ەلورداداعى مەكتەپتىڭ ءتورت وقۋشىسى كۆارتس اسەرىنەن كوزدەرى زاقىمدالدى، دەپ حابارلادى قوعامدىق دەنساۋلىق ساقتاۋ باسقارماسىنىڭ ءباسپاسوز قىزمەتى.
استانالىق باسقارما ۇسىنعان اقپاراتقا سايكەس، №2 كوپبەيىندى قالالىق بالالار اۋرۋحاناسىنا جەدەل جاردەم كومەگىمەن وقۋشىلار جەتكىزىلدى. ولار كۆارتس شامىنىڭ اسەرىنەن كەيىن وزدەرىن ناشار سەزىنگەنىن ايتقان.
ءتورت وقۋشىنى دارىگەرلەر تەكسەردى. زارداپ شەككەندەر اراسىندا 2004 جىلى تۋعان ءۇش بالا جانە 2005 جىلى تۋعان ءبىر وقۋشى بار.
"ولاردى تەكسەرۋ كەزىندە جەڭىل دەڭگەيدە ەلەكترووفتالميا (كوز الماسىنىڭ زاقىمدالۋى) انىقتالدى", – دەلىنگەن حابارلامادا.
دارىگەر تەكسەرگەننەن كەيىن ءتورت وقۋشى دا ۇيلەرىنە جىبەرىلدى. ولار تۇراتىن مەكەنجايى بويىنشا امبۋلاتوريالىق ەمدەۋ الادى.
نازارباەۆ زياتكەرلىك مەكتەبىنىڭ ءباسپاسوز قىزمەتى وقيعانىڭ وسى وقۋ ورنىندا بولعانىن راستادى.
ء"يا، راسىندا مۇنداي جاعداي بولدى. وقيعا نازارباەۆ زياتكەرلىك مەكتەبىنىڭ حالىقارالىق باكالاۆريات مەكتەبىندە بولدى. قازىر مەكتەپتە قىزمەتتىك تەكسەرىس ءجۇرىپ جاتىر. تۇستەن كەيىن رەسمي مالىمدەمە ۇسىنامىز", - دەدى مەكتەپتەگىلەر Sputnik قازاقستان تىلشىسىنە.
الەۋمەتتىك جەلىدەگى اقپارات بويىنشا، نۇر-سۇلتانداعى مەكتەپتەردىڭ بىرىندە وقۋشىلار كۆارتستەۋگە ارنالعان ۋلتراكۇلگىن شام سوندىرىلمەگەن كابينەتتە مەملەكەتتىك ەمتيحان تاپسىرعان.
