اتىراۋ وبلىسى ەلىمىز بويىنشا «Kundelik.kz» ەلەكتروندى جۋرنالىن جۇيەلى تولتىرىپ جۇرگەن ۇزدىك ءۇش ءوڭىردىڭ قاتارىنان تابىلدى.
وسىعان وراي، نۇر-سۇلتان قالاسىنان ارنايى كەلگەن «كۇندەلىك» جاۋاپكەرشىلىگى شەكتەۋلى سەرىكتەستىگىنىڭ باسشىسى مۇقتار ءىلياسوۆ اتىراۋ وبلىسى اكىمىنىڭ ورىنباسارى باقىتگۇل حامەنوۆاعا «كۇمىس بەلگىنى» تابىس ەتتى. ءوز كەزەگىندە باقىتگۇل قايىرجانقىزى ءبىلىم ساپاسىن ارتتىرۋ باعىتىندا دا جوعارى كورسەتكىشتەرگە قول جەتكىزۋگە مول مۇمكىندىك پەن بارلىق جاعداي جاسالىپ وتىرعانىن اتاپ ءوتتى.
ايتا كەتەيىك، وبلىستا 197 مەكتەپتىڭ 184-ءى ەلەكتروندى جۋرنالمەن جۇمىس جاسايدى. ۇزدىكتەردى انىقتاۋ جوباسىن جۋرنال باسشىلىعى بيىل العاش رەت قولعا الىپ وتىر. ونىڭ ناتيجەسى اتىراۋ وبلىستىق ءبىلىم بەرۋ باسقارماسى ادىستەمەلىك ورتالىعىنىڭ الەۋمەتتىك جەلىلەرىنە جاريالانىپ، توقسان سايىن ۇزدىكتەر العىس حاتتارعا يە بولدى.
بۇدان بولەك، اتىراۋ وبلىستىق ۇلتتىق دارىندى بالالارعا ارنالعان ينتەرناتتىق مەكەمەسى بار گيمنازيادا وتكەن سالتاناتتى شارادا بىرقاتار مەكتەپ ۇستازدارى ماراپاتتالدى. اتاپ ايتقاندا، ساندىق تەحنولوگيالاردى پايدالانۋ ارقىلى ءبىلىم بەرۋدى جەتىلدىرۋدە جىل بويى كوش باستاعان توعىز مەكتەپ ۇجىمى ارنايى ديپلوم جانە ەستەلىك سىيلىقتارمەن ماراپاتتالدى. بۇل قاتاردا يساتاي ورتا مەكتەبى، ماحامبەت اۋدانىنان ە.اعەلەۋوۆ، جالعانساي، قوسارال، ق.احمەدياروۆ اتىنداعى، ماقاتتان ل.شاحاتوۆ جانە ا.قۇنانباەۆ اتىنداعى، يندەردەن «كوكتەم» قازاق مەكتەبى جانە جىلويدان №4 م.اۋەزوۆ اتىنداعى ءبىلىم ورداسى بار.
