بۇگىن ەلىمىز ەڭ ماڭىزدى مەرەكەلەردىڭ ءبىرى – ۇستازدار كۇنىن اتاپ وتۋدە.
مەملەكەت باسشىسى قاسىم-جومارت توقاەۆ: «ۇستازىن ۇلىقتاعان ەلدىڭ ۇرپاعى سانالى، بولاشاعى جارقىن بولارى حاق»، – دەگەن بولاتىن. ەل پرەزيدەنتى كەز كەلگەن قوعامنىڭ كەمەلدىگى، وركەنيەتتىلىگى ۇستازعا دەگەن قاتىناسىمەن ولشەنەتىنىن ۇنەمى ايتىپ كەلەدى.
ادىلەتتى قازاقستاننىڭ بولاشاعى ءبىلىمدى، ەركىن ويلايتىن، جاۋاپكەرشىلىكتى ازاماتتارعا بايلانىستى. ال ءار بالانىڭ تالابىن بايقاپ، بىلىمگە قۇشتارلىعىن وياتاتىن، ەڭبەك پەن ادامگەرشىلىكتىڭ قادىرىن ۇيرەتەتىن – ۇستاز. ونەرگە كەلگەن ءار جاستىڭ دا كەيىنگى بارلىق جەتىستىكتەرىنىڭ ارتىندا تالماي باپتاعان تالىمگەردىڭ ەڭبەگى تۇرادى.
مادەنيەت جانە اقپارات مينيسترلىگىنە قاراستى 10 ءبىلىم بەرۋ ۇيىمى جۇمىس ىستەيدى. بۇگىندە وسى ءتورت جوعارى وقۋ ورنى، ءتورت كوللەدج جانە دارىندى بالالارعا ارنالعان ەكى مەكتەپ-ينتەرناتتا 11 136 وقۋشى مەن ستۋدەنت ءبىلىم الىپ ءجۇر. وسى وقۋ جىلىندا تاعى 3 662 جاس قابىلداندى. ولارعا 3 303 وقىتۋشى مەن پەداگوگ ءتالىم بەرەدى. مەكتەپتەر مەن كوللەدجدەردە ەڭبەك ەتەتىن 316 ۇستاز پەداگوگ-زەرتتەۋشى جانە پەداگوگ-شەبەر ساناتتارىنا يە.
بيىل كاسىبي مەرەكەگە وراي مادەنيەت سالاسىنداعى ءبىلىم بەرۋ ۇيىمدارىندا ەڭبەك ەتىپ، ەلەۋلى جەتىستىكتەرگە قول جەتكىزگەن 25 پەداگوگ وقۋ-اعارتۋ مينيسترلىگىنىڭ ۆەدومستۆولىق ناگرادالارعا يە بولدى. ولاردىڭ بەسەۋى «ەڭبەك ارداگەرى» مەدالىمەن، تورتەۋى ى. التىنسارين اتىنداعى مەدالمەن، توعىزى ء«بىلىم بەرۋ سالاسىنىڭ ۇزدىگى» توسبەلگىسىمەن، جەتەۋى قۇرمەت گراموتاسىمەن ماراپاتتالدى. سونداي-اق 38 پەداگوگقا مادەنيەت جانە اقپارات مينيسترلىگىنىڭ ۆەدومستۆولىق ناگرادالارى تاپسىرىلدى.
ۇستازدار كۇنىنە وراي ەلىمىزدىڭ بارلىق ۇستازدارىن، ءبىلىم سالاسىنىڭ قىزمەتكەرلەرى مەن ارداگەرلەرىن كاسىبي مەرەكەمەن شىن جۇرەكتەن قۇتتىقتايمىز! سىزدەرگە مىقتى دەنساۋلىق، وتباسىلارىڭىزعا اماندىق، ۇلاعاتتى جولداعى ەڭبەكتەرىڭىزگە تولايىم تابىس تىلەيمىز!
