33 جاستاعى ايەلدى زورلاعان ەكى ەر ادام قانداي جازا الماق؟

2678
Adyrna.kz Telegram

الماتى وبلىسىنداعى ۇشتوبە قالاسىندا 33 جاستاعى ايەلدى ۇرىپ-سوعىپ، زورلادى دەپ ايىپتالعان ەكى ادامعا قاتىستى سوت پروتسەسى اياقتالدى، دەپ حابارلايدى Sputnik قازاقستان سايتى.

"نەمولچيKz"قورىنىڭ جەتەكشىسى دينا ءتاڭسارى ءوزىنىڭ Facebook پاراقشاسىندا سوت ۇكىمى شىققانىن حابارلادى. قور وكىلدەرى بارلىق سوت وتىرىسىنا قاتىسقان.

قىلمىس 2020 جىلدىڭ قازان ايىندا جاسالعان. ىشىمدىككە سىلقيا تويىپ العان ەكى ەر ادام تۇندە ۇيىقتاپ جاتقان جاس كەلىنشەكتىڭ ۇيىنە باسا-كوكتەپ كىرىپ، زورلاعان. ايەل ءوزىن قورعاۋعا تىرىسىپ، زورلاۋشىلاردىڭ ەكەۋىنە دە پىشاقپەن جەڭىل جاراقات سالعان، دەپ اتاپ ءوتتى دينا ءتاڭسارى. ناتيجەسىندە جالاڭاش ۇيدەن قاشىپ شىعىپ، تۋىستارىنان كومەك سۇراعان.

پوليتسيا كۇدىكتىلەردى ۇستاپ، قىلمىستىق كودەكستىڭ 120-بابى ەكىنشى بولىگى (زورلاۋ) جانە 121-بابى ءبىرىنشى بولىگى (سەكسۋالدىق سيپاتتا كۇش قولدانۋ) بويىنشا تەرگەۋ جۇرگىزدى.

"ەكەۋى دە كىناسىن مويىنداماي، اقتاۋدى سۇرادى. بىراق ءىس بويىنشا جينالعان دالەلدەردى ەسكەرە وتىرىپ، سوت ايىپتالۋشىلاردىڭ ءبىرىن 9 جىل 6 ايعا، ەكىنشىسىن 10 جىلعا باس بوستاندىعىنان ايىردى", - دەپ حابارلادى قاراتال اۋداندىق سوتىنىڭ ءباسپاسوز قىزمەتى.

پروكۋرور سوتتالۋشىلاردى 10 جانە 11 جىلعا باس بوستاندىعىنان ايىرۋدى سۇراعان. الايدا سوت جازانى جەڭىلدەتەتىن كەيبىر جاعدايلاردى ەسكەردى ء(بىرىنىڭ قاراۋىندا جاس بالالارى بار بولىپ شىقتى).

سوت ۇكىمى ءالى زاڭدى كۇشىنە ەنگەن جوق.

پىكىرلەر