قازاقستاندا «بولاشاق» ءبىلىم بەرۋ باعدارلاماسى اياسىندا ستۋدەنتتەردى وقىتۋ اۋقىمى تاعى 4 ەلگە كەڭەيتىلدى دەپ حابارلايدى «ادىرنا» ۇلتتىق پورتالى قر ءبىلىم جانە عىلىم مينيسترلىگىنىڭ ءباسپاسوز قىزمەتىنە سىلتەمە جاساپ.
اتاپ ايتساق، ولاردىڭ قاتارىنا اۆستريا، چەحيا، يرلانديا جانە وڭتۇستىك افريكا كىرگەن. سونداي-اق تىزىمگە گونكونگ (قىتاي) قوسىلدى. وسىلايشا قازاقستاندىقتار «بولاشاق» باعدارلاماسى بويىنشا 27 ەلدە وقي الادى.
بيىل باعدارلاما اياسىندا وتىنىمدەردى قابىلداۋ 4 مامىر-27 قازان ارالىعىندا وتەدى. بۇگىنگى تاڭدا قازاقستاندىقتاردان 158 ءوتىنىش كەلىپ تۇسكەن.
پاندەمياعا قاراماستان، حالىقارالىق باعدارلامالار ورتالىعى قازاقستاندىقتار ءبىلىم الا الاتىن شەتەلدىك جوعارى وقۋ ورىندارىنىڭ سانىن ۇلعايتقان. ەگەر وتكەن جىلى ولاردىڭ سانى 138 بولسا، 2021-2023 جىلدارى 207 جوعارى وقۋ ورنى قازاقستاندىق ازاماتتاردى وقۋعا قابىلداۋعا دايىن. بۇل رەتتە جوعارى وقۋ ورىندارىن ىرىكتەۋ تالاپتارى دا كۇشەيتىلىپ وتىر. ماسەلەن، جوعارى وقۋ ورىندارى ءۇش حالىقارالىق اكادەميالىق رەيتينگكە كىرۋى كەرەك.
سونداي-اق بيىل ستيپەنديالاردى تاعايىنداۋ جۇيەسىنە دە وزگەرىستەر ەنگىزىلۋدە. ماسەلەن، بيىل ماۋسىم ايىندا — 90, تامىزدا – 170, ال قاراشادا 125 ستيپەنديا بولىنبەك. بۇل ستيپەنديانى وسى كەزەڭگە بەرىلگەن وتىنىمدەرگە سايكەس بىركەلكى بولۋگە مۇمكىندىك بەرەدى.
ايتا كەتۋ كەرەك، 2021 جىلى «بولاشاق» باعدارلاماسى بويىنشا وقۋعا 1055 ستيپەنديا ءبولىندى. ونىڭ 555-ءى ماگيستراتۋرا، رەزيدەنتۋرا، دوكتورانتۋرا جانە تاعىلىمداما بولىمدەرى بويىنشا بولىنسە، 500 ستيپەنديا وتاندىق عالىمدارعا ارنالعان.
"ادىرنا" ۇلتتىق پورتالى
