Jazda kez kelgen adam kündelıktı qarbalas tırlık pen jūmystan bır sät damyl tauyp, kezektı eŋbek demalysyn asyǧa kütetını ras. Osyndaida şet elge şyǧyp, el körıp, teŋız jaǧalauynda tynyqqandy täuır köredı. Sonymen sız qaida baryp demalǧyŋyz keledı? Qazır qai elderge baruǧa mümkındık bar? Qanşa qarjy kerek? Bız osy saualdarǧa jauap ızdep körgen edık...
Bügınde älemde köptegen el karantin şekteuın jeŋıldetıp, şeteldıkter üşın şekaralaryn aşyp jatyr. Şengen vizalaryn berudı qalpyna keltıru keŋınen talqylanuda. Osy oraida bız qazaqstandyqtar qazır qandai elderge baryp demala alatyny turaly tarqatyp aityp bersek.
Osyǧan deiın Qazaqstan turoperatorlar qauymdastyǧynyŋ prezidentı İnna Rei qazır qazaqstandyqtarǧa turizm üşın Türkiia, BAÄ, Mysyr, Şri-Lanka, Özbekstan, Qyrǧyzstan, Resei, Ukraina, Gruziia, Täjıkstan, Chernogoriia, Armeniia, Albaniia şekarasy aşyq ekenın aitqan bolatyn.
Bügınde QR İndustriia jäne infraqūrylymdyq damu ministrlıgınıŋ aqparatyna säikes, qazır Qazaqstanda halyqaralyq reister aptasyna 40 baǧyt boiynşa 13 elge qatynaidy.
Taŋdau jäne mümkındık
Bügıngı künı qazaqstandyqtardyŋ eŋ köp baratyn elderınıŋ bırı Türkiiany alyp qarasaq, būl elge Qazaqstannan aptasyna 12 reis jüredı.
Atap aitsaq, Nūr-Sūltan - Ystambūl baǧyty boiynşa ekı reis, Almaty - Ystambūl - tört reis, Almaty - Antaliia - ekı reis, Şymkent - Ystambūl - ekı reis jäne Türkıstan - Ystambūl ekı reis ūşady. Aldaǧy uaqytta äue reisterınıŋ sanyn arttyru josparlanuda.
Būl elde qazaqstandyq saiahatşylardan elge kelgennen keiın karantin talap etılmeidı. Alty jastan asqan barlyq jolauşy Türkiiaǧa kelgenge deiın kemınde tört kün būryn «saiahatşynyŋ kıru formasyn» toltyruy kerek. Mūny internet arqyly jasauǧa bolady. Turisterde COVID-19 testınıŋ terıs nätijesı bar medisinalyq anyqtama boluy kerek. Taldau ūşqanǧa deiın 72 saǧat būryn jasaluy tiıs.
Būǧan deiın elde karantin şaralary qataŋ bolǧanymen, Türkiia bilıgı jazǧy turistık mausymǧa daiyn ekenın mälımdegen bolatyn.
Türkiiadan keiın qazaqstandyqtar jiı baratyn eldıŋ bırı — Bırıkken Arab Ämırlıkterı. Būl el men Qazaqstan arasyna aptasyna 31 reis jasalady: Nūr-Sūltan - Dubai baǧyty boiynşa alty reis, Almaty - Dubai — 10 reis, Nūr-Sūltan - Abu-Dabi jäne Almaty - Abu-Dabi — 2 reisten, Almaty - Şardja — 3 reis, Nūr-Sūltan, Almaty, Şymkent, Aqtau, Atyrau, Aqtöbe, Oral jäne Qaraǧandy qalalarynan Ras-el-Haimaǧa bır reisten oryndalady.
BAÄ-ge saparǧa şyqqandar özımen bırge ūşudan 72 saǧat būryn tapsyrylǧan COVID-19 üşın PTR-testınıŋ terıs nätijesı bar anyqtama alu kerek. PTR-testınıŋ nätijesı aǧylşyn nemese arab tılderınde basylǧan nūsqada ūsynyluy tiıs. Qolmen jazylǧan derekterı bar anyqtamalar qabyldanbaidy.12 jasqa deiıngı balalar, sondai-aq auyr jäne ortaşa mügedektıgı bar adamdar testten bosatylady.
Dubaida saiahatşylar kelgennen keiın taǧy bır COVID-19 PTR-testın tapsyru qajet boluy mümkın. Būl jaǧdaida olardan taldau nätijelerın kütu üşın qysqa merzımdı karantinnen ötu sūralady. Eger test nätijesı oŋ bolsa, turist kem degende 10 kün ışınde memlekettık mekemede, auruhanada, qonaqüide nemese jeke tūrǧyn üide oqşaulanady.
