جازدا كەز كەلگەن ادام كۇندەلىكتى قاربالاس تىرلىك پەن جۇمىستان ءبىر ءسات دامىل تاۋىپ، كەزەكتى ەڭبەك دەمالىسىن اسىعا كۇتەتىنى راس. وسىندايدا شەت ەلگە شىعىپ، ەل كورىپ، تەڭىز جاعالاۋىندا تىنىققاندى ءتاۋىر كورەدى. سونىمەن ءسىز قايدا بارىپ دەمالعىڭىز كەلەدى؟ قازىر قاي ەلدەرگە بارۋعا مۇمكىندىك بار؟ قانشا قارجى كەرەك؟ ءبىز وسى ساۋالدارعا جاۋاپ ىزدەپ كورگەن ەدىك...
بۇگىندە الەمدە كوپتەگەن ەل كارانتين شەكتەۋىن جەڭىلدەتىپ، شەتەلدىكتەر ءۇشىن شەكارالارىن اشىپ جاتىر. شەنگەن ۆيزالارىن بەرۋدى قالپىنا كەلتىرۋ كەڭىنەن تالقىلانۋدا. وسى ورايدا ءبىز قازاقستاندىقتار قازىر قانداي ەلدەرگە بارىپ دەمالا الاتىنى تۋرالى تارقاتىپ ايتىپ بەرسەك.
وسىعان دەيىن قازاقستان تۋروپەراتورلار قاۋىمداستىعىنىڭ پرەزيدەنتى يننا رەي قازىر قازاقستاندىقتارعا تۋريزم ءۇشىن تۇركيا، ءباا، مىسىر، شري-لانكا، وزبەكستان، قىرعىزستان، رەسەي، ۋكراينا، گرۋزيا، تاجىكستان، چەرنوگوريا، ارمەنيا، البانيا شەكاراسى اشىق ەكەنىن ايتقان بولاتىن.
بۇگىندە قر يندۋستريا جانە ينفراقۇرىلىمدىق دامۋ مينيسترلىگىنىڭ اقپاراتىنا سايكەس، قازىر قازاقستاندا حالىقارالىق رەيستەر اپتاسىنا 40 باعىت بويىنشا 13 ەلگە قاتىنايدى.
تاڭداۋ جانە مۇمكىندىك
بۇگىنگى كۇنى قازاقستاندىقتاردىڭ ەڭ كوپ باراتىن ەلدەرىنىڭ ءبىرى تۇركيانى الىپ قاراساق, بۇل ەلگە قازاقستاننان اپتاسىنا 12 رەيس جۇرەدى.
اتاپ ايتساق، نۇر-سۇلتان - ىستامبۇل باعىتى بويىنشا ەكى رەيس، الماتى - ىستامبۇل - ءتورت رەيس، الماتى - انتاليا - ەكى رەيس، شىمكەنت - ىستامبۇل - ەكى رەيس جانە تۇركىستان - ىستامبۇل ەكى رەيس ۇشادى. الداعى ۋاقىتتا اۋە رەيستەرىنىڭ سانىن ارتتىرۋ جوسپارلانۋدا.
بۇل ەلدە قازاقستاندىق ساياحاتشىلاردان ەلگە كەلگەننەن كەيىن كارانتين تالاپ ەتىلمەيدى. التى جاستان اسقان بارلىق جولاۋشى تۇركياعا كەلگەنگە دەيىن كەمىندە ءتورت كۇن بۇرىن «ساياحاتشىنىڭ كىرۋ فورماسىن» تولتىرۋى كەرەك. مۇنى ينتەرنەت ارقىلى جاساۋعا بولادى. تۋريستەردە COVID-19 تەستىنىڭ تەرىس ناتيجەسى بار مەديتسينالىق انىقتاما بولۋى كەرەك. تالداۋ ۇشقانعا دەيىن 72 ساعات بۇرىن جاسالۋى ءتيىس.
