تۇركىستان وبلىسىندا قۇتقارۋشىلار تاۋدا جوعالعان تۋريستەردىڭ بىرىنە تيەسىلى سومكەنى تاپتى. سومكە وگەم وزەنىنىڭ بويىنان تابىلدى، دەپ حابارلايدى توتەنشە جاعدايلار مينيسترلىگىنىڭ ءباسپاسوز قىزمەتى.
قۇتقارۋشىلار سومكەنى پوليتسيا قىزمەتكەرلەرىنە تاپسىردى. جوعالعان ەكى ءتۋريستى ىزدەۋ جۇمىستارى جالعاسىپ جاتىر.
ۆەدومستۆو اقپاراتىنشا، ايماققا "قازاۆياقۇتقارۋدىڭ" ەكى تىكۇشاعىمەن اەروۆيزۋالدى بارلاۋ جاسالۋدا.
ىزدەۋ جۇمىستارىنا تۇركىستان وبلىسى تج دەپارتامەنتىنەن، پوليتسيا دەپارتامەنتىنەن، ۇقك شەكارا قىزمەتىنەن، ورمان شارۋاشىلىعىنان، وزبەكستان تجم جەكە قۇرامىنان 73 مامان، 12 بىرلىك تەحنيكا جانە جوعالعان تۋريستەردىڭ تۋىستارى جۇمىلدىرىلدى. ىزدەۋ جۇمىستارى سەگىز باعىت بويىنشا جۇرگىزىلىپ جاتىر.
ەسكە سالساق، 25 مامىردا كەشكە سايرام-وگەم مەملەكەتتىك ۇلتتىق تابيعي پاركى اۋماعىندا جەتى ءتۋريستىڭ جوعالىپ كەتكەنى تۋرالى حابار ءتۇستى.
انىقتالعانداي، جىگىتتەردىڭ ءبىرى اۋىرىپ قالعاندىقتان، ولار ەكى توپقا بولىنگەن. ۇشەۋى كومەك كۇتىپ قالعان، ال تورتەۋى قۇتقارۋشىلاردى شاقىرۋعا كەتكەن.
28 مامىردا ءبىرىنشى توپ امان-ەسەن وتباسىمەن قاۋىشتى. 29 مامىردا ەكى ءتۋريستىڭ ءمايىتى تابىلدى. قالعان ەكى جىگىت ءالى ىزدەستىرىلۋدە.
تاۋعا شىققان تۋريستەر – نازارباەۆ ۋنيۆەرسيتەتىنىڭ ستۋدەنتتەرى، بىرەۋى – مەكتەپ تۇلەگى. توپ 21 مامىردا "سارى-ايعىر" شاتقالىنا اتتانىپ، 24 مامىردا ۇيگە ورالۋدى جوسپارلاعان.
