رەسەي قورعانىس مينيسترلىگى ورتالىق اسكەري وكۋرگىنىڭ ءباسپاسوز قىزمەتى ءساۋىردىڭ ەكىنشى كۇنى ءىرى كولەمدى اسكەري جاتتىعۋلاردىڭ الداعى ۋاقىتتا ودان ارى جالعاسا بەرەتىنىن ايتقانىن بىلەسىزدەر.
ورتالىق اسكەري وكۋرگ قولباسشىسى گەنەرال-پولكوۆنيك الەكساندار لاپين، ورتالىق ازيا ايماعىنداعى 2-ءشى جانە 41-ءشى بىرىككەن جويقىن قارۋلى كۇشتەردىڭ قاتىسۋىمەن دە ءىرى كولەمدى اسكەري جاتتىعۋلار وتكىزەتىنىن حابارلاعان ەدى.
قازاق، قىرعىز جانە تاجىك تەرريتورياسىنداعى اسكەري نىسانداردى دا قامتيتىن ورتالىق اسكەري وكۋرگتىڭ الداعى ءىرى كولەمدى اسكەري جاتتىعۋى ورتالىق ازياعا كوزالارتىپ وتىرعان توڭىرەكتەگى ايماقتىق كۇشتەر مەن دەرجاۆالاردىڭ نازارىن اۋداراتىنى انىق.
وسىنداي تۇستا بىزگە سۇيەگى الدە-قاشان ءشىرىپ كەتكەن كەنەسارى حان ءۇشىن قۋانىپ وتىرا بەرۋدىڭ پايداسى قانشا؟ ءساۋىر بويى وسى "قۋانىشتىڭ" بۋىمەن ءماز-مايرام بەيعام وتىرعاندا رەسەيدىڭ بىزدەگى اسكەري نىساندارى كەلەلى ستراتەگيالىق ءىس-قيمىلىن جۇزەگە اسىرىپ جىبەرمەۋىنە كىم كەپىل؟ ستراتەگيالىق نىساندار ىسكە اسقان سوڭ مىڭ كەنەسارى كەلسە دە پايداسى جوق. بىزگە كەنەسارى حاننىڭ باس سۇيەگىنە قۇردان-قۇر قۋانىپ وتىرا بەرۋدىڭ كەرەگى جوق، بىزگە كەنەسارىلىق سوعىس تاكتيكاسىن جاڭعىرتۋ كوبىرەك ماڭىزدى.
بىلايشا ايتقاندا ءبىزدىڭ ۇلتقا ءتان شەكتەن تىس بەيعامدىق پەن ماسايراۋ وزگە جۇرتتىڭ پايداسىنا شەشىلىپ جۇرمەسە يگى ەدى. حان كەنەنىڭ ورالۋىنا دا قۋانا وتىرايىق بىراق بەيعام بولمايىق! اسكەري تاكتيكامىز بەن قورعانىس ساقتىعىمىزدى دا ەسكەرە وتىرايىق.
ەلدەس وردا