بۇعان دەيىن ەلدە كارانتين شارالارى قاتاڭ بولعانىمەن، تۇركيا بيلىگى جازعى تۋريستىك ماۋسىمعا دايىن ەكەنىن مالىمدەگەن بولاتىن.
تۇركيادان كەيىن قازاقستاندىقتار ءجيى باراتىن ەلدىڭ ءبىرى — بىرىككەن اراب امىرلىكتەرى. بۇل ەل مەن قازاقستان اراسىنا اپتاسىنا 31 رەيس جاسالادى: نۇر-سۇلتان - دۋباي باعىتى بويىنشا التى رەيس، الماتى - دۋباي — 10 رەيس، نۇر-سۇلتان - ابۋ-دابي جانە الماتى - ابۋ-دابي — 2 رەيستەن، الماتى - شاردجا — 3 رەيس، نۇر-سۇلتان، الماتى، شىمكەنت، اقتاۋ، اتىراۋ، اقتوبە، ورال جانە قاراعاندى قالالارىنان راس-ەل-حايماعا ءبىر رەيستەن ورىندالادى.
ءباا-گە ساپارعا شىققاندار وزىمەن بىرگە ۇشۋدان 72 ساعات بۇرىن تاپسىرىلعان COVID-19 ءۇشىن پتر-تەستىنىڭ تەرىس ناتيجەسى بار انىقتاما الۋ كەرەك. پتر-تەستىنىڭ ناتيجەسى اعىلشىن نەمەسە اراب تىلدەرىندە باسىلعان نۇسقادا ۇسىنىلۋى ءتيىس. قولمەن جازىلعان دەرەكتەرى بار انىقتامالار قابىلدانبايدى.12 جاسقا دەيىنگى بالالار، سونداي-اق اۋىر جانە ورتاشا مۇگەدەكتىگى بار ادامدار تەستتەن بوساتىلادى.
دۋبايدا ساياحاتشىلار كەلگەننەن كەيىن تاعى ءبىر COVID-19 پتر-تەستىن تاپسىرۋ قاجەت بولۋى مۇمكىن. بۇل جاعدايدا ولاردان تالداۋ ناتيجەلەرىن كۇتۋ ءۇشىن قىسقا مەرزىمدى كارانتيننەن ءوتۋ سۇرالادى. ەگەر تەست ناتيجەسى وڭ بولسا، تۋريست كەم دەگەندە 10 كۇن ىشىندە مەملەكەتتىك مەكەمەدە، اۋرۋحانادا، قوناقۇيدە نەمەسە جەكە تۇرعىن ۇيدە وقشاۋلانادى.
قازىرگى تاڭدا قازاقستاننان مىسىرعا اپتاسىنا ەكى رەيس جاسالادى: الماتى - شارم-ەل-شەيح جانە نۇر - سۇلتان - شارم-ەل-شەيح (ەكى رەيس-چارتەرلىك، ياعني ۇشاققا بيلەتتى تەك تۋرپاكەت قۇرامىندا ساتىپ الۋعا بولادى). ولاردى «ەير استانا» مەن SCAT ورىندايدى.
بۇل كۋرورتقا بارۋ ءۇشىن قازاقستاندىقتارعا ۆيزا قاجەت ەمەس. الايدا، ەگەر تۋريست شارم-ەل-شەيحتەن كەتىپ، ەلگە بارعىسى كەلسە، وندا ول كەلگەن كەزدە ۆيزا الۋ كەرەك بولادى. ونىڭ قۇنى — 25 دوللار (شامامەن 10 744 تەڭگە).
سونىمەن قاتار ماۋسىمنىڭ ەكىنشى جارتىسىنان باستاپ قازاقستاندىقتار ءۇشىن تاعى ءبىر باعىت - جەرورتا تەڭىزىنىڭ جاعالاۋىندا ورنالاسقان مىسىرلىق مەرسا-ماترۋح كۋرورت-قالاسى اشىلدى.
