وسكەمەنگە ەر اداممەن كەزدەسۋگە كەتكەن پاۆلودارلىق كەلىنشەك 12 جاستاعى قىزىن 2 كۇن بويى پاتەردە جالعىز قالدىرعان، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«پوليتسەيلەرگە كوپقاباتتى ۇيلەردىڭ ءبىرىنىڭ تۇرعىندارىنان شاقىرتۋ كەلىپ ءتۇستى. كورشىسى پاتەرلەردىڭ بىرىندە 12 جاستاعى قىزدىڭ قامالىپ قالعانىن ايتتى. ەكى كۇن بويى قىز بالا ۇيدە جالعىز ءوزى بولعان. پوليتسەيلەر قىزدىڭ اناسىنىڭ وسكەمەن قالاسىنا ەر اداممەن كەزدەسۋگە كەتكەنىن انىقتادى. اناسى ۇيىنە بىرنەشە كۇننەن كەيىن عانا ورالدى. ۇيىندە بالاسىنىڭ جالعىز، ازىق-تۇلىكسىز قالعاندىعى ونى ويلاندىرعان جوق»،– دەدى پاۆلودار وبلىسى ەكىباستۇز قالاسى پوليتسيا باسقارماسىنىڭ اعا ينسپەكتورى فاتيما احمەتچانوۆا.
پاتەردىڭ ەسىگىن اشۋ ءۇشىن توتەنشە جاعدايلار، ءبىلىم بولىمدەرىنىڭ وكىلدەرى شاقىرىلدى. قىزبەن سويلەسكەن كەزدە ونىڭ اجەسىنىڭ قالادا تۇراتىنى بەلگىلى بولدى. كامەلەتكە تولماعان قىز بالا اجەسىنە تاپسىرىلدى.
– قىزدىڭ اناسى بۇعان دەيىن دە قر اقبتك-ءنىڭ 127-بابى بويىنشا كامەلەتكە تولماعان بالانى تاربيەلەۋ مەن ءبىلىم بەرۋ، ونىڭ قۇقىقتارى مەن مۇددەلەرىن قورعاۋ جونىندەگى مىندەتتەرىن ورىنداماعانى ءۇشىن اكىمشىلىك جاۋاپكەرشىلىككە تارتىلعان. اتالعان فاكت بويىنشا قىزدىڭ اناسىنا قاتىستى قر اقبتك-ءنىڭ 127-بابى بويىنشا اكىمشىلىك ءىس قوزعالدى. بۇدان باسقا، قىزدىڭ اناسىنىڭ بۇل ءىسى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ وتىرىسىندا قارالادى، وندا قىزىن اناسىمەن ودان ءارى قالدىرۋ تۋرالى ماسەلە شەشىلەتىن بولادى، – دەپ اتاپ ءوتتى فاتيما احمەتچانوۆا.
«ادىرنا» ۇلتتىق پورتالى
