اقتوبە وبلىسىنىڭ ورتالىعىندا مەشىتكە قارسى جول بويىندا جول-كولىك وقيعاسى بولىپ، ءبىر ادام كوز جۇمدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
"Shacman" ماركالى جۇك كولىگىنىڭ جۇرگىزۋشىسى ابىلقايىر حان داڭعىلىمەن "نۇر-عاسىر" مەشىتىنە قاراما-قارسى ءجۇرىپ، قيىلىستان سولعا بۇرىلعان كەزدە قارسى كەلگەن كولىككە جول بەرمەي، "BMW" ماركالى اۆتوكولىكپەن سوقتىعىسقان. سوقتىعىسۋدان جۇك كولىگى قوزعالىس باعىتىن وزگەرتىپ، جاياۋ جۇرگىنشىلەر جولىمەن ءجۇرىپ كەلە جاتقان باتىس قازاقستان وبلىسىنىڭ 32 جاستاعى تۇرعىنىن قاعىپ كەتتى.
جول-كولىك وقيعاسى سالدارىنان ايەل وقيعا ورنىندا كوز جۇمدى، ال "BMW" اۆتوكولىگىنىڭ جۇرگىزۋشىسى اقتوبە قالاسىنىڭ جەدەل مەديتسينالىق جاردەم اۋرۋحاناسىنا جاتقىزىلدى.
"وكىنىشكە قاراي، اتالعان جول-كولىك وقيعاسىنىڭ سالدارىنان ءوز جونىمەن جاياۋ جۇرگىنشىلەر جولىمەن كەتىپ بارا جاتقان كىناسىز ايەل كوز جۇمدى. قازىر بۇل وقيعا بويىنشا تەكسەرۋ جۇمىستارى جۇرگىزىلۋدە. ءبىز بارلىق ازاماتتاردان جول قوزعالىسى ەرەجەلەرىن قاتاڭ ساقتاۋدى ەسكەرتەمىز. ءسىزدىڭ ويلانباي جاساعان ارەكەتتەرىڭىزدەن كىناسىز ادامدار زارداپ شەگۋى مۇمكىن", - دەدى وبلىستىق پوليتسيا دەپارتامەنتىنىڭ باستىعى اتىعاي ارىستانوۆ.
"ادىرنا" ۇلتتىق پورتالى.