شري-لانكاعا بارۋ ءۇشىن قازاقستاندىقتارعا تۋراگەنتتىكتەر تىكەلەي ۇشۋ پاكەتتەرىن ۇسىنادى. بۇل ەلدە 7 ماۋسىمعا دەيىن تولىق لوكداۋن بولدى. دەگەنمەن قازىر
ساياحاتشىلار ارالدىڭ حالىقارالىق اۋەجايلارىنا بىرقاتار شەكتەۋدى ساقتاي وتىرىپ بارا الادى. ءاربىر رەيسكە تەك 75 جولاۋشى، ونىڭ ىشىندە ەل تۇرعىندارى مەن تۋريستەر جىبەرىلەدى. سونىمەن قاتار، بارلىق جولاۋشى ۆاكتسينالاۋدىڭ بولۋىنا قاراماستان پتر-تەستىن تاپسىرىپ، ەكى اپتالىق كارانتيننەن ءوتۋى كەرەك.
وزبەكستانعا ەلىمىزدەن اپتاسىنا 24 رەيس قاتىنايدى: نۇر-سۇلتان - تاشكەنت باعىتى بويىنشا التى رەيس، الماتى - تاشكەنت — 14 رەيس، اقتاۋ - ۇرگەنش — ءتورت رەيس. Uzbekistan Airways — 12 رەيس، «ەير استانا» - 10 رەيس، SCAT ەكى رەيس ورىندايدى. الداعى ۋاقىتتا تۇركىستاننان تاشكەنتكە اۋە رەيسى اشىلماق.
وزبەكستانعا بارعان بارلىق جولاۋشى ۇشۋعا دەيىن 72 ساعات بۇرىن الىنعان پتر-تەست تالداۋدىڭ تەرىس ناتيجەسى بار انىقتامانى (اعىلشىن نەمەسە ورىس تىلدەرىندە) ۇسىنۋى ءتيىس. قۇجات QR-كودتى قامتۋى ءتيىس نەمەسە زەرتحانانىڭ رەسمي مورىمەن جانە دارىگەردىڭ قولىمەن تۇپنۇسقادا ۇسىنىلۋى ءتيىس. پتر-تەست تاپسىرۋدان ەكى جاسقا دەيىنگى بالالار بوساتىلدى.
ال رەسەيگە قازاقستاننان اپتاسىنا 10 رەيس: نۇر-سۇلتان - ماسكەۋ باعىتى بويىنشا التى جانە الماتى - ماسكەۋ باعىتى بويىنشا ءتورت رەيس ۇشادى. «ەير استانا» مەن «اەروفلوت» اۋەكومپانيالارى بەس رەيستەن ورىندايدى.
رەسەيگە كەلەتىن قازاقستاندىقتار (ونىڭ ىشىندە بالالار) كەلگەنگە دەيىن كەمىندە كۇنتىزبەلىك ءۇش كۇن بۇرىن جاسالعان COVID-19 پتر-تەستىنىڭ تەرىس ناتيجەسىن راستايتىن انىقتامانى ورىس نەمەسە اعىلشىن تىلدەرىندە ۇسىنۋى ءتيىس. ەگەر بار بولسا، يممۋنوگلوبۋلين G (IgG) انتيدەنەلەرىنىڭ انىقتالعانىن راستايتىن مەديتسينالىق قۇجاتتاردى دا كورسەتۋگە بولادى.
ۋكرايناعا قازاقستاننان ءتورت رەيس: ۇشەۋى الماتى - كيەۆ باعىتى بويىنشا جانە بىرەۋى - نۇر-سۇلتان - كيەۆ باعىتى بويىنشا ورىندالادى. ولاردىڭ ۇشەۋىن «ەير استانا»، بىرەۋىن Sky Up ورىندايدى.
