الماتى وبلىسىندا ويناپ ءجۇرىپ، اداسىپ كەتكەن بالالار تاۋ شاتقالىنان تابىلدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
18 اقپاندا ساعات 14:35 شاماسىندا كەگەن اۋداندىق پوليتسيا بولىمىنە 1976 جىلى تۋعان ازاماتشا جەتى جاستاعى ەكى بالانىڭ جانە توعىز جاستاعى ءبىر بالانىڭ ويناۋعا كەتىپ، ورالماعانىن ايتىپ جۇگىنگەن.
– بالالاردىڭ جوعالعانى تۋرالى حابار تۇسە سالىسىمەن بىردەن ىزدەستىرۋ شارالارى ۇيىمداستىرىلدى. ناتيجەسىندە سول اۋىلدىق وكرۋگكە جاۋاپتى ۋچاسكەلىك پوليتسيا ينسپەكتورى س.بايانبەكۇلى مەن جپقب يۋۆەنالدى پوليتسيا توبىنىڭ ينسپەكتورى ج.ماليبەكوۆ ساعات 15:30 شاماسىندا بالالاردى تاۋ شاتقالىندا ويناپ جۇرگەن جەرلەرىنەن تاۋىپ، اناسىنا تابىستادى. بالالاردىڭ ويناپ ءجۇرىپ، تاۋ ىشىنە كىرىپ، اداسىپ كەتكەندىگى بەلگىلى بولدى. يۋۆەنالدى پوليتسيا توبىنىڭ قىزمەتكەرلەرى بالالاردىڭ اناسىمەن پروفيلاكتيكالىق باعىتتاعى ءتۇسىندىرۋ جۇمىستارىن جۇرگىزدى، – دەدى كەگەن اۋداندىق پوليتسيا ءبولىمىنىڭ باستىعى ەرلىك ۇركىمباەۆ.
«ادىرنا» ۇلتتىق پورتالى
