Qazaqstanda «Bolashaq» bilim berý baǵdarlamasy aıasynda stýdentterdi oqytý aýqymy taǵy 4 elge keńeıtildi dep habarlaıdy «Adyrna» ulttyq portaly QR Bilim jáne ǵylym mınıstrliginiń baspasóz qyzmetine silteme jasap.
Atap aıtsaq, olardyń qataryna Avstrııa, Chehııa, Irlandııa jáne Ońtústik Afrıka kirgen. Sondaı-aq tizimge Gonkong (Qytaı) qosyldy. Osylaısha qazaqstandyqtar «Bolashaq» baǵdarlamasy boıynsha 27 elde oqı alady.
Bıyl baǵdarlama aıasynda ótinimderdi qabyldaý 4 mamyr-27 qazan aralyǵynda ótedi. Búgingi tańda qazaqstandyqtardan 158 ótinish kelip túsken.
Pandemııaǵa qaramastan, Halyqaralyq baǵdarlamalar ortalyǵy qazaqstandyqtar bilim ala alatyn sheteldik joǵary oqý oryndarynyń sanyn ulǵaıtqan. Eger ótken jyly olardyń sany 138 bolsa, 2021-2023 jyldary 207 joǵary oqý orny qazaqstandyq azamattardy oqýǵa qabyldaýǵa daıyn. Bul rette joǵary oqý oryndaryn irikteý talaptary da kúsheıtilip otyr. Máselen, joǵary oqý oryndary úsh halyqaralyq akademııalyq reıtıngke kirýi kerek.
Sondaı-aq bıyl stıpendııalardy taǵaıyndaý júıesine de ózgerister engizilýde. Máselen, bıyl maýsym aıynda — 90, tamyzda – 170, al qarashada 125 stıpendııa bólinbek. Bul stıpendııany osy kezeńge berilgen ótinimderge sáıkes birkelki bólýge múmkindik beredi.
Aıta ketý kerek, 2021 jyly «Bolashaq» baǵdarlamasy boıynsha oqýǵa 1055 stıpendııa bólindi. Onyń 555-i magıstratýra, rezıdentýra, doktorantýra jáne taǵylymdama bólimderi boıynsha bólinse, 500 stıpendııa otandyq ǵalymdarǵa arnalǵan.
"Adyrna" ulttyq portaly
