كۇنى كەشە عانا ولشەۋلى عۇمىردا شەكسىز مەيىرىم يەسى، جاناشىر ارىپتەسىمىز، ۇلاعاتتى ۇستاز مايرا عيلاقىزى ومىردەن وزدى.
مايرا عيلاقىزى 1940 جىلى 26 قىركۇيەكتە گۋرەۆ (اتىراۋ وبلىسى، تەڭىز، قۇرمانعازى) اۋدانىندا دۇنيەگە كەلدى. 1957 جىلى سول اۋداننىڭ اباي اتىنداعى ورتا مەكتەبىن ءبىتىرىپ، 1957-1962 جىلدارى الماتى شەت تىلدەرى ينستيتۋتىنىڭ نەمىس فاكۋلتەتىندە وقىدى. 1967 جىلدان باستاپ ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتتىڭ فيزيكا-ماتەماتيكا فاكۋلتەتىندە نەمىس تىلىنەن اعا وقىتۋشى، اكادەميالىق دوتسەنت قىزمەتتەرىن اتقاردى. ۋنيۆەرسيتەتتىڭ قوعامدىق جۇمىستارىنا بەلسەنە ارالاسىپ، ۋنيۆەرسيتەتتىڭ قىزدار كەڭەسىنىڭ ءتورايىمى، فيزيكا-ماتەماتيكا فاكۋلتەتىنىڭ پارتيا ۇيىمىنىڭ حاتشىسى بولدى. قر «ءبىلىم بەرۋ ءىسىنىڭ ۇزدىگى» توسبەلگىسىمەن، «قر عىلىمىن دامىتۋعا سىڭىرگەن ەڭبەگى ءۇشىن»، «قر ءبىلىم بەرۋ ءىسىنىڭ قۇرمەتتى قىزمەتكەرى»، جاس ۇرپاقتى وقىتۋ جانە تاربيەلەۋ ىسىندەگى ەلەۋلى تابىستارى ءۇشىن 2009 جىلى «ى.التىنسارين»، ح. دوسمۇحامەدوۆ اتىنداعى توسبەلگىلەرىمەن، وبلىستىق جانە قالالىق اكىمشىلىكتەردىڭ العىس حاتتارىمەن ماراپاتتالعان.
مايرا اپاي تەك ءبىلىم مەن عىلىم سالاسىندا عانا جەتىستىكتەرگە جەتىپ قويماي، جىلى ۇياداي ءوزىنىڭ وتباسىندا دا باقىتقا كەنەلگەن جان. قۇداي قوسقان قوساعى، اتىراۋ عالىمدارىنىڭ كوشباسشىسى، ۇزاق جىلدار بويى ۋنيۆەرسيتەت رەكتورى بولىپ ابىرويلى ەڭبەك ەتكەن حيسمەت بوزانۇلى ەكەۋى ۇرپاق ءوسىرىپ، بيىككە جەتەلەپ جەتكىزدى، ورنىمەن وقىتىپ ادام قاتارىنا قوستى.
بار عۇمىرىن ءبىلىم سالاسىنىڭ وركەندەۋىنە ۇلەس قوسۋعا ارناعان ابزال جان، اياۋلى ۇستاز، مايرا عيلاقىزىنىڭ جارقىن بەينەسى جادىمىزدا ءاردايىم ساقتالادى. جانى ءجانناتتا بولعاي!
اتىراۋ مەملەكەتتىك ۋنيۆەرسيتەتىنىڭ رەكتورى يدريسوۆ سالامات نۇرمۇحانۇلى.
مايرا اپامىزدىڭ قازاسىنا
ارمىسىڭ اتىراۋدىڭ قارالى ەلى،
تورلادى اۋىر قازا سانانى ەندى.
التايدان اتىراۋعا كەلگەنىمدە،
سيپاعان ماڭدايىمنان انام ەدى.
اڭىراپ كەلدىم جوقتاپ ورنىڭدى،
امالسىز كوتەرەمىز قازانى ەندى.
مايرا اپام، ەركەلەتكەن ءبىر ۇل ەدىم،
بالام دەپ كىم ايتادى ماعان ەندى.
سەكىلدى تۋعان انام كورىنەتىن،
تۇزەتىپ بەرەتۇعىن جاعا-جەڭدى.
ەسكە الىپ ەڭىرەيمىز نۇرلى ءجۇزىن،
شاقىرىپ دۇعامىزعا تامام ەلدى.
انامىز جاتقان جەرى جارىق بولسىن،
الاگور حاق قۇدايىم پاناڭا ەندى.
مەيىرىمدى بار جۇرتىنا اسىل انا،
ماڭگىلىك ۇمىتىلماس عاسىر انا.
حيسمەت اتامىزعا اسىقتى ما،
ەرتەرەك بارعىسى كەپ قاسىنا دا.
امال نە باسقا تۇسكەن قيىندىققا،
قارامايدى اجال كوزدىڭ جاسىنا دا.
جۇرەگى قانداي جۇمساق سول انانىڭ،
بولەنگەن العىسىنا كوپ ادامنىڭ.
مەيىرى كۇندەي نۇرلى كۇلىپ تۇرعان،
اناسى سەكىلدى ەدى بار بالانىڭ.
