رەسپۋبليكالىق ساياسي قۋعىن-سۇرگىن قۇرباندارىنا ۇشىراعاندار قاۋىمداستىعىنىڭ توراعاسى جۇمابەك اشۋۇلى “ادىرنا” ۇلتتىق پورتالى YouTube ارناسىنا سۇحبات بەردى.
سۇحباتتا حح عاسىرداعى قازاق قوعامىنىڭ ەڭ اۋىر كەزەڭدەرى، اشارشىلىق، ساياسي رەپرەسسيا جانە تاريحي جادىنى ساقتاۋ ماسەلەلەرى كەڭىنەن قوزعالدى. ول ۇلت تاريحىنداعى قايعىلى بەتتەردى ۇمىتپاۋ، قۇربانداردى قادىرلەۋ جانە بۇگىنگى ۇرپاقتىڭ جاۋاپكەرشىلىگى تۋرالى ويلارىن ورتاعا سالدى.
سۇحبات بارىسىندا جۇمابەك اشۋۇلى كەڭەس بيلىگى كەزەڭىندە قازاق جەرىندە شامامەن 500-گە جۋىق كوتەرىلىس بولعانىن اتاپ ءوتتى. ونىڭ ايتۋىنشا، بۇل دەرەكتەر ۇلتتىڭ وتارلىق ساياساتقا قارسى كۇرەسىنىڭ اۋقىمىن كورسەتەدى.
سونىمەن قاتار ول اشارشىلىق جىلدارىنداعى دەموگرافيالىق اپات تۋرالى ايتىپ، «10 ميلليون قازاقتان نەبارى 2,4 ميلليونى عانا امان قالدى» دەگەن دەرەكتى كەلتىردى. بۇل كەزەڭدى ول قازاق حالقىنىڭ تاريحىنداعى ەڭ اۋىر تراگەديالاردىڭ ءبىرى رەتىندە سيپاتتادى.
سۇحباتتا بەكبولات جانپەيىسۇلىنىڭ تاعدىرى دا ەرەكشە اتالدى. ونىڭ ايتۋىنشا، بۇل تۇلعا ۇزاق جىلدار بويى ەسىمسىز، نومىرمەن ءومىر سۇرگەن كەزەڭدەردى باستان وتكەرگەن. جۇمابەك اشۋۇلى بەكبولات اتامەن تانىسۋى مەن ونىڭ ءومىر جولىنا قاتىستى دەرەكتەردى ءبولىستى.
سۇحباتتا اشارشىلىقتىڭ ادام ورگانيزمى مەن پسيحولوگياسىنا ۇزاق مەرزىمدى اسەرى تۋرالى دا ءسوز بولدى. ول قيىنشىلىقتان وتكەن ادامداردىڭ ءومىر ءسۇرۋ ۇزاقتىعى مەن توزىمدىلىگى تۋرالى پىكىر ءبىلدىرىپ، تاريحي تراۆمانىڭ ۇرپاق ساناسىنا اسەرى جايلى وي قوزعادى.
