رەسەي دوللاردى ۇاق-دان الىپ تاستاپ، ونى ەۋرو مەن التىنعا اۋىستىرماقشى ەكەن
رەسەي ءبىر اي ىشىندە ۇلتتىق ءال-اۋقات قورىنىڭ بارلىق دوللارلىق اكتيۆتەرىن ەۋرو ۆاليۋتا مەن التىنعا اۋدارادى. بۇل نەتكەن تەز ارادا قابىلدانعان وپەراتيۆتى شەشىم ەكەن... بيلىك ەندى ەۋرو، يۋان جانە التىنعا ينۆەستيتسيالىق اكتيۆتەردىڭ كولەمىن ارتتىرادى، دەدى قارجى ءمينيسترى انتون سيلۋانوۆ.
ەكونوميكاسى توقىراعان رەسەيگە دوللاردان باس تارتۋ قانشالىقتى جەڭىل بولادى؟ ەكىنشىدەن، ەلگە سىرتتان كەلەتىن ەكسپورتتىق تاۋارلاردىڭ ءبارى دە دوللارمەن ايىرباس رەتىندە كەلەدى. وسى ۋاقىتقا دەيىن باتىستىڭ سانكتسياسىنا ۇشىراعان رەسەيدىڭ ەكونوميكاسى مۇنى كوتەرە الادى ما؟
رەسەيدىڭ مەملەكەتتىك اكتيۆتەرى مەن ۇاق-نىڭ 35% – عا جۋىعى دوللارمەن ساقتالعان. وسىلاي بولا تۇرا، رەسەي اكتيۆتەردى دوللارسىزداندىرۋ پروتسەسىن كوشپەك. قازىرگى رەسەيدىڭ ەكونوميكالىق جااعدايىندا بۇل ەكونوميكالىق ابسۋرد.
رەسەيدىڭ ۆيتسە-پرەمەرى اندرەي بەلوۋسوۆ دوللاردى ۇاق-نان شىعارۋدى اقش سانكتسيالارىنىڭ اۋىرتپالىعىنا بايلانىستى ماڭىزدى شەشىم دەپ وتىر. ونىڭ پىكىرىنشە، ۇاق-دا امەريكاندىق ۆاليۋتادان تولىق باس تارتۋ رۋبل باعامىنا اسەر ەتپەيدى، دەپتى.
رەسەيدىڭ دوللاردان باس تارتىپ، يۋانگە ءوتۋى قازاقستاننىڭ ەكونوميكاسىنا دا وراسان زيانىن تيگىزەدى. ءبىزدىڭ مينيسترلىكتەر سانكتسيا بىزگە سالىنىپ وتىرعان جوق، سوندىقتان الاڭداۋدىڭ كەرەگى جوق دەۋمەن كەلەدى. ولاي ەمەس. ءبىز رەسەيمەن ءبىر ەكونوميكالىق وداقتامىز. قازىرگى جاپپاي تۇتىنۋ تاۋارلارىنىڭ قىمباتتاۋى تىكەلەي اقش-تىڭ سانكتسياسىنىڭ اسەرىنەن بولىپ وتىر. ول ارنايى ماقالانى قاجەت ەتەدى.
بەكبولات قارجان،
"ادىرنا" ۇلتتىق پورتالى
