"الاتاۋ" ءداستۇرلى ونەر تەاترىندا قازاقتىڭ ۇلتتىق جىر-جاۋھارلارىنىڭ كەرۋەنى جالعاسۋدا. ارقا ولكەسىنىڭ «ءىنجۋ مارجان»، التاي-تارباعاتاي جەرىنىڭ «اعاجاي، التايداي جەر قايدا...» اتتى كونتسەرتتىك شارالارىنان كەيىن، «قانەكەي ءتىلىم سويلەشى» دەپ اتالعان سىر بويىنىڭ كۇيشى، جىرشى-جىراۋلارلىرىنىڭ كەشى ءوتتى.
سىر ەلىن «سۇلەيلەر ەلى» دەپ تەگىن اتاماسا كەرەك. سىر ەلىنەن شىققان ەشنياز سال، بالقى بازار، جيەنباي جىراۋ، شوراياقتىڭ ومارى، سارسەنباي، نۇرتۋعان، تۇرماعانبەت، كەتە ءجۇسىپ، ءدۇر وڭعار، جاڭابەرگەن، بۇداباي، نارتاي سياقتى اقىن-جىراۋلاردان باستاۋ الاتىن سۇلەيلەر شوعىرىن ولاردىڭ كەيىنگى بۋىن ۇرپاقتارى – مۇزاراپ، رۇستەمبەك، كوشەنەي، ءشامشات، ارزۋللا، سۇراعان، رىسبەك، بەكۇزاقتار بولسا، وسى ءداستۇردى بۇگىنگى بۋىن جىرشى-جىراۋلارى لايىقتى جالعاستىرىپ كەلەدى.
«كىمنىڭ باتىر، كىمنىڭ باقىر ەكەنىن جىراۋ بىلەر» دەگەن ەكەن قورقىت بابامىز. جىراۋلىق ءداستۇر تاريحىنىڭ باستاۋ بۇلاعى، سوناۋ تۇركى ءداۋىرىنىڭ «ورحون ەنيسەي» جازۋىنداعى ماداق جىرلارىنان، «وعىزناما»، «قيسساس ءۇل ءانبيا» جازبا ادەبيەت مۇرالارىنان تامىر تارتادى.
سىر بويى عاجاپ ولكەسىڭ
تولقيسىڭ تىڭداپ تەرمەسىن
سياقتى سىردا اقىندار
جاساعان جىردىڭ كورمەسىن
كەرەمەت عاجاپ ويلانام
جىرمەن تۇر تۇنىپ اينالام
وزگەشە سىردىڭ ماقامى
جانىڭدى ءجىپسىز بايلاعان
بەسىكتە بالاڭ بۇلقىنعان
جەلىدە تايىڭ جۇلقىنعان
جىر جيناپ الىپ ءجۇرمىن مەن
كوشكەندە قالعان جۇرتىڭنان – دەپ ءسوز باستاعان كوشەنەي جىراۋدىڭ ۇلى ارنۇر كوشەنەي ايتاشى (جۇرگىزۋشى) بولعان جىر مەن كۇي كەشىندە بيداس رۇستەمبەكوۆ، قۇرماش جۇگىنىسوۆ، ۇلجان بايبوسىنوۆا، عانيبەك ومىرزاقوۆ، اقمارال نوعايباەۆا، ەربولات مۇستافاەۆ، بولات بايمۇراتوۆ، اقمارال قالدانوۆا، سەرىكقالي جۇبانيازوۆ، عيبرات جۇماعۇلوۆ، ءازىلحان ماقساتباەۆ، ءالىمجان ابسادىقوۆ، بەيسەنبەك تولەۋباەۆ، نۇرشات اقباەۆا، ايبەك تاڭىربەرگەنوۆ، ءزۇلفيا بايمۇرزاەۆا، قۇرمانبەك بەكپەيىسوۆ، مۇحامەدالى بەكپەيىسوۆ، الديار شاعداتوۆ، نۇرتىلەك اقتاەۆ، ابىلايحان ىسقاقوۆ، ەلمۇرا (ەلميرا) جاڭابەرگەنوۆالار (جىرشى-جىراۋلىق ءۇش مەكتەپتىڭ دە وكىلدەرى) ونەر كورسەتتى.
قىسقى ۋنيۆەرسيادا باستالعالى بەرى كونتسەرت تاماشالاۋعا كەلگەن حالىقتىڭ "الاتاۋ" داستۇرلى ونەر تەاترىنا دەگەن ىقىلاسى ەرەكشە. كۇن سايىن ءار ءوڭىردىڭ ءانىن تىڭداپ، شىن ونەرپازدى تانىپ جاتىر.
