قازاقستاندا ءبىلىم گرانتتارىن تاعايىنداۋ كونكۋرسىنا قاتىسۋ ءۇشىن قۇجاتتاردى قابىلداۋ 16 شىلدەدە باستالادى، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى ءبىلىم جانە عىلىم مينيسترلىگىنىڭ حابارلاۋىنشا، قابىلداۋ ەلەكتروندى تۇردە جۇزەگە اسىرىلادى.
ۋنيۆەرسيتەتتەردە تالاپكەرلەرگە بەينە بايلانىس ارقىلى كەڭەس بەرەتىن ۆيرتۋالدى قابىلداۋ بولىمدەرى دە بولادى. ۇمىتكەرلەر كونكۋرسقا 6 مامىر مەن 1 شىلدە ارالىعىندا وتكەن ۇبت-نىڭ ەكى ناتيجەسىنىڭ بىرەۋىمەن قاتىسا الادى، دەپ حابارلادى ءباسپاسوز قىزمەتى.
ءوتىنىش بەرگەن كەزدە ءوتىنىش بەرۋشىلەر سەرتيفيكاتتىڭ ەلەكتروندىق كوشىرمەلەرىن، سەرتيفيكاتقا قوسىمشالاردى جانە ەلەكتروندى قۇجات تۇرىندەگى 3 × 4 ساندىق فوتوسۋرەتتى، سونداي-اق باسقا راستايتىن قۇجاتتاردىڭ كوشىرمەلەرىن قوسا تىركەۋى كەرەك.
ەگەر ءوتىنىش بەرۋشى «التىن بەلگى» يەگەرى بولسا نەمەسە كورسەتىلگەن پاتريوتيزم مەن بەلسەندى ازاماتتىق پوزيتسياسى ءۇشىن ايرىقشا بەلگىسىمەن ماراپاتتالعان بولسا، وندا ول ۇپاي تەڭدىگى جاعدايىندا باسىم قۇقىققا يە بولادى. وليمپيادا مەن سپورتتىق جارىستاردىڭ جەڭىمپازدارى دا وسىنداي ارتىقشىلىققا يە. وسىنداي جەتىستىكتەردى ەسكەرۋ ءۇشىن قۇجاتتاردى تاپسىرۋ كەزىندە راستايتىن قۇجاتتاردىڭ كوشىرمەلەرىن قوسا بەرۋ قاجەت.
ەگەر شەت ءتىلىن بىلەتىندىگىن راستايتىن حالىقارالىق سەرتيفيكات بولسا، ءوتىنىش بەرۋشى حالىقارالىق ءتىل سەرتيفيكاتىنىڭ اتىن، بالىن كورسەتىپ، ەلەكتروندى سەرتيفيكاتىن قوسا بەرەدى.
ايتا كەتۋ كەرەك، بيىل ءبىلىم گرانتتارىن ءبولۋ كەزىندە قازاقستان رەسپۋبليكاسى ءبىلىم جانە عىلىم مينيسترلىگى العاش رەت حالىقتىڭ الەۋمەتتىك وسال توپتارىنا كۆوتا ءبولدى.
ۇبت-دان كەمىندە 65 بالل جيناعان تالاپكەرلەر ۇلتتىق ۋنيۆەرسيتەتتەرگە گرانتقا تۇسە الادى.
«پەداگوگيكا عىلىمدارى» - 75 باللدان كەم ەمەس، «دەنساۋلىق ساقتاۋ» - 70 باللدان، «اۋىل شارۋاشىلىعى جانە بيولوگيالىق رەسۋرستار»، «ۆەتەريناريا» - 60 باللدان، باسقا جوعارى وقۋ ورىندارىنا - 50 باللدان كەم ەمەس. بۇل رەتتە ۇبت جانە (نەمەسە) شىعارماشىلىق ەمتيحاننىڭ ءار ءپانى ءۇشىن كەمىندە بەس بالل جيناۋ قاجەت.
"ادىرنا" ۇلتتىق پورتالى
