ابايدىڭ «جيدەباي-ءبورىلى» مەملەكەتتىك قورىق-مۋزەيى تاعى دا ءبىر قۇندى جادىگەرمەن تولىقتى، دەپ حابارلايدى kazmuseum.kz سايتى مۋزەي اكىمشىلىگىنە سىلتەمە جاساپ.
اباي اۋدانىنىڭ تۋماسى، زەينەتكەر ا.دولانبەكوۆ ابايدىڭ ەكىنشى ايەلى ايگەرىمنىڭ قوبديشاسىن مۋزەي قورىنا تاپسىردى. قوبديشانى كەزىندە ايگەرىم باتەت ازىمحانقىزىنا سىيلاعان. سىيلىقتىڭ يەسى باتەت – رۋى جىگىتەك، بوجەي ۇرپاعى.
ايدار كەنجەتىلەۋۇلىنىڭ ايتۋى بويىنشا، باتەت ازىمحانقىزى ىرعىزباي اۋىلىنا كەلىن بولىپ تۇسەدى. بۇرىنعىنىڭ سالتى بويىنشا، اعايىن-تۋىس كەزەكتەسىپ، ەسىك كورسەتۋ ءۇشىن جاس كەلىندى قوناققا شاقىرىپ وتىرعان. سوندا ايگەرىم كەلىن بولىپ تۇسكەن باتەتتى ءوز ۇيىنەن ءدام تاتىرىپ، سوڭىندا وسى قوبديشانى سىيعا تارتقان. ونىسى – «قۋىس ۇيدەن قۇر شىقپاسىن»، يگىلىككە باستاعان ىرىم بولسىن دەگەنى.
ا.كەنجەتىلەۋۇلىنىڭ اناسى اقليا – باتەت ازىمحانقىزىنىڭ تۋعان ءسىڭىلىسى. 1967 جىلى باتەت اپامىز قوبديشانى ا.كەنجەتىلەۋۇلىنىڭ ايەلى باقىتقا بەرگەن. مىنە، وسىلايشا، ا.كەنجەتىلەۋۇلى ايگەرىم سىيعا تارتقان قوبديشانى ەندى مۋزەي قورىنا تاپسىردى.
كونەنىڭ كوزى بولعان قوبديشا، ارنايى قالپىنا كەلتىرۋ جۇمىستارىنان كەيىن، مۋزەي ەكسپوزيتسياسىنا قويىلىپ، كورەرمەن نازارىنا ۇسىنىلادى.
KAZMUSEUM.KZ
