ماڭعىستاۋ وبلىسىندا مۇنايشىلار نارازىلىققا شىقتى. «مۇنايتەلەكوم» كومپانياسىنا قىزمەت كورسەتەتىن سەرىكتەستىك جۇمىسشىلارى جالاقىسىن كوتەرۋدى تالاپ ەتىپ وتىر، دەپ حابارلايدى «ادىرنا» ۇلتتىق پورتالى كتك ارناسىنا سىلتەمە جاساپ.
«قالامقاس» كەن ورنى «مۇنايتەلەكوم» اۋتستاففينگ. ايلىق كوتەرۋىن تالاپ ەتەمىز! زاڭدا بار زات...
جەتىباي، جاڭاوزەن، قالامقاس كەن ورنىندا جۇمىس ىستەيتىن «مۇنايتەلەكوم» سەرىكتەستىگىنىڭ 100-دەن اسا قىزمەتكەرى ەكى كۇننەن بەرى جۇمىسىن توقتاتىپ تاستادى. «جالاقى كوبەيتىلمەسە، قيمىلدامايمىز» دەپ وتىر. «مۇنايتەلەكوم» كومپانياسىندا شتاتتا جۇمىس ىستەيتىن قاراپايىم قىزمەتكەرلەر 500 مىڭ تەڭگە جالاقى الادى ەكەن. «ال ءدال سونداي جۇمىس ىستەيتىن بىزگە نەبارى 120 مىڭ تەڭگە تولەنەدى» دەيدى. ءتىپتى ءساۋىر ايىندا كومپانيا باسشىلىعى ايلىقتى كوتەرمەۋ ءۇشىن قيتۇرلىق جاساپ سلەسار، ينجەنەر ماماندىقتارىنىڭ اتاۋىن جوندەۋشى، رەتتەۋشى قىلىپ وزگەرتىپ جىبەرگەن كورىنەدى. «نارازىلىق بىلدىرسەڭدەر، جۇمىستان شىعارامىز» دەپ قورقىتىپتى. ال ەڭبەك ينسپەكتسياسى جاعدايدى تولىق زەرتتەۋ ءۇشىن جۇمىسشىلاردىڭ ارىزى قاجەت دەپ وتىر.
«ەڭبەك ينسپەكتورلارى «قالامقاس» كەن ورنىنا بارىپ قر ەڭبەك كودەكسىنىڭ زاڭ تالاپتارىنا ساي ءتۇسىندىرۋ جۇرگىزدى. تالاپتاردى ورىنداۋ ماقستاتىندا ارىز جازۋ كەرەك ەكەنى ءتۇسىندىرىلدى. ەگەر ارىز جازىلسا، ماسەلە زاڭ اياسىندا ءبىزدىڭ باسقارمامەن قارالادى»، - دەيدى ماڭعىستاۋ وبلىسى مەملەكەتتىك ەڭبەك ينسپەكتسياسى باسقارماسىنىڭ ءبولىم باسشىسى مەرەي ءماجيتوۆ.
"ادىرنا" ۇلتتىق پورتالى