ەرەجەگە سايكەس، ۋكرايناعا كىرۋ ءۇشىن سىزدە ۋكراينادا تىركەلگەن ساقتاندىرۋ كومپانياسى بەرگەن ساقتاندىرۋ ءپوليسى (كۋالىك، سەرتيفيكات) بولۋى كەرەك، ول COVID-19 جۇقتىرىپ، اۋىرىپ قالعان جاعدايدا ەمگە، باقىلاۋعا بايلانىستى شىعىنداردى جابادى جانە ۋكراينادا بولۋ مەرزىمىندە جارامدى.
گرۋزياعا بارعىڭىز كەلسە، شەكارادان وتپەس بۇرىن ارنايى ەلەكتروندى ساۋالنامانى تولتىرۋ كەرەك، وندا سوڭعى 14 كۇندەگى ساياحات باعىتىن، سونداي-اق گرۋزياداعى تۇرعىلىقتى جەرى مەن بايلانىس مالىمەتتەرىن كورسەتۋ قاجەت.
ساياحاتشىلار شەكارادان وتكەنگە دەيىن 72 ساعات بۇرىن پتر-تەستىنىڭ تەرىس ناتيجەسى بار انىقتامانى ۇسىنۋى كەرەك. ال شەكارادان وتكەننەن كەيىنگى ءۇشىنشى كۇنى ءوز ەسەبىنەن پتر-تەستىلەۋدەن قايتا ءوتۋ كەرەك.
بۇگىندە قازاقستاننان گرۋزياعا الماتى - تبيليسي باعىتى بويىنشا «ەير استانا» اپتاسىنا ءۇش رەت رەيس جاسايدى. Fly Arystan التى رەيس: نۇر-سۇلتان - كۋتايسي، اقتاۋ - كۋتايسي، اتىراۋ - كۋتايسي باعىتتارى بويىنشا ەكى رەيس ورىندايدى.
ال چەرنوگوريا، البانيا، ارمەنياعا قازاقستان ازاماتتارىنىڭ كىرۋىنە ەشقانداي شەكتەۋلەر جوق. دەگەنمەن ساقتىق شارالارى ءۇشىن پتر-تەست تاپسىرىپ، دەنساۋلىقتى كۇتكەن دۇرىس.
سونداي-اق بيىل الەمدەگى ىندەتكە قاراماستان تايلاند بيلىگىنىڭ دە تۋريستەر ءۇشىن شەكارانى اشۋ جوسپارى بار. سوڭعى مالىمەتتەرگە سايكەس، پحۋكەت، سامۋي جانە پاتتايا شىلدە ايىنان باستاپ تۋريستەر ءۇشىن ايماقتاردى مەرزىمىنەن بۇرىن اشۋ جوسپارلارىن دايىندادى. ولار ۆاكتسينا سالدىرعان تۋريستەردى كارانتيننەن بوساتقىسى كەلەدى.
قاي ەلدە قانشا قارجىعا دەمالۋعا بولادى؟
جاز ايىندا قازاقستاندىقتارعا شەتەلدە دەمالۋى ءۇشىن ادام باسىنا شاققاندا شامامەن 400 مىڭ تەڭگە قارجىسى بولۋى كەرەك.
باە. بۇل ەلدە دەمالىس باعاسى 360 مىڭ تەڭگەدەن باستاپ، 600 مىڭ تەڭگەدەن اسادى. وسى اقشاعا كىرەتىنى: 7-10 كۇن 3-4 جۇلدىزدى وتەلدەردە تۇراقتاۋ. اس-سۋىڭىزدى ءوز اقشاڭىزعا الىپ ىشەسىز. سوندىقتان جولعا شىعار الدىندا، تاماق پەن ويىن-ساۋىققا كەتەر قوسىمشا شىعىندى ەسكەرۋ كەرەك. شوپينگ جوسپارلاعان تۋريستەر ءۇشىن ساۋدا ورتالىقتارىندا ماۋسىمدىق جەڭىلدىكتەر قاراستىرىلعان.
