اتالعان وقيعاعا بايلانىستى مالايزيا وكىمەتى قىتاي ەلشىسىن وڭتۇستىك قىتاي تەڭىزىندەگى قحر اۋە-قورعانىس كۇشتەرىنىڭ 16 ۇشاعىنىڭ باسىپ كىرۋىنە نارازىلىق ءبىلدىرىپ، تىكەلەي وزىنە شاقىردى. مالايزيا سىرتقى ىستەر ءمينيسترى حيشاممۋددين حۋسەيننىڭ ايتۋىنشا، قىتاي اۋە-قورعانىس كۇشتەرى مالايزيانىڭ اۋە كەڭىستىگىنە باسىپ كىرىپ، ەلدىڭ ۇلتتىق قاۋىپسىزدىگىنە تىكەلەي قاۋىپ توندىرگەن.
وتكەن دۇيسەنبىدە مالايزيانىڭ ساراۆاك شتاتىنىڭ اۋە كەڭىستىگىندە 850 مەتر بيىكتىكتە 540 كم/ساع جىلدامدىقپەن ۇشىپ وتكەن قىتايلىق بومبالاۋشى ۇشاقتار رادارعا ءتۇستى، دەپ حابارلادى مالايزيا اۋە-قورعانىس كۇشتەرى. قىتايلىق اسكەري اۆياتسيا ۇشاقتارى مالايزيانىڭ تەڭىز ايماعىنا ءوتىپ كەتىپ، ەلدىڭ ۇلتتىق اۋە كەڭىستىگىنە قاۋىپ توندىرگەن.
"مالايزيانىڭ حالىقارالىق ديپلوماتيادا ساياسي ۇستانىمى ايقىن. ءبىزدىڭ كەز كەلگەن ەلدەرمەن دوستىق-ديپلوماتيالىق قارىم-قاتىناسىمىز ءبىزدىڭ ۇلتتىق قاۋىپسىزدىگىمىزگە قاۋىپ توندىرەدى دەگەندى بىلدىرمەيدى. مالايزيا ەگەمەندى ەل رەتىندە ءوزىنىڭ قادىر-قاسيەتىن، سۋۆەرەنيتەتىن قاشاندا قورعايدى", - دەلىنگەن ەلدىڭ ءسىم-ءنىڭ حابارلاماسىندا.
"وقيعا قىتايدىڭ وڭتۇستىك قىتاي تەڭىزى اۋماعى بويىنشا ۇستانىپ وتىرعان ساياسي امبيتسيالارىنا بايلانىستى وڭتۇستىك-شىعىس ازيانىڭ باسقا ەلدەرىمەن، سونداي-اق اقش-پەن جانە ونىڭ وداقتاستارىمەن قارىم-قاتىناسىنداعى شيەلەنىستىڭ ارتۋى اياسىندا ورىن الدى. مالايزيا دا قىتايدىڭ وڭتۇستىك اۋماعىنداعى ىقپالدى ەلدەردىڭ قاتارىنا كىرەدى. ۇزاق جىلدار بويىنا قىتايدىڭ اگرەسسيۆتى ساياسي امبيتسياسىنا قارسى شىعىپ، مىنەزىن كورسەتىپ كەلە جاتقان ەل. ال پەكين وڭتۇستىك ايماقتارداعى جەرگىلىكتى ارحيپەلاگتاردا ورنالاسقان 5 ەلدىڭ سۋۆەرەنيتەتىن مويىنداماي كەلەدى", دەپ حابارلادى Bloomberg.
بەكبولات قارجان،
"ادىرنا" ۇلتتىق پورتالى
