لوندوننىڭ باتىسىنداعى كەنسينگتون باعىندا كوپشىلىكتىڭ سۇيىكتىسى بولعان ديانا حانشايىمنىڭ ءمۇسىنى قويىلدى. ەسكەرتكىشتى حانشايىمنىڭ ۇلدارى — كنيازدار ۋيليام مەن گارري اشتى دەپ حابارلايدى "ادىرنا" ۇلتتىق پورتالى "ريا نوۆوستيگە" سىلتەمە جاساپ.
حانشايىمنىڭ 60 جىلدىعىنا وراي ءراسىم كەنسينگتون سارايىنىڭ جانىندا ورنالاسقان سانكەن باعىنىڭ قۇپيا باقشاسىندا وتكەن. وعان كنيازداردان باسقا ديانا وتباسىنىڭ مۇشەلەرى، ءمۇسىنشى يان رانك-برودلي، لاندشافت ديزاينەرى پيپ مورريسون جانە ەسكەرتكىشتىڭ قامقورشىلىق كوميتەتىنىڭ مۇشەلەرى قاتىسقان. ەسكەرتكىشتىڭ اشىلۋىندا حانزادا چارلز بولماعان.
ءمۇسىننىڭ اشىلۋىمەن بىرگە كورەرمەندەرگە مورريسون قۇرعان، حانشايىمعا ارنالعان جاڭارتىلعان مەموريالدى باق ۇسىنىلعان. "Sunken Garden" باعى ديانا حانشايىمنىڭ كەنسينگتون سارايىنداعى سۇيىكتى ورىندارىنىڭ ءبىرى بولعان. قازىر مۇندا حانشايىمنىڭ سۇيىكتى گۇلدەرى، سونىڭ ىشىندە راۋشان گۇلدەرى، قىزعالداقتار، Dahlias جانە لاۆاندا گۇلدەيدى. باقتى جاساقتاۋ 2019 جىلدىڭ قازان ايىندا باستالعان. جانە ونى ۇلىبريتانيا كورول سارايلارى مەن باقشالارىنىڭ باستىعى گرەم ديللامور باستاعان بەس باعبان جاساقتاعان. مىڭ ساعاتتىق جۇمىس ۋاقىتى ىشىندە باعباندار 4 مىڭ گۇل ەككەن.
ۋيليام مەن گارري ديانا حانشايىمنىڭ ءمۇسىنىن جاساۋعا 2017 جىلى تاپسىرىس بەرگەن. ءمۇسىننىڭ اۆتورى - بريتاندىق رەنك-برودلي. ءمۇسىندى ورناتۋ كوروناۆيرۋستىق پاندەمياعا بايلانىستى كەشىكتىرىلگەن.
ايتا كەتۋ كەرەك، حانشايىم ديانا — ۋەلدىق چارلز حانزادانىڭ، بريتاندىق تاق مۇراگەرىنىڭ العاش ايەلى. 2002 جىلعى "بي-بي-سي" كومپانياسىنىڭ جۇرگىزگەن ساۋالناماسى بويىنشا ديانا تاريحتاعى ەڭ ۇلى بريتاندىقتار تىزىمىندە ءۇشىنشى ورىنعا يە بولعان. ول 1997 جىلى 31 تامىزدا 36 جاسىندا پاريجدە جول اپاتىنان كوز جۇمدى.
"ادىرنا" ۇلتتىق پورتالى.
