«ول كەزدە قازي دا، مەن دە قىزىلوردا تۇرامىز. قازەكەڭ مىقتى جۋرناليست. ءسوزى وتكىر، ويى ۇشقىر. سىر ەلى سىيلايتىن ازامات. ار جىلداردا سەناتقا، ماجىلىسكە تۇسكەن توقتار اۋباكىروۆ پەن وڭالبەك ساپيەۆ شتابىن مەن، قوجاحمەت بايماحانوۆ پەن ءناجماددين مۇساباەۆتىڭ شتابىن قازەكەڭ باسقاردى.ءسويتىپ، تىرشىلىكتە سىيلاس، ارىپتەس، ءبىر-ءبىرىن قۇرمەت تۇتاتىن ەكەۋدىڭ اراسىنا سايلاۋ دەگەن سايقال ءوتىپ، ءبىر-بىرىمىزگە جاۋلاسپاساق تا تۇيلىگە قاراپ، قىرىن جۇردىك.ول دا وتكىنشى ەكەن عوي.
وتكەنگە سالاۋات. كەيىن قايتا ارقا-جارقا قۇشاقتاسا امانداسىپ، قاۋقىلداساتىن قالپىمىزعا تۇستىك. قىزىلوردانىڭ اپتاپ ىستىعىن بىلەسىڭ عوي، ەڭسەڭدى باسىپ ەسەڭگىرەتىپ جىبەرەتىن. ءسويتىپ ءبىر كۇنى جۇمىسقا قوعامدىق كولىككە ءمىنىپ، اۆتوبۋس ىشىندە تىرەگىنەن ۇستاپ، مازام قاشىپ ءوز قولىما باسىمدى سۇيەپ كەلە جاتقانمىن. تۋ سىرتىمنان بىرەۋدىڭ ارەكەتىمدى باقىلاپ قاراپ تۇرعانىن سەزدىم. جالت بۇرىلسام قازەكەڭ. جىميا كۇلىپ، جىلىشىراي قالپىمەن مەنەن كوز المايدى. امانداستىق. سالعان جەردەن قازەكەڭ:
-الماس،سەنىڭ ءبىر كىناڭ بار. نە ەكەنىن ايتايىن با؟،-دەدى.
-ايتىڭىز.... -ولمەي ءتىرى جۇرگەنىڭ عوي،-دەدى. ارينە ءوزى ەڭسەم باستىرىلىپ كەلە جاتقاندا ول ءسوزدى ەستۋدە وڭاي بولمادى. جاۋاپ ايتارداي تاباندا تياناقتى تىلىمە ەشتەڭە بايلانبادى. -سولاي شىعار،-دەپ كۇمىلجىڭكى جاۋاپ بەردىم. -جوق، الماس. مەن ساعان شىنىمدى ايتىپ تۇرمىن. وسى جەردەن اڭگىمەمىز كىلت ءۇزىلدى دە،قوشتاستى دا قازەكەڭ رەداكتسيا تۇسىنان ءتۇسىپ قالدى. مەن دە دىتتەگەن جەرىمە جەتتىم. سودان «نەگە ايتتى ەكەن؟»،-دەپ جاۋابىن تابا الماي ءجۇردىم.
اراعا ۋاقىت سالا بىردە تانىمال سۋرەتشى قايىرباي زاكىروۆتىڭ شەبەرحاناسىندا كەزدەستىك. امان-ساۋلىقتان كەيىن قازەكەڭ:
-الماس، انا جولى ايتقانىما ءالى ويلانىپ ءجۇرسىن عوي؟
-ءيا، ويلانىپ ءجۇرمىن. جىلى جىميىپ وتىراتىن قازەكەڭ ويلى جۇزبەن قايرەكەڭ جانە ماعان ءبىر قاراپ:
-الەكە، ادامداردىڭ تىرشىلىكتە ءۇش ءتۇرلى كاتەگورياسى بار. لەۆ گۋميلەۆتەن وقىدىم-اۋ دەيمىن. ءبىرىنشى توپ- كونبىس. ولارعا قاي باسشى، قاي قوعام اۋىسسا دا ەڭبەكپەن تاپقان ىرزىعىن جەپ، قارنىنىڭ تويعانىنا تاۋبەسىن ايتىپ جۇرەدى. ەكىنشى توپ- تۆورەنيا جاسايتىن توپ. ينتەللەكتۋال، ءوزىڭ سەكىلدى جىراۋ، مىنا وتىرعان قايرەكەڭ سەكىلدى سۋرەتشىلەر، اقىن-جازۋشىلار، عىلىمدا جاڭالىق اشقان عالىمدار توبى. ال ءۇشىنشى توپ –قوعامدى العا سۇيرەيتىن، قوعامدىق سانانى وزگەرتۋگە بەيىم توپتار. بيلىكتەگىلەر دە وسى توپقا كىرەدى. الايدا، ءۇشىنشى توپتاعىلار ءوز ورنىنا نىق وتىرعاندار ما جوق الدە كەزدەيسوق كەلبەتتەر مە؟ ول ساۋال. ءسىز بەن ءبىزدىڭ الاشاپقىن بولىپ، كانديداتۋراسىن ۇسىنىپ، شتابىن باسقارعان ازاماتتارىمىز قازاق قوعامىندا نە وزگەرتتى، نە ءبىتىردى؟ ءاليحان بوكەيحانوۆ، احمەت بايتۇرسىنوۆ سەكىلدى تاريحتا اتى قالاتىن قايراتكەرلىك بولمىسى قايدا؟ سول دۇرمەكتە سەنىڭ ەڭبەگىڭ ەش كەتىپ، ولمەي جۇرگەنىڭ دەگەنىم سول ەدى»،- دەپ قازەكەڭ اڭگىمەسىن ادەمى قايىردى.
جىراۋ الماس الماتوۆتىڭ سۇحباتى نەگىزىندە جازعان نۇرلان قازيۇلى
Kazakh-tv.kz
