وبلىس باسشىلىعى ارداقتى ارداگەرلەردىڭ شاڭىراعىنا بارىپ جۇرەكجاردى لەبىزىن ءبىلدىرىپ، سىي-قۇرمەت كورسەتتى.
وبلىس اكىمى ماحامبەت دوسمۇحامبەتوۆ ۇلى وتان سوعىسى ارداگەرلەرى ايدىن ايباروۆ، زاكاريا سۇلتانوۆ جانە كونتسلاگەر تۇتقىنى ەكاتەرينا ابساتىروۆانى ارنايى بارىپ، جەڭىس كۇنىمەن قۇتتىقتادى.
قازىرگى كۇردەلى ەپيدەميولوگيالىق جاعدايعا بايلانىستى جەڭىس كۇنىنە وراي وتەتىن ءداستۇرلى مەرەكەلىك شارالار كەلەسى جىلعا اۋىستىرىلدى. الايدا وبلىس باسشىلىعى ارداقتى ارداگەرلەردىڭ شاڭىراعىنا بارىپ جۇرەكجاردى لەبىزىن ءبىلدىرىپ، سىي-قۇرمەت كورسەتتى.
ادامزات تاريحىنداعى ەرەن ەرلىكتەرىڭىز بۇگىنگى بەيبىت ومىرىمىزگە، جارقىن بولاشاعىمىزعا جول اشتى. وسىناۋ ەرلىككە تولى كۇن تاريحىمىزدىڭ ماڭگىلىك ۇمىتىلماس پاراعى بولىپ قالا بەرەدى.جەڭىس مەرەكەسى قۇتتى بولسىن! دەنىڭىزگە ساۋلىق شاڭىراعىڭىزعا شاتتىق پەن باق-بەرەكە تىلەيمىن،- دەدى ءوڭىر باسشىسى.
قازىرگى كەزدە اتىراۋ وبلىسى بويىنشا ۇلى وتان سوعىسىنا قاتىسقان 2 ارداگەر عانا قالدى. ونىڭ ءبىرى – بيىل 100 جاسقا تولاتىن ايدىن ايباروۆ، ەكىنشى مايدانگەر زاكاريا سۇلتانوۆتىڭ جاسى – 96-دا.
ەلىمىز ءوسىپ – وركەندەپ، تاۋەلسىزدىگىمىز تۇعىرلى، بىرلىگىمىز بەكەم بولسىن. ەر جىگىت ەڭ الدىمەن ەلدىڭ قورعانى بولۋى كەرەك. ەندىگى كەزەكتە ەلدىڭ اماندىعى وسى جاستاردىڭ قولىندا. الەمدە سوعىس بولماسىن!، – دەدى سوعىس ارداگەرى زاكاريا سۇلتانوۆ.
ارداگەرلەردىڭ اۋلاسىنا ارنايى بارعان ۇرمەلى اسپاپتار وركەسترى سوعىس جىلدارىنداعى اندەردى شىرقاپ،مەرەكەلىك كوڭىل-كۇي سىيلادى.
ايتا كەتەيىك، وڭىردە ۇلى وتان سوعىسىنا قاتىسقان 2 ارداگەر مەن كونتسلاگەر تۇتقىنى ساناتىنا جاتاتىن ءبىر ادامعا 1 000 000 تەڭگەدەن قارجىلاي قولداۋ كورسەتىلگەن بولاتىن. ال جەڭىسكە ۇلەس قوسقان 45 تىل ەڭبەككەرى 100 000 تەڭگەدەن بىرجولعى اقشالاي كومەك الدى. ۇلى وتان سوعىسى جىلدارىندا جۇمىس جاساعان الايدا ناگرادتالماعان تىل ەڭبەكەرلەرى ياعني جەڭىسكە ۇلەس قوسقان تىل ەڭبەككەرلەرىنىڭ تاعى ءبىر توبىنا 1874 ادامعا – 30 000 تەڭگەدەن قارجىلاي كومەك بەرىلدى.
