ءۇندىستاننىڭ ۇلتتىق ۆيرۋسولوگيا ينستيتۋتىنىڭ عالىمدارى العاش رەت نيپاح ۆيرۋسىن ماحاراشترا شتاتىنان انىقتادى. ۆيرۋستىڭ تاسىمالداۋشىسى جارقاناتتار بولىپ وتىر، دەپ حابارلايدى «ادىرنا» ءتىلشىسى ريا نوۆوستي-گە سىلتەمە جاساپ.
“ادەتتە ۇشاتىن تۇلكىلەر مەن تىشقانداردا كەزدەسەتىن ۆيرۋسقا دۇنيەجۇزىلىك دەنساۋلىق ساقتاۋ ۇيىمى «ەڭ قاۋىپتى» دەگەن باعا بەرەدى. قازىرگى ۋاقىتتا ىندەتكە قارسى ءدارى دە، ۆاكتسينا دا جوق. ال ونىڭ ءولىم دەڭگەيى 40 %-دان 75% - عا دەيىن جەتەدى»،– دەلىنگەن «ينفەكتسيالار جانە دەنساۋلىق ساقتاۋ» جۋرنالىندا جاريالاعان ماقالادا.
ايتا كەتەيىك،بۇعان دەيىن ءۇندىستاندا وسى اۋرۋدىڭ ءتورت وشاعى انىقتالعان ەدى. نيپاح ۆيرۋسى العاش رەت 2001 جانە 2007 جىلدارى باتىس بەنگاليادا تىركەلدى.
«ادىرنا» ۇلتتىق پورتالى