كۇرسىنە ەسكە الامىز ەندى انانى،
جۇرەكتەن ساعىنىشتىڭ ارناپ ءانىن.
ەزىلدى ەستىگەندە ەت جۇرەگىم،
ەڭسەمدى باسىپ قايعى كەتتى مەنىڭ.
امال نە باسقا ءتۇستى، كونەمىز دە،
جانناتتىق بولسىن انا دەپ تىلەدىم.
اياۋلى بەيبىت، ساقتاعان، ەرلان اعالارىم
سابىر ەت، اسىل تۋعان تەكتىلەرىم!
توگىلگەن مەيىرىنە رازىمىز،
سونبەيتىن كەۋدەدەگى شىراعىمىز
«قاراعىم، اينالايىن» دەگەن ءسوزىن، ەستىردەي ەلەڭدەيدى قۇلاعىمىز
امال نە اسىل انا قيماساق تا،
ساعىنىپ كوزدەن اعار بۇلاعىمىز.
ەشقاشان ۇمىتپايمىز، اياۋلى انا
بەيىشتە بولسىن باقي تۇراعىڭىز!
قازاقستان ۇلتتىق مۇراعات قورىنىڭ قىزمەتكەرى
احات راسۋل
مەيىرىمدى مايرا اپاي
اتىراۋ جۇرتشىلىعى جانى جايساڭ جاقسى ادام مايرا گيلاەۆا اپامىزدى قادىر تۇتاتىن. ۋنيۆەرسيتەتتەگى ۇستازدىعى ءبىر بولەك، ادامشىلىعى ءبىر بولەك جانى جومارت اپامىز ەدى. اتىراۋ ۋنيۆەرسيتەتىن ۇزاق جىلدار باسقارعان رەكتور، بەلگىلى تاريحشى عالىم حيسمەت تابىلديەۆتىڭ جارى مايرا اپايدىڭ ءار ءىسى ونەگە، ۇلگى بولاتىن. حيسمەت اعانىڭ 80 جىلدىق مەرەيتويى قارساڭىندا كىتاپ شىعارۋ، ۇيىمداستىرۋ ىسىنە كومەك بەرگەن ەدىك. مايرا اپاي «مىناۋ فاريزانىڭ ەرتەرەكتە جىبەرگەن ولەڭى ەدى ماعان ارناعان، سونى كىتاپقا كىرگىزۋ كەرەك سياقتى» دەگەن ەدى. فاريزا اپايدىڭ ولەڭى مايرا اپايعا دەگەن ريزا كوڭىلدەن جازىلعان ەكەن.
مايرا گيلاەۆاعا
ايتقىزباي - اق ويىڭدى تۇسىنەتىن،
ازىلدەيتىن، الدىڭدا كىشىرەتىن.
جانى جۇمساق، جاراستى سۇلۋ مايرا
جايدارىسىڭ، جاقىنسىڭ كىسىگە تىم.
مايرا سەنسىڭ ۇلگى ەتەر ماقتانىمىز،
ەنەنى دە ماپەلەپ باپتادىڭىز.
قوس باتىردى مۇرا عىپ حيساعاعا
ءوزىن جىگىت قالپىندا ساقتادىڭىز.
اقىلدى ايەل...
ەرگە بەرگەن باعى عوي ءبىر اللانىڭ،
انا -تۇعىر ۇشىرار قىراندارىن.
حيساعانىڭ 60 جاس تويى كۇنى
مايرا ، ساعان العىس پەن جىر ارنادىم.
فاريزا وڭعارسىنوۆا
مايرا اپاي كىتاپتى كوپ وقيتىن جانە سوزگە ءمان بەرەتىن. ءار ءسوزدىڭ استارىنا ءۇڭىلىپ وتىراتىن. جاسى ۇلكەن بولسا دا كىشىرەيتپەي سىرلاسىپ، كەيدە اقىلىن ايتىپ، ازىلدەسىپ وتىراتىن. مەن ول كىسىگە «سىزگە ايەلدەردىڭ دانىشپانى» دەپ ات قويدىم دەسەم، مايرا اپاي كۇلەتىن دە قوياتىن. مەنىڭ اتىراۋعا بارعاندا ، امانداسىپ كەتەتىن جاقسى كورەتىن اپالارىمنىڭ ءبىرى -ءدىلدا اپاي بولسا، ەكىنشىسى مايرا اپاي بولاتىن.وكىنىشتىسى، ەندى ارامىزدا جوق. ەلاناسى اتانعان ءدىلدا اپاي دا، مەيىرىمدى مايرا اپاي دا ءومىر جولى ونەگەلى جاندار. مىنە مايرا اپاي دا كەلمەس كەرۋەنگە ىلەسىپ ،ارتىنا سونىلى-سوقپاقتى ءىز تاستاپ كەتە باردى. الدىنان جارىلقاسىن دەيمىز. ارتىندا قالعان ۇرپاقتارىنا قايعىرىپ كوڭىل ايتامىن.
اقىن، دراماتۋرگ، اۋدارماشى، پروزايك، ساتيريك -
ەرشۋ مارجان امانقوسقىزى
"ادىرنا" ۇلتتىق پورتالى
