ءۇندىستان دارىگەرلەرى «قارا زەڭ» (مۋكورميكوز) اۋرۋىنىڭ 40,8 مىڭنان اسا جاعدايىن انىقتادى. بۇل تۋرالى دەنساۋلىق ساقتاۋ ءمينيسترى حارش ۆاردحان مالىمدەدى، دەپ حابارلايدى «ادىرنا» ۇلتتىق پورتالى Tengrinews.kz سايتىنا سىلتەمە جاساپ.
ءمينيستردىڭ ايتۋىنشا، ەلدە بارلىعى 40 845 جاعداي تىركەلگەن. بۇل رەتتە 31 344 ناۋقاستا مۇرىن، مۇرىننىڭ قوسالقى قۋىستارى جانە ميدىڭ ءبىر بولىگى زاقىمدانعان.
مينيستر جاعدايدىڭ 32 پايىزى 18 بەن 45 جاس ارالىعىنداعى توپتا تىركەلگەنىن ايتتى. تاعى 42 پايىزى - 45 پەن 60 جاس ارالىعىنداعى توپ. ال 24 پايىزى - 60 جاستان اسقان قارتتار. «قارا زەڭ» جۇقتىرعانداردىڭ 64 پايىزى ديابەتپەن اۋىراتىنى بەلگىلى بولدى، ال 53 پايىزى ستەرويدتى پرەپاراتتار قابىلدايتىندار، دەدى مينيستر.
كەزدەسۋ بارىسىندا ICMR باس ديرەكتورى بالرام بحارگاۆا كوروناۆيرۋس ينفەكتسياسىنىڭ ەكىنشى تولقىنى ءالى دە حالىققا قاۋىپ توندىرەتىنىن اتاپ ءوتتى. ينفەكتسيانىڭ ەڭ كوپ جاعدايى ماحاراشترا، كەرالا، تاميلناد، باتىس بەنگاليا جانە وديشا شتاتتارىندا انىقتالعان.
مۋكورميكوز - ساڭىراۋقۇلاق اۋرۋى. ايتا كەتەيىك، «قارا زەڭ» تەرىنىڭ جانە ىشكى اعزالاردىڭ زاقىمدالۋىمەن سيپاتتالادى، سالدارى ولىمگە اكەلۋى مۇمكىن.
"ادىرنا" ۇلتتىق پورتالى