Qazırgı taŋda Qazaqstannan Mysyrǧa aptasyna ekı reis jasalady: Almaty - Şarm-el-Şeih jäne Nūr - Sūltan - Şarm-el-Şeih (ekı reis-charterlık, iaǧni ūşaqqa bilettı tek turpaket qūramynda satyp aluǧa bolady). Olardy «Eir Astana» men SCAT oryndaidy.
Būl kurortqa baru üşın qazaqstandyqtarǧa viza qajet emes. Alaida, eger turist Şarm-el-Şeihten ketıp, elge barǧysy kelse, onda ol kelgen kezde viza alu kerek bolady. Onyŋ qūny — 25 dollar (şamamen 10 744 teŋge).
Sonymen qatar mausymnyŋ ekınşı jartysynan bastap qazaqstandyqtar üşın taǧy bır baǧyt - Jerorta teŋızınıŋ jaǧalauynda ornalasqan mysyrlyq Mersa-Matruh kurort-qalasy aşyldy.
Şri-Lankaǧa baru üşın qazaqstandyqtarǧa turagenttıkter tıkelei ūşu paketterın ūsynady. Būl elde 7 mausymǧa deiın tolyq lokdaun boldy. Degenmen qazır
saiahatşylar araldyŋ halyqaralyq äuejailaryna bırqatar şekteudı saqtai otyryp bara alady. Ärbır reiske tek 75 jolauşy, onyŋ ışınde el tūrǧyndary men turister jıberıledı. Sonymen qatar, barlyq jolauşy vaksinalaudyŋ boluyna qaramastan PTR-testın tapsyryp, ekı aptalyq karantinnen ötuı kerek.
Özbekstanǧa elımızden aptasyna 24 reis qatynaidy: Nūr-Sūltan - Taşkent baǧyty boiynşa alty reis, Almaty - Taşkent — 14 reis, Aqtau - Ürgenş — tört reis. Uzbekistan Airways — 12 reis, «Eir Astana» - 10 reis, SCAT ekı reis oryndaidy. Aldaǧy uaqytta Türkıstannan Taşkentke äue reisı aşylmaq.
Özbekstanǧa barǧan barlyq jolauşy ūşuǧa deiın 72 saǧat būryn alynǧan PTR-test taldaudyŋ terıs nätijesı bar anyqtamany (aǧylşyn nemese orys tılderınde) ūsynuy tiıs. Qūjat QR-kodty qamtuy tiıs nemese zerthananyŋ resmi mörımen jäne därıgerdıŋ qolymen tüpnūsqada ūsynyluy tiıs. PTR-test tapsyrudan ekı jasqa deiıngı balalar bosatyldy.
Al Reseige Qazaqstannan aptasyna 10 reis: Nūr-Sūltan - Mäskeu baǧyty boiynşa alty jäne Almaty - Mäskeu baǧyty boiynşa tört reis ūşady. «Eir Astana» men «Aeroflot» äuekompaniialary bes reisten oryndaidy.
Reseige keletın qazaqstandyqtar (onyŋ ışınde balalar) kelgenge deiın kemınde küntızbelık üş kün būryn jasalǧan COVID-19 PTR-testınıŋ terıs nätijesın rastaityn anyqtamany orys nemese aǧylşyn tılderınde ūsynuy tiıs. Eger bar bolsa, immunoglobulin G (IgG) antidenelerınıŋ anyqtalǧanyn rastaityn medisinalyq qūjattardy da körsetuge bolady.
Ukrainaǧa Qazaqstannan tört reis: üşeuı Almaty - Kiev baǧyty boiynşa jäne bıreuı - Nūr-Sūltan - Kiev baǧyty boiynşa oryndalady. Olardyŋ üşeuın «Eir Astana», bıreuın Sky Up oryndaidy.
Erejege säikes, Ukrainaǧa kıru üşın sızde Ukrainada tırkelgen saqtandyru kompaniiasy bergen saqtandyru polisı (kuälık, sertifikat) boluy kerek, ol COVID-19 jūqtyryp, auyryp qalǧan jaǧdaida emge, baqylauǧa bailanysty şyǧyndardy jabady jäne Ukrainada bolu merzımınde jaramdy.
Gruziiaǧa barǧyŋyz kelse, şekaradan ötpes būryn arnaiy elektrondy saualnamany toltyru kerek, onda soŋǧy 14 kündegı saiahat baǧytyn, sondai-aq Gruziiadaǧy tūrǧylyqty jerı men bailanys mälımetterın körsetu qajet.
Saiahatşylar şekaradan ötkenge deiın 72 saǧat būryn PTR-testınıŋ terıs nätijesı bar anyqtamany ūsynuy kerek. Al şekaradan ötkennen keiıngı üşınşı künı öz esebınen PTR-testıleuden qaita ötu kerek.
