2021 جىلدىڭ ناتيجەسى بويىنشا «قازاقستان پەداگوگتەرىنىڭ 100 جاڭا ەسىمى» رەسپۋبليكالىق بايقاۋىنا قاتىسىپ، تالدىقورعان قالاسىنداعى نازارباەۆ زياتكەرلىك مەكتەبىنىڭ پەداگوگ – كۋراتور – ۇيىمداستىرۋشىسى فاريزا تۇراروۆا «قازاقستان پەداگوگتەرىنىڭ 100 جاڭا ەسىمى» توسبەلگىسىمەن، ءى دارەجەلى ديپلومىمەن ماراپاتتالدى.
«BILIM-ÓRKENIETI» ۇلتتىق-يننوۆاتسيالىق عىلىمي زەرتتەۋ ورتالىعىنىڭ ۇيىمداستىرۋىمەن قازاقستان رەسپۋبليكاسى ءبىلىم جانە عىلىم مينيسترلىگى مەن «دارىن» رەسپۋبليكالىق عىلىمي-پراكتيكالىق ورتالىقتىڭ قولداۋىمەن وتكەن بايقاۋعا قازاقستاننىڭ تۇكپىر-تۇكپىرىنەن شەبەر ۇستازدار قاتىسقان. بايقاۋ جەڭىمپازدارى ءبىلىم بەرۋ سالاسىندا ناتيجەلى ەڭبەك ەتۋشى، بىلىكتىلىگىن راستايتىن سەرتيفيكاتتارى مەن ەسسەلەرى، ەڭبەك ءوتىلى بويىنشا اتقارعان قىزمەتتەرى جازىلعان ءومىربايانى، ءارى ەڭبەك ناتيجەلەرى بويىنشا انىقتالدى.
جەڭىمپازداردىڭ ۇستازدىق ەتۋىندەگى ءادىس-تاسىلدەرى جازىلعان ەسسەلەر جيناعى جاريالاندى.
تالدىقورعان قالاسىنداعى نازارباەۆ زياتكەرلىك مەكتەبىنىڭ پەداگوگ – كۋراتور – ۇيىمداستىرۋشىسى فاريزا تۋراروۆا بىرنەشە پەداگوگيكالىق بايقاۋلىرىنىڭ جەڭىمپازى، ونىڭ ىشىندە «ۇلى دالا ۇستازى» اتتى رەسپۋبليكالىق كونكۋرسىندا «ۇزدىك ارناۋ ولەڭى» نوميناتسياسى بويىنشا ءى دارەجەلى ديپلوم يەگەرى، «ۇزدىك پەداگوگ - 2020» بايقاۋىندا ۇزدىك تانىلىپ، ءى ورىندى جەڭىپ الدى. سونىمەن قاتار فاريزا شىعارما جازىپ، ولەڭ-جىرلارىن دا جارىققا شىعارۋدا. «الەم سۇيگەن قازاقتىڭ ۇلى ابايى» ەسسەسى مەن ولەڭى «ۇلى دالا ۇستازى» حالىقارالىق جۋرنالىنا باسىلىپ، جاريالاندى.
مەنىڭ ۇلكەن ارمانىم شاكىرتتەردى تاربيەلەپ، جۇزدەن جۇيرىك، مىڭنان تۇلپار، ەل بولاشاعىن ويلار ءبىلىمدى ازامات ەتىپ قالىپتاستىرۋ. نازارباەۆ زياتكەرلىك مەكتەبى - جەتىستىك پەن ءبىلىمىمدى شىڭداۋدىڭ جالعاسى دەپ بىلەمىن. ۇزدىكتەر ءۇشىن دايىندالعان سىناقتان ءوتىپ، دارىندى بالالارعا تولى مەكتەپتە وقۋشىلارعا ءبىلىم بەرۋدىڭ ءوزى مەن ءۇشىن جەتىستىك، - دەيدى فاريزا تۇراروۆا ەسسەدە.
زياتكەرلىك مەكتەپتە پەداگوگ – كۋراتور – ۇيىمداستىرۋشىسى فاريزا تۇراروۆا تىلدىك ورتاعا ەنۋ سىنىبىندا وزگە ۇلت وقۋشىلاردى قازاق ءتىلىن جەتىك بىلۋگە دايارلاپ، ءبىلىم بەرۋدە.
وقۋشىلاردىڭ بويىنا بىلىمدىلىكپەن قاتار جاقسى قاسيەتتەردى، قازاق ەلىنىڭ سالت-ءداستۇرى مەن تاعىلىمدى تاريحىن ءتۇرلى جوبالار ارقىلى بويلارىنا تەرەڭىنەن دارىتىپ، جۇمىس اتقارىپ كەلەدى.
ەگەر بۇگىنگى ءبۇلدىرشىندى حالقىمىزدىڭ جارقىن بولاشاعى مەن ەلىمىزدىڭ كەمەل كەلەشەگى ءۇشىن ەسەلى ەڭبەك ەتەتىن، ادالدىقتىڭ الا ءجىبىن اتتامايتىن اتپال ازامات رەتىندە قالىپتاستىرساق، وندا ماقساتىمىزدىڭ تولىق جۇزەگە اسقانى، - دەپ «قازاقستان پەداگوگتەرىنىڭ 100 جاڭا ەسىمى» قاتارىنا كىرگەن جاس مامان فاريزا تۇراروۆا سۇحباتىن اياقتادى.