تۇركيا. باعا 280-900 مىڭ تەڭگە ارالىعىندا قۇبىلادى. ەڭ ارزانى – ءۇش جۇلدىزدى وتەلدە تاماقسىز تۇراقتاۋعا نەمەسە تەك ەرتەڭگى اس ىشۋگە بولادى. قىمباتىراق ۇسىنىستاردا بار، بارى قامتىلعان پاكەتىمەن بەس جۇلدىزدى وتەلدە جاقسى دەمالىپ قايتۋعا دا بولادى.
ەگيپەت. نەگىزىنەن 3-4 جۇلدىزدى وتەلدەردى ۇسىناتىن تۋرلار ساتىلىپ جاتىر. جول شىعىنى مەن 7-10 كۇنگە ورنالاسۋ قۇنى 365-430 مىڭ تەڭگەنى قۇرايدى.
باعاسى 1000 دوللاردان اساتىن دەمالىس ورىندارىنا مالديۆ ارالدارى، تايلاند، دومينيكان رەسپۋبليكاسى مەن شري-لانكا ارالى كىرەدى. اتالمىش ەلدەرگە بارۋ جانە ورنالاسۋ ورتاشا قۇنى ادام باسىنا شاققاندا – 0,8-1 ملن تەڭگە.
مالديۆ ارالدارى. بۇل كوروناۆيرۋس كەزىندە العاش اشىلعان تۋريستىك باعىتتاردىڭ ءبىرى. قاۋىپسىزدىك جانە سانيتارلىق شارالارىنىڭ جاقسى ساقتالۋى 2020 جىلدىڭ جازىنان بەرى وسى كۋرورتتى قازاقستاندىقتار اراسىندا تانىمال ەتكەن. مالديۆ ارالدارىنا اپاراتىن تۋر قۇنى وتەلدەردىڭ دارەجەسىنە جانە برون الۋ كۇنىنە قاراي 600 مىڭنان 2 ملن تەڭگەگە دەيىن قۇبىلادى.
تايلاند. پاتتايدا دەمالۋ، جول شىعىنى مەن سەگىز كۇن دەمالىستى قوسا العاندا 700-900 مىڭ تەڭگە كەتەدى. ال ارالداردا دەمالىس باعاسى قىمباتىراق، 1,5 ملن تەڭگەدەن باستالادى.
شري–لانكا. تۋر قۇنى – 600 مىڭ تەڭگەدەن 1,5 ملن تەڭگەگە دەيىن. بۇل سوماعا ەڭ جايلى جەردە ورنالاسۋعا بولادى، وعان تاڭعى اس جانە كەشكى اس كىرەدى.
گرۋزيا. تۋر قۇنى — 238 مىڭ تەڭگە. بۇل ەلدە 7 كۇن دەمالۋعا مۇمكىندىك بار.
چەرنوگوريا. تۋر قۇنى — 400 مىڭ-450 مىڭ تەڭگە. بۇل ەلدە دە 7-10 كۇن دەمالا الاسىز. بىراق بۇل سوماعا 3-4 جۇلدىزدى قوناق ۇيلەر كىرەدى.
ايتا كەتۋ كەرەك، بۇل كورسەتىلگەن باعالارعا تەك نۇر-سۇلتان، الماتى قالالارىنان ۇشۋ كەرەك. ەگەر ءسىز باسقا قالادا تۇرساڭىز، جولاقىسىنا قوسىمشا قاراجات قاجەت بولادى.
شەتەلگە بارىپ دەمالعىسى كەلگەن وقىرماندارىمىزعا ءساتتى جانە كەرەمەت دەمالىس تىلەيمىز.
داناگۇل بايمۇقاش،
«ادىرنا» ۇلتتىق پورتالى.
