كورگەن ءسىڭىمدى بولادى. شالكيىز ايتپاقشى:
«الا بالتا سۋىرىسىپ،
تەپسىنىسىپ كەلگەندە
تەڭ اتانىڭ ۇلى ەدىڭ،
دارەجەڭدى ارتىق ەتسە، ءتاڭىرى ەتتى!» دەپ اۋقىمدى ءسوز ايتىپ ءسوزىمىزدى قۇرتقانمەنەن ادامنىڭ سەزىنۋى مۇلدە بولەك. وسىنداي كينو 25 جىلدىققا تارتۋ بولىپ وتىر. رۇستەمگە، وسىنى ۇيىمداستىرعان بارشا ازاماتتارعا شىنايى العىسىمىزدى بىلدىرەمىز. ەلدىگىمىز جاساي بەرسىن!» - دەپ ءسوزىن تۇيىندەدى.
فيلمگە 500-دەن استام ادام جۇمىلدىرىلعان، ولاردىڭ 200-گە جۋىعى ءتۇسىرىلىم توبىنىڭ مۇشەلەرى.
فيلمنەن اكتەرلەردىڭ كەيىپكەرلەرىنىڭ ءتۇر-تۇلعاسىمەن دەنە بىتىمىنە ساي ىرىكتەلگەندىگىن انىق بايقاۋعا. كەرەي، جانىبەك، قوبىلاندىلاردىڭ قاي-قايسىسىن الىپ قاراساڭ دا كوزىڭ توياتتايدى.
تاعى ءبىر ايتا كەتەرلىك جايت، كەرەي مەن جانىبەكتى قولداپ، ارتىنا ەرگەن قازاق رۋلارىنىڭ جەتىسۋعا بەت العان كوشىنىڭ كورىنىسى، وسىعان دەيىنگى تاريحي كينولارىمىزدا كەزدەسكەن ەمەس.
«الماس قىلىش» ءفيلمى 2017 جىلدىڭ قاڭتارىنان باستاپ جالپىۇلتتىق پروكاتقا شىعارىلادى.
قويۋشى-رەجيسسەرى: رۇستەم ابدىراشەۆ
ستسەناري اۆتورلارى: سماعۇل ەلۋباي، تيمۋر جاقسىلىقوۆ، رۇستەم ءابدىراشوۆ
باستى رولدەردە: قايرات كەمالوۆ، ەركەبۇلان دايىروۆ، دوسحان جولجاقسىنوۆ، يىسبەك ءابىلماجين، ايان وتەپبەرگەن، مەيىرعات امانگەلدين، نيازبەك شايسۇلتانوۆ، بەكبولات تىلەۋحان، ارمان قوجا، شۇعىلا ساپارعالي، مادينا ەسمانوۆا، قارلىعاش مۇحامەدجانوۆا، ىڭكار ءابدىراش، دىنمۇحاممەت اقىموۆ جانە باسقالار.
بىلتىرعى جىلى م.اۋەزوۆ اتىنداعى اكادەميالىق دراما تەاترى ءدال وسى «الماس قىلىش» رومانىنىڭ جەلىسىمەن ساحنالانعان قويىلىمىن ەل نازارىنا ۇسىنعانى بەلگىلى. ەندى مىنە، سول «الماس قىلىش» كينو الەمىنە دە جول تارتتى. ونەر الەمىندەگى قازىنامىز كوبەيە بەرگەي.





جاسۇلان ءناۋرىزالى