قازاق ۇلتتىق اگرارلىق ۋنيۆەرسيتەتىنىڭ ستۋدەنتى اۋىلىندا وتا جاساپ ءجۇر

4895
Adyrna.kz Telegram

اقتوبە وبلىسى ىرعىز اۋدانىنىڭ تۇرعىنى التىنبەك ورازالىۇلى قازاق ۇلتتىق اگرارلىق ۋنيۆەرسيتەتىنىڭ ۆەتەريناريا ماماندىعىندا وقيدى. قازىر ول ونلاين رەجيمىندە ءبىلىم الۋدا. بيىل 3-كۋرستى ءتامامدايتىن التىنبەك اۋىلداستارىنىڭ مالىن ەمدەپ، وتا جاساپ ءجۇر دەپ حابارلايدى «ادىرنا» ۇلتتىق پورتالىنىڭ ءتىلشىسى.

بۇعان دەيىن التىنبەك العان ءبىلىمىن تاجىريبەمەن ۇشتاستىرىپ، ءوز اۋلاسىندا ءولىم اۋزىندا جاتقان باسپاعىنا وتا جاساپ، امان الىپ قالعان بولاتىن.

التىنبەكتىڭ وتباسى اۋدان ورتالىعىندا تۇرسا دا، مال شارۋاشىلىعىمەن اينالىسادى. قوراسىندا ازىن-اۋلاق ءىرى قارا جانە ۇساق مالى بار. ءساۋىر ايىندا قوراسىنداعى باسپاعى اۋىرىپ، ءۇي ءىشى ابىگەرگە ءتۇسىپتى. مال دارىگەرلەرىن شاقىرتقانىمەن، ولار ناقتى دياگنوز قويا الماپتى. سودان التىنبەك مالىنىڭ ارام ءولىپ قالماۋىن ويلاپ، دەرەۋ وتا جاساۋعا كىرىسكەن. ءوز تۇيسىگى مەن بىلىمىنە سەنگەن جاس جىگىت الگى باسپاقتىڭ ىشكى قۇرىلىسىنا وتا جاساپ، بۋدا-بۋدا ءجىپ الىپ شىققان.

ال وتكەن اپتادا بولاشاق مال دارىگەرى ىرعىز اۋىلىندا تۇراتىن مۇحامبەتراقىم سەيىتمانبەتوۆتىڭ سيىرىنا وتا جاساپتى. ءىرى قارا مالى جەم-سۋ ىشپەي، جاتىپ قالعان. وتا كەزىندە سيىردىڭ مەسقارىنىنان ءجىپ شىققان. قازىر التىنبەك كۇن سايىن سيىردىڭ جاعدايىن قاراپ، باقىلاپ وتىر.    

— بىلىكتى ۇستازدارىمنان ۇيرەنگەن ءبىلىمىم مەن تاجىريبەمدى ءىس جۇزىندە جۇزەگە اسىرۋعا بەل بۋدىم. وسىلايشا الدىمەن ءىشى كەۋىپ، اۋىرعان باسپاعىما وتا جاساپ، ولىمنەن امان الىپ قالدىم. ونىڭ مەسقارىنى مەن كوك ەتىن كەسىپ، ىشىندە جينالعان ءجىپتى الىپ شىقتىم. ءبىزدىڭ اۋىلدىڭ سىرتىندا، مال جايىلاتىن جەرلەردە تۇرمىستىق قالدىقتار كوپ. ونىڭ ىشىندە تسەللوفان، ءتۇرلى قاعازدار دا بار. سونى جەگەننىڭ كەسىرىنەن مالدىڭ ىشكى قۇرىلىسىنا بۋدا-بۋدا ءجىپ بولىپ جينالعان. ال وتكەن اپتادا مالى اۋىرىپ قينالعان اۋىلداسىما كومەكتەسىپ، سيىرىنا وتا جاسادىم.

قازىر اۋىل ىشىندە مالى، ۇيىندەگى يت-مىسىعى اۋىرعان اۋىلداستارىما كومەكتەسىپ، جانۋارلاردى ەمدەپ ءجۇرمىن. بۇل ءۇشىن اقى المايمىن. مەن ءۇشىن ەڭ باستىسى ءبىلىمىمدى كەڭەيتىپ، تاجىريبە جيناقتاۋ،  — دەيدى ستۋدەنت.

بۇگىنگى كۇنى بولاشاق مال دارىگەرىنىڭ جاساعان وتالارى ىرعىزدىقتاردىڭ اۋزىندا ءجۇر. ال التىنبەك بولسا وقۋ ورنىن اياقتاعان سوڭ، اۋىلىنا كەلىپ، قىزمەت ەتۋدى ارماندايدى.

التىنبەكتىڭ ۇستازى، قازاق ۇلتتىق اگرارلىق ۋنيۆەرسيتەتىنىڭ «اكۋشەرلىك، حيرۋرگيا جانە ءوسىپ-ءونۋ بيوتەحنولوگياسى» كافەدراسىنىڭ پروفەسسورى، ۆەتەريناريا عىلىمدارىنىڭ كانديداتى قانات قويباعاروۆتىڭ ايتۋىنشا، مال دارىگەرى بولۋ — قيىندىعى كوپ، جاۋاپكەرشىلىگى مول جۇمىس. ول ءۇشىن قازىرگى جاستار الدىمەن ءبىلىمدى، ءارى وجەت بولۋى كەرەك.

— مەديتسينادا قانداي جاعداي بولسا دا ەڭ باستىسى — ناۋقاسقا كومەكتەسۋ. سول سياقتى ۆەتەريناريادا دا مال اۋىرىپ تۇرسا، ونى ۋاقىت وتكىزبەي ەمدەۋ كەرەك. ءبىز ستۋدەنتتەرگە ءبىلىم بەرگەندە وسىنى ۇيرەتەمىز.

قازىر ءبىزدىڭ ستۋدەنتتەرىمىز ىندەتكە بايلانىستى ونلاين رەجيمدە ءبىلىم الىپ جاتىر. كۇن سايىن ولار ونلاين فورماتتا تەوريالىق بىلىمدەرىن شىڭداپ، تاجىريبە الماسۋدا. وسى ورايدا التىنبەكتىڭ قول جەتكىزگەن جەتىستىكتەرىن ەستىپ، قۋانىپ جاتىرمىز. بۇل ستۋدەنت — جاۋاپكەرشىلىگى مول، سالماقتى، ءبىلىمدى جىگىت. ونىڭ ءبىلىم الىپ قويماي، تاجىريبە جيناقتاپ، سونداي-اق مالى اۋىرعان اۋىلداستارىنا كومەكتەسىپ جاتقانىنا ءبىز، ۇستازدارى، ەرەكشە قۋانىپ جاتىرمىز. وسىنداي شاكىرتتەرىمىز كوپ بولسا، ءبىزدىڭ بەرگەن ءبىلىمىمىز دە، تاجىريبەمىز دە تەككە كەتپەگەنى. التىنبەككە ءدان ريزامىز. ونىڭ مۇنداي جەتىستىكتەرى — ءبىزدىڭ باسقا وڭىرلەردە تۇراتىن ستۋدەنتتەرگە ۇلگى، — دەيدى ق.قويباعاروۆ.

"ادىرنا" ۇلتتىق پورتالى

پىكىرلەر