جامبىل وبلىسىندا كامەلەتكە تولماعان بالانى ءوز-وزىنە قول جۇمساۋعا دەيىن جەتكىزۋ دەرەگى بويىنشا ءۇش ادامعا قاتىستى سوت ۇكىمى شىقتى. بۇل تۋرالى وبلىستىق پروكۋراتۋرا مالىمدەدى، دەپ حابارلايدى “ادىرنا”.
تەرگەۋ بارىسىندا 7–11 سىنىپ وقۋشىلارى اراسىندا بەيرەسمي كوشباسشىلاردىڭ پايدا بولىپ، «كوشەلىك تارتىپپەن ءومىر ءسۇرۋ» ۇستانىمدارىنىڭ قالىپتاسقانى انىقتالعان. مۇنداي قۇبىلىس كەي جاعدايدا جاسوسپىرىمدەر اراسىندا قالىپتى جاعداي رەتىندە قابىلداناتىنى بەلگىلى بولدى.
"قايعىلى وقيعانىڭ سەبەپتەرى رەتىندە "ۇلكەندەر" تاراپىنان جۇيەلى تۇردە قورقىتۋ، پسيحولوگيالىق قىسىم كورسەتۋ جانە ەڭبەككە ماجبۇرلەۋ فاكتىلەرى انىقتالدى.
اتاپ ايتقاندا، قايعىلى وقيعاعا دەيىنگى سوڭعى كۇندەرى كامەلەتكە تولماعان ءجاسوسپىرىم جاستار اراسىندا "اۆتوريتەت" رەتىندە تانىلعان جوعارىدا كورسەتىلگەن ازاماتتىڭ ۇيىندە ءماجبۇرلى تۇردە قۇرىلىس جۇمىستارىن اتقارعان", - دەلىنگەن حاباردا.
قۇزىرلى ورگان اقپاراتىنشا، اۋىلدىڭ 22 جاستاعى تۇرعىنى، سونداي-اق 10-11 سىنىپتىڭ ەكى وقۋشىسى كۇدىكتى رەتىندە تانىلعان.
جامبىل وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ ۇكىمىمەن ولار كامەلەتكە تولماعان بالانى وزىنە-ءوزى قول سالۋعا دەيىن جەتكىزگەنى ءۇشىن كىنالى دەپ تانىلعان.
"نەگىزگى ورىنداۋشىعا 8 جىل باس بوستاندىعىنان ايىرۋ جازاسى تاعايىندالسا، ال ونىڭ كامەلەتكە تولماعان ەكى سىبايلاسىنىڭ ارقايسىسىنا 5 جىلدان باس بوستاندىعىنان ايىرۋ جازاسى تاعايىندالدى", - دەلىنگەن اقپاراتتا.
ۇكىم زاڭدى كۇشىنە ەنگەن جوق.
