"ۇلىتاۋ" توبى لوس-اندجەلەستە ۇيىمداستىرىلعان The Djooky Music Awards بايقاۋىندا ءبىرىنشى ورىن الدى. قۋانىشتى حاباردى توپتىڭ پروديۋسەرى قىدىرالى بولمان مالىمدەدى، دەپ حابارلايدى "ادىرنا" ۇلتتىق پورتالى ءانشىنىڭ ينستاگرامىنا سىلتەمە جاساپ.
قىدىرالى بولماننىڭ جەتەكشىلىگىمەن توپ اقش-تىڭ لوس-اندجەلەس قالاسىندا وتكەن Djooky Music Awards حالىقارالىق مۋزىكالىق بايقاۋىندا روك-مەتالل ساناتى بويىنشا جەڭىسكە جەتتى. توپ ماحامبەت وتەمىسۇلىنىڭ "جۇمىر قىلىش" كۇيىن ورىنداعان.
بايقاۋ ونلاين داۋىس بەرۋ ارقىلى ءوتتى. داۋىس بەرۋ 27 اقپان تاڭعى 06.00-دە باستالىپ، 1 ناۋرىز كۇنى توقتاتىلدى.
"بۇكىلالەمدىك جەڭىس قۇتتى بولسىن، قازاق ەلى! مىڭ العىس، مىڭ تاعزىم! كۇمبىرلەگەن، تاسىپ-توگىلگەن كۇيلەرىمىزدى الەمنىڭ ساحناسىنا شىعارىپ، دومبىرامىزدى الامان بايگەلەرگە قوسىپ، باس جۇلدەلەر بۇيىرتقان اللاعا سانسىز ماداقتار بولسىن! ۇلكەن قولداۋ قورسەتىپ، تاڭعى 6:00-گە دەيىن "ۇلىتاۋ" توبىمەن بىرگە بولعان سىزدەرگە، قازاقستان ونەر جۇلدىزدارىنا، ءبىرتۇتاس قازاق ەلىنە، مىڭ العىس، مىڭ تاعزىم!", - دەپ جازدى بولمان.
بايقاۋدىڭ قورىتىندىسى ارالاس فورماتتا شىعارىلدى: 50% – كورەرمەندەردىڭ داۋىس بەرۋى، 50% – امەريكالىق پروديۋسەر برايان مالۋفتىڭ شەشىمى.
"ۇلىتاۋ" توبى – 2001 جىلى قۇرىلعان ەتنو-روك ستيلىندەگى مۋزىكالىق ۇجىم. سول جىلى توپ گولليۆۋدتا وتكەن بۇكىلالەمدىك مۋزىكا ورىنداۋشىلارىنىڭ چەمپيوناتىندا باس جۇلدە الدى.