Bügınde Qazaqstannan Gruziiaǧa Almaty - Tbilisi baǧyty boiynşa «Eir Astana» aptasyna üş ret reis jasaidy. Fly Arystan alty reis: Nūr-Sūltan - Kutaisi, Aqtau - Kutaisi, Atyrau - Kutaisi baǧyttary boiynşa ekı reis oryndaidy.
Al Chernogoriia, Albaniia, Armeniiaǧa Qazaqstan azamattarynyŋ kıruıne eşqandai şekteuler joq. Degenmen saqtyq şaralary üşın PTR-test tapsyryp, densaulyqty kütken dūrys.
Sondai-aq biyl älemdegı ındetke qaramastan Tailand bilıgınıŋ de turister üşın şekarany aşu jospary bar. Soŋǧy mälımetterge säikes, Phuket, Samui jäne Pattaiia şılde aiynan bastap turister üşın aimaqtardy merzımınen būryn aşu josparlaryn daiyndady. Olar vaksina saldyrǧan turisterdı karantinnen bosatqysy keledı.
Qai elde qanşa qarjyǧa demaluǧa bolady?
Jaz aiynda qazaqstandyqtarǧa şetelde demaluy üşın adam basyna şaqqanda şamamen 400 myŋ teŋge qarjysy boluy kerek.
BAE. Būl elde demalys baǧasy 360 myŋ teŋgeden bastap, 600 myŋ teŋgeden asady. Osy aqşaǧa kıretını: 7-10 kün 3-4 jūldyzdy otelderde tūraqtau. As-suyŋyzdy öz aqşaŋyzǧa alyp ışesız. Sondyqtan jolǧa şyǧar aldynda, tamaq pen oiyn-sauyqqa keter qosymşa şyǧyndy eskeru kerek. Şoping josparlaǧan turister üşın sauda ortalyqtarynda mausymdyq jeŋıldıkter qarastyrylǧan.
Türkiia. Baǧa 280-900 myŋ teŋge aralyǧynda qūbylady. Eŋ arzany – üş jūldyzdy otelde tamaqsyz tūraqtauǧa nemese tek erteŋgı as ışuge bolady. Qymbatyraq ūsynystarda bar, bärı qamtylǧan paketımen bes jūldyzdy otelde jaqsy demalyp qaituǧa da bolady.
Egipet. Negızınen 3-4 jūldyzdy otelderdı ūsynatyn turlar satylyp jatyr. Jol şyǧyny men 7-10 künge ornalasu qūny 365-430 myŋ teŋgenı qūraidy.
Baǧasy 1000 dollardan asatyn demalys oryndaryna Maldiv araldary, Tailand, Dominikan Respublikasy men Şri-Lanka araly kıredı. Atalmyş elderge baru jäne ornalasu ortaşa qūny adam basyna şaqqanda – 0,8-1 mln teŋge.
Maldiv araldary. Būl koronavirus kezınde alǧaş aşylǧan turistık baǧyttardyŋ bırı. Qauıpsızdık jäne sanitarlyq şaralarynyŋ jaqsy saqtaluy 2020 jyldyŋ jazynan berı osy kurortty qazaqstandyqtar arasynda tanymal etken. Maldiv araldaryna aparatyn tur qūny otelderdıŋ därejesıne jäne bron alu künıne qarai 600 myŋnan 2 mln teŋgege deiın qūbylady.
Tailand. Pattaida demalu, jol şyǧyny men segız kün demalysty qosa alǧanda 700-900 myŋ teŋge ketedı. Al araldarda demalys baǧasy qymbatyraq, 1,5 mln teŋgeden bastalady.
Şri–Lanka. Tur qūny – 600 myŋ teŋgeden 1,5 mln teŋgege deiın. Būl somaǧa eŋ jaily jerde ornalasuǧa bolady, oǧan taŋǧy as jäne keşkı as kıredı.
Gruziia. Tur qūny — 238 myŋ teŋge. Būl elde 7 kün demaluǧa mümkındık bar.
Chernogoriia. Tur qūny — 400 myŋ-450 myŋ teŋge. Būl elde de 7-10 kün demala alasyz. Bıraq būl somaǧa 3-4 jūldyzdy qonaq üiler kıredı.
Aita ketu kerek, būl körsetılgen baǧalarǧa tek Nūr-Sūltan, Almaty qalalarynan ūşu kerek. Eger sız basqa qalada tūrsaŋyz, jolaqysyna qosymşa qarajat qajet bolady.
Şetelge baryp demalǧysy kelgen oqyrmandarymyzǧa sättı jäne keremet demalys tıleimız.
Danagül BAIMŪQAŞ,
«Adyrna» ūlttyq portaly.
Ūqsas jaŋalyqtar
