جامبىلدا 23 جاستاعى كەلىنشەك جوعالىپ كەتتى

2882
Adyrna.kz Telegram

جامبىل وبلىسىندا ەكى اي بۇرىن ۇيىنەن شىعىپ كەتكەن 23 جاستاعى كەلىنشەك ىزدەستىرىلىپ جاتىر. ءتارتىپ ساقشىلارى ونى جەر-كوكتەن ىزدەگەنىمەن، ازىرگە ەش ناتيجە جوق. شۋ اۋدانىنىڭ تۇرعىنى گۇلدانا ساناقبايدىڭ تۋىستارى ونى بۇرىنعى كۇيەۋى ۇرلاپ اكەتتى دەپ كۇدىكتەنەدى. ويتكەنى ءىز-ءتۇزسىز كەتكەن كەلىنشەك ەڭ سوڭعى رەت سونىمەن بىرگە كولىككە ءمىنىپ، سول كۇيى ورالماعان، دەپ حابارلادى كتك.

گۇلدانا ساناقباي 11 اقپان كۇنى الماتىعا جولعا شىعامىن دەپ جۇمىستان ۇيىنە ەرتە قايتادى. جولاي ونى-مۇنى الۋ ءۇشىن ساۋدا ورتالىعىنا سوعادى. بەينەباقىلاۋ كامەراسى تۇسىرگەن ۆيدەودان 23 جاستاعى كەلىنشەكتىڭ اق "اۋدي" كولىگىنە مىنگەنى انىق كورىنەدى.

"ورتالىقتان شىعىپ، بۇرىنعى جولداسى قالقان بەرىكپەن ءبىر كولىككە وتىرعانى بار. ودان كەيىن كورگەن-بىلگەن ادام جوق", - دەيدى گۇلدانانىڭ اناسى ينديرا تىلەۋباەۆا.

ينديرا تىلەۋباەۆا قىزىن بۇرىنعى كۇيەۋ بالاسى ۇرلاپ كەتتى مە دەپ كۇدىكتەنەدى. ونىڭ ايتۋىنشا، گۇلدانا التى جىل بۇرىن تۇرمىس قۇرعان. بىراق بەتاشاردان كەيىن كوپ ۇزاماي كۇيەۋ بالاسى ءىستى بولىپ، بەس جارىم جىل جازاسىن وتەپ شىققان. كەيىن ەرلى-زايىپتىنىڭ ءدىني كوزقاراسى سايكەس كەلمەي، اقىرى اجىراسىپ تىنعان. الايدا بۇرىنعى كۇيەۋى گۇلدانانى قورقىتىپ، سوڭىنان قالماي قويىپتى.

"بىرتوعا قىز، ونىڭ ىشىندە نە بولىپ جاتقانىن ەشكىم بىلمەيدى. ايتپايدى. كۇيەۋىنىڭ ۇرىپ-سوققانىن دا بىلگەن جوقپىز. جوعالعاننان كەيىن ەستىپ جاتىرمىز", - دەيدى گۇلدانانىڭ اجەسى تىلەۋكۇل تىلەۋباەۆا.

گۇلدانا مىنگەن كولىكتە كۇيەۋىمەن بىرگە تاعى ەكى جىگىت بولعان. ءبارى ءبىر اۋىزدان 23 جاستاعى كەلىنشەكتى تۋىسىنىڭ ۇيىنە جەتكىزىپ سالدىق دەپ تۇسىنىكتەمە بەرگەن. وسىعان يلانعان ءتارتىپ ساقشىلارى ولاردى كۇدىكتى دەپ قاراماسا كەرەك. ال پوليتسەيلەر تەك دەرەككە قاتىستى قىلمىستىق ءىستىڭ قوزعالعانىن ايتادى.

"دەرەككە قاتىستى قازاقستان قىلمىستىق كودەكسىنىڭ 99-بابىمەن قىلمىستىق ءىس قوزعالعان. پوليتسيا دەپارتامەنتىمەن ارنايى توپ قۇرىلىپ، قىلمىستى اشۋعا كەشەندى تەرگەۋ جۇرگىزىلىپ جاتىر. تەرگەۋ قۇپيالىعىنا بايلانىستى وزگە مالىمەت جاريا ەتىلمەيدى", - دەپ ءتۇسىندىردى جامبىل وبلىسى پد تەرگەۋ باسقارماسىنىڭ تەرگەۋشىسى ازامات قالمەن.

ءىز-ءتۇزسىز كەتكەن كەلىنشەكتىڭ بۇرىنعى جولداسىنان 6 جاستاعى بالاسى بار. ونى قازىر اجەسى باعىپ وتىر. مۇحامەدالى اناسىنىڭ جوعالعانىن جۋىردا عانا ەستىگەن. بۇعان دەيىن وعان شەشەسى ءىس-ساپاردا دەپ الداپ كەلىپتى. ەندى ول اناسىنىڭ تابىلىپ، ۇيگە ورالعانىن تاعاتسىزدانا كۇتىپ ءجۇر. ال گۇلدانانىڭ تۋىستارى كۇشتىك قۇرىلىمداردىڭ ىزدەۋ جۇمىسىنا كوڭىلى تولمايدى. سوندىقتان ولار نۇر-سۇلتاننان بىلىكتى مامانداردىڭ كەلۋىن قالايدى.

پىكىرلەر