ۇكىمەت مۇددەلى مەملەكەتتىك ورگاندارمەن جانە ۇيىمدارمەن بىرگە قازاقستاننىڭ قوي وسىرۋشىلەرى ۇلتتىق قاۋىمداستىعىنىڭ توراعاسى الماسبەك سادىرباەۆتىڭ ءتىرى ۇساق مالداردى ەكسپورتقا شىعارۋعا «تولىق تىيىم سالۋ» تۋرالى ۇسىنىسىن قاراعان بولاتىن.
وسى ماڭىزدى ماسەلە بويىنشا «ادىرنا» ۇلتتىق پورتالىنىڭ كەزەكتى سۇحباتى الماسبەك سادىرباەۆ مىرزامەن بولدى.
ءوزىڭىز ۇسىنىس تاستاعانداي، قوي ەكسپورتىنا تىيىم سالىنۋى مۇمكىن.
ال كەيبىر فەرمەرلەر وسى تىيىم سالۋدى قارجىلىق جاعدايعا كەرى اسەرىن تيگىزەدى دەپ جار سالۋدا.
-جالپى بۇل تىيىمنىڭ قانداي وڭ ءتۇيىنى بار؟
-ول فەرمەرلەردى دە تۇسىنۋگە بولادى. وڭاي كەزەڭ ەمەس. ونىڭ ۇستىنە مىنا پاندەميا جاعدايى دا كوڭىل كۇيدى باسىپ، شارۋاعا جاعالاسىپ تۇر. قىمباتشىلىق. وسى تۇرعىدان العاندا دالادا جۇرگەن شارۋانىڭ زارى ورىندى.
بىراق ءبىز ءبىر كۇندىگىمىزدى ەمەس، مىنا ءوسىپ كەلە جاتقان ۇرپاق قامىن دا تەرەڭنەن ويلاۋىمىز كەرەك.
ۋاقىت بۇل قۋاڭشىلىقپەن ءبىتىپ قالمايدى. الدا نە كۇتىپ تۇرعانىن كىم بىلگەن؟
سوندىقتان بۇل ماسەلەدە كەڭ كولەمدە ويلاپ، بىرىگۋ كەرەك.
-ءار جەردە ءار ءتۇرلى ستاتيستيكا كەلتىرىلۋدە. ءبىر تۇستا 15 ملن، ءبىر جەردە 20 ملن دەيدى. قازاقستاندا ناقتى قوي باسى قانشا؟
-20 دەپ ايتىلىپ ءجۇر. رەسمي ساندى اۋىلشارۋاشىلىق مينيسترلىگى ايتقانى دۇرىس شىعار. وسى ساندى پايدالانامىز قاجەت جاعدايدا. بىراق تىركەلمەگەن مال دا از ەمەس.
-قويعا مەملەكەتتىك قانداي قولداۋ باعدارلامالارى بار؟ سۋبسيديا دەڭگەيى، كولەمى؟
-مەملەكەتتىڭ ارنايى كومپانيالار ارقىلى قولداۋ باعدارلامالارى بار.
سىباعا، تاعى دا بىرنەشە، ءدال قازىر ۇمىتىپ تۇرمىن. بىراق ناتيجە كوڭىل كونشىتپەيدى.
اگروساياسات ىسىندە قيسىق جازىلىپ كەتكەن تاراۋلار از ەمەس. قاراپايىم شارۋالارعا مەملەكەت كومەگى جەتە بەرمەيدى.
-قۋاڭشىلىق ەلىمىزدىڭ بارلىق وڭىرىندە بوي كورسەتۋى مۇمكىن بە؟
-ءيا، ابدەن ىقتيمال. سوناۋ سارىاعاشتا جىلقىنىڭ تەزەگىن جەپ جاتقان ءىرى قارانى كورىپ شوشىدىق.
شىعىس قازاقستاندا دا سۋ ماسەلەسى كۇن تارتىبىندە تۇر. جۇت جەتى اعايىندى دەيدى. بۇدان دا قيىن كەزەڭدەرگە دايىندالۋىمىز كەرەك.
-توقتاتۋدىڭ قانداي تاسىلدەرى قاراستىرىلىپ جاتىر؟
تاسىلدەرى وتە قاراپايىم. بىراق تابيعاتتىڭ ىسىنە قالاي قارسى تۇرامىز؟
جالپى ءبىزدىڭ شارۋالاردىڭ ءبىلىمىن، مال باعۋ ىسىندەگى تاجىريبەسىن شىڭداۋىمىز كەرەك.
-ماڭعىستاۋعا ساپارىڭىز قانداي ساپالى جوسپارعا تولى؟
كومەك ءھام ماقسات قانداي؟
-ماڭعىستاۋ ساپارىندا مالشىلارمەن جولىعىپ، سولتۇستىككە كوشىپ بارۋ ماسەلەسىندە ءتۇسىندىرۋ جۇمىستارى جۇرگىزەمىن.
ەكىنشىدەن، تانىمدىق سەمينار ساباقتارىمدى ۇيىمداستىرامىن.
شارۋاشىلىقتاردى ارالاپ، باعىت باعدار بەرەمىن. الداعى ايلاردا اتقارىلۋى ءتيىس ماسەلەلەردى قارايمىز،
ۇكىمەتكە ءالى دە بولسا جەتپەي جاتقان جايتتاردى ايتامىن.
ايتا كەتەيىن، الداعى ۋاقىتتا وسى ماسەلەلەر اسقار ءماميننىڭ قاتىسۋىمەن قارالادى.
اكىمدەرگە تالاپ كۇشەيەدى.
سۇحباتىڭىزعا راقمەت!
ءىنجۋ ومىرزاق،
"ادىرنا" ۇلتتىق پورتالى
