بۇگىندە حالىقارالىق تۇركى اكادەمياسى جۇزەگە اسىرىپ جاتقان ەڭ ماڭىزدى جوبالاردىڭ ءبىرى – ورتاق تۇركى تاريحىن اكادەميالىق تۇرعىدا جازۋ جوباسى.
Report اگەنتتىگىنىڭ تۇركياداعى بيۋروسىنىڭ حابارلاۋىنشا، بۇل تۋرالى حالىقارالىق تۇركى اكادەمياسىنىڭ پرەزيدەنتى شاحين مۋستافاەۆ انتاليا ديپلوماتيالىق فورۋمىنىڭ V وتىرىسى اياسىندا وتكەن ء«تىل مەن بىرەگەيلىك عاسىرى: باكۋ تۇركىتانۋ سەزىنەن تۇركى ينتەگراتسياسىنا دەيىن» اتتى پانەلدىك سەسسيادا مالىمدەدى.
ونىڭ ايتۋىنشا، بۇل ماسەلە العاش رەت ءبىرىنشى تۇركىتانۋ سەزى اياسىندا كوتەرىلگەن.
«سول سەزدە ەڭ كوپ تالقىلانعان ماسەلەلەردىڭ ءبىرى – تۇركى تىلدەرىندەگى تەرمينولوگيانى قالىپتاستىرۋ بولدى. بۇل باعىتتا تۇركى اكادەمياسىنىڭ اۋقىمدى جوبالارى بار. ءارتۇرلى سالالار بويىنشا تەرمينولوگيالىق سوزدىكتەر ازىرلەنىپ، جارىق كورىپ جاتىر. بۇل سوزدىكتەر توعىز تۇركى ءتىلىن، سونداي-اق اعىلشىن جانە ورىس تىلدەرىندەگى تەرميندەردى قامتيدى. دايىندالعان تەرمينولوگيالىق سوزدىكتەر بولاشاقتا ورتاق تۇركى تەرمينولوگياسىن قالىپتاستىرۋ مەن دامىتۋعا ەلەۋلى ۇلەس قوساتىن ماڭىزدى عىلىمي بازا بولىپ تابىلادى»، – دەدى ش. مۋستافاەۆ.
سونداي-اق، ول اكادەميا تۇركى الەمىنىڭ ارحەولوگيالىق جانە ساۋلەت ەسكەرتكىشتەرىنىڭ كەڭ كولەمدى ءتىزىمىن جاساپ، ونى ءۇش تومدىق جيناق رەتىندە ۇسىنعانىن ايتتى.
«جالپى، بۇگىندە تۇركىتانۋ سالاسىندا جۇزەگە اسىرىلىپ جاتقان كوپتەگەن باستامالار ءدال وسى ءبىرىنشى تۇركىتانۋ سەزى بارىسىندا تالقىلانىپ، قالىپتاسقان يدەيالارعا نەگىزدەلگەن. وسى تۇرعىدان العاندا، ول سەزد تۇركى الەمىنىڭ زياتكەرلىك، مادەني جانە تاريحي دامۋىنا ايرىقشا ماڭىزدى ءرول اتقاردى»، – دەپ اتاپ ءوتتى شاحين مۋستافاەۆ.
