رەسەيدىڭ سىرتقى ىستەر ءمينيسترىنىڭ ورىنباسارى الەكساندر پانكين "ەۋرازيالىق وداق (وداققا مۇشە ەلدەرگە) باتىستىق سانكتسيالارعا جاۋاپ بەرۋ ماسەلەسىن كۇن تارتىبىندە ۇستاپ وتىرعانىن" مالىمدەدى. بۇل ارينە قازاقستان ءۇشىن اسا قاۋىپتى مالىمدەمە. سەبەبى قازاقستان تەك رەسەيمەن بايلانىس ورناتقان مەملەكەت ەمەس. ساياسي، اسكەري جانە ەكونوميكالىق تۇرعىدان كوپۆەكتورلىقتى ۇستانىپ كەلەدى. ونىڭ ءتيىمدى ناتيجەلەرى دە جوق ەمەس. يميدج، ينۆەستيتسيا، سانكتسيالاردان ازات بولۋ. الايدا رەسەي تاراپى ءوز قىلمىسىنا ەندى تەك ماسكەۋ عانا ەمەس، وزگەلەر دە جاۋاپ بەرسە دەيدى. قاتىسى جوق، كىناسىز تاراپتى ۇيىققا تارتپاق. ەۋرازيالىق وداقتىڭ سانكتسيالارعا بىرلەسە جاۋاپ بەرۋ يدەياسىنا قازاقستاندىق ساراپشىلار قارسى.
ساياساتتانشۋى دوسىم ساتپاەۆ: "2018 جىلى "رەسەيدىڭ گەوساياسي جالعىزدىعى قازاقستانعا قاۋىپ توندىرەدى" دەگەن ماقالادا مەن كرەمل يدەولوگتارى رەسەي ءوزىنىڭ "گەوساياسي جالعىزدىعىنا" وڭاي ءتوزۋى ءۇشىن ەاەو مەن ۇقشۇ-داعى سەرىكتەستەرىن ءوز الەمىنە تارتقىسى كەلەتىندىگىن اتاپ ءوتتىم. رەسەي فەدەراتسياسى سىرتقى ىستەر ءمينيسترىنىڭ ورىنباسارى الەكساندر پانكيننىڭ مالىمدەمەلەرى ءبىزدىڭ ەكونوميكالىق مۇددەلەرىمىزگە دە قايشى كەلەدى. لۋكاشەنكونى باتىستىڭ سانكتسيالارى تىعىرىققا تىرەگەنى سونشالىق بەلارۋسسيا رەسەيدىڭ قۇشاعىنا ەنىپ بارادى.
ال قازاقستاندا ونداي پروبلەمالار جوق. ەگەر ءبىز شىنىمەن دە ەگەمەندى مەملەكەت بولساق، وندا ءبىز ءوزىمىزدىڭ سىرتقى ساياساتىمىزدى، ونىڭ ىشىندە حالىقارالىق ەكونوميكالىق بايلانىستار سالاسىن ءوزىمىز انىقتاۋىمىز كەرەك" دەدى.
ال قوعام قايراتكەرى مۇرات ابەنوۆ: "قازاقستان ازاماتتارى رەسەيدىڭ باتىسقا قارسى سانكتسيالىق سوعىسىنا قوسىلۋدى قالامايدى. بۇل ءبىزدىڭ سوعىس ەمەس" دەدى.
ساياساتتانۋشى تالعات قاليەۆ بولسا "ءبىزدىڭ كەلىسسوز جۇرگىزۋشىلەر سانكتسيالارعا قوسىلماۋ قۇقىعىمىزدى قورعاۋ ءۇشىن جەتكىلىكتى كۇشكە، پرينتسيپتەر مەن دالەلدەرگە سۇيەنەدى دەپ ۇمىتتەنەمىن. جەكە ءوزىم تەمىر بۇعاۋدىڭ ارتىندا بولعىم كەلمەيدى جانە بىزگە ەش قاتىسى جوق وزگەلەردىڭ جاساعان ارەكەتى ءۇشىن جاۋاپ بەرۋدى قالامايمىن" دەدى.
"ادىرنا" ۇلتتىق پورتالى
