ءساتتى ساياحاتتىڭ 12 قاعيداسى

504
فوتو اشىق اقپارات كوزىنەن الىندى
فوتو اشىق اقپارات كوزىنەن الىندى

جاز – الەمگە قۇلاش سەرمەپ، ساياحاتتايتىن جايدارلى مەزگىل. ساياحاتتى سۇيەتىندەر دەمالۋ ءۇشىن ءدال وسى مەزگىلدى قولايلى كورەدى. سەبەبى جاز - جاعاجاي جاندانىپ، تابيعات تۇلەيتىن كورىكتى كەزەڭ. الايدا دەمالىستان تولىقتاي ەموتسيونالدى ەستەتيكالىق ءلاززات الۋ ءۇشىن وزىندىك ەرەجەلەردى ەستە تۇتقان ابزال. جاقىن ارادا ساياحاتتاۋدى جوسپارلاپ جۇرسەڭىز، اۋەلى جۇرەك ۇنىنە قۇلاق اسىڭىز. جانىڭىز شىتىرمانعا تولى توپتىق، اكتيۆ ساياحاتتى ۇناتا ما، الدە، ويىڭىزدى رەتتەپ، ماقساتتارىڭىزدى ايقىنداپ كەلۋگە ىقپال ەتەتىن پاسسيۆ دەمالىس قاجەت پە؟ تاڭداۋ- تالعام ەركىڭىزدە.

ەندەشە، شارتاراپتى شارلاپ، تۋريزم جولىندا تولىسقان فريلانسەرلەردىڭ ساياحاتتاۋ بارىسىندا ۇستاناتىن العىشارتتارىن الدىڭىزعا ۇسىنامىز.

  1. جول قامىنا كىرىسپەس بۇرىن دەمالىستىڭ ءار كۇنىن ەگجەي-تەگجەيلى جوسپارلاڭىز! سوندا، ۇيىڭىزگە ورالعاندا بەلگىلەگەن مەجەلەردى كورىپ-تانىپ، "ۇلگەرمەدىم" دەگەن وكىنىشكە ورىن قالمايدى.
  2. ساياحات – توسىن سيتۋاتسيالارعا تولى بولادى. سوندىقتان بارلىق ۋاقىتتا سەنىمدى سەرىك ەتىپ، ينتۋتسياڭىزعا قۇلاق اسىڭىز.
  3. باراتىن ەلدىڭ، قالانىڭ ۆاليۋتالىق كۋرسىن، مەنتاليتەتىن تەرەڭ زەرتتەپ، گەوگرافيالىق كارتاسىن، باعىت بەرەتىن ارنايى پلاتفورمالاردى تەلەفونىڭىزعا جۇكتەپ الىڭىز. (ماسەلەن، TravelSIM, Kaspi.kz, اۋدارما جاسايتىن قوسىمشالار شەتەلدەگى جۇمىسىڭىزدى جەڭىلدەتەدى.)
  4. وزىڭىزگە بەيتانىس جەرگە ساياحاتتار بولساڭىز، ول ورىننىڭ ەرەكشەلىكتەرىن ەكشەپ، جولعا كۇندىز شىعىڭىز.
  5. جول سومكەڭىزدى قولدانبايتىن زاتتار مەن كيمەيتىن كيىمدەرگە تولتىرماڭىز.
  6. تابان تىرەگەن ەلىڭىزدىڭ ءدىني سەنىمدەرىنە قۇرمەتپەن قاراپ، جەرگىلىكتى تەلەارنالاردان تۇرعىلىقتى ورىنداعى جاڭالىقتاردان حاباردار بولىڭىز.
  7. باراتىن ەلىڭىزدىڭ قولدانىستاعى ءتىلىن جازباي تاۋىپ، ساياحات اياسىندا ەڭ ءجيى قاجەت بولاتىن سوزدەردى جاتتاپ العانىڭىز ءجون.
  8. باستىسى، جاڭا اشىلۋلار مەن تانىستىقتارعا اشىق بولىڭىز.
  9. اسەرلى ساياحاتىڭىزدىڭ ءار ءساتى جادىڭىزدا جاتتالعانىن قالاساڭىز، قاربالاس ساياحات كەزەڭىنەن از سايابىر تاۋىپ كۇندەلىك جۇرگىزىڭىز.
  10. دەمالىسىڭىزدىڭ ءبىر كۇنىن ەكستريمالدى تۋريزمگە ارنايتىن بولساڭىز، قوناق ءۇي نومەرىنە قايدا، كىممەن بارا جاتقانىڭىز تۋرالى اقپارات قالدىرىپ كەتكەنىڭىز دۇرىس.
  11. كەلەڭسىز وقيعالار مەن وزگە تۋريستەردىڭ كەيبىر قىلىقتارىنا كوڭىل-كۇيىڭىزدى قۇرتۋعا جول بەرمەڭىز! ءاردايىم ءپوزيتيۆتى وي -دەمالىسىڭىزدىڭ اسەرلى وتەتىنىنە كەپىلدىك!
  12. جادىڭىزدا جاتتايتىن سوڭعى ەرەجە ەلدەگى جاقىندارىڭىزبەن بايلانىستى ۇزبەڭىز.

سونداي-اق ءبىر بارعان ەلىڭىز كوڭىلىڭىزدەن شىعىپ، قانشالىقتى ۇناپ قالسا دا، كەلەسى جولى ساياحاتىڭىزدىڭ باعىتىن باسقا جاققا بۇرىڭىز. ەل ارالاپ، جەر كورۋدىڭ التىن قاعيداسى كوڭىل كوكجيەگىن كەڭىتىپ، تانىم-تۇسىنىگىڭىزدى تولىستىرۋ. ويلى وقىرمان، جوعارىدا ۇسىنعان كەلەلى كەڭەستەردى دەمالىسىڭىزدىڭ باستى ۇستانىمىڭىز ەتسەڭىز، ۇتىلماسىڭىز انىق! قاشاندا ساپارىڭىز ءساتتى، جولىڭىز اشىق بولسىن!

                                                                                                      دانا جوبالاەۆا

پىكىرلەر
ۇقساس جاڭالىقتار