قازاقستاندا بيىل توعىز ايدىڭ ىشىندە 139 ءجاسوسپىرىم سۋيتسيد جاساپ، كوز جۇمعان، دەپ حابارلايدى "ادىرنا" ۇلتتىق پورتالى.
بۇل تۋرالى ىشكى ىستەر ءمينيسترىنىڭ ورىنباسارى سانجار ءادىلوۆ حابارلادى.
«توعىز ايدىڭ ىشىندە كامەلەتكە تولماعاندار اراسىندا 432 سۋيتسيد تىركەلدى. ونىڭ 139-ى – ولىممەن اياقتالعان، 293-ءى – ءوز-وزىنە قول جۇمساۋعا تالپىنىس جاعدايى»، – دەدى ءادىلوۆ دۇيسەنبى كۇنى ءىىم كۋلۋارىندا.
ۆيتسە-ءمينيستردىڭ ايتۋىنشا، ءىىم جاسوسپىرىمدەر اراسىنداعى سۋيتسيد سەبەپتەرىنە تالداۋ جۇرگىزىپ، نەگىزگى سەبەپ – وتباسى ىشىندەگى جانجال ەكەنىن انىقتاعان. تاڭعالارلىعى، كوز جۇمعانداردىڭ 62%-ى تولىق ءارى ماتەريالدىق جاعدايى جاقسى وتباسىلاردان شىققان.
ء«بىز انىقتاعان بىرنەشە سەبەپ بار: بۇل – قايتارىمسىز ماحاببات، سونداي-اق اتا-انانىڭ ۇزاق ۋاقىت تەلەفون قولدانۋعا تىيىم سالۋى سياقتى جاي عانا فاكتورلار دا تۇرتكى بولۋى مۇمكىن. وكىنىشكە قاراي، جالپى ديناميكا بويىنشا سۋيتسيد كورسەتكىشى ءسال دە بولسا ءوسىپ وتىر»، – دەدى سانجار ءادىلوۆ.
ءىىم مالىمەتىنشە، بالالار اراسىنداعى سۋيتسيد ماسەلەسى قوعامدىق قاۋىپسىزدىك تۇجىرىمداماسى اياسىندا باسىم باعىتتاردىڭ ءبىرى رەتىندە قارالۋى ءۇشىن مينيسترلىك ءبىلىم جانە دەنساۋلىق ساقتاۋ مينيسترلىكتەرىنە ءتيىستى ۇسىنىس جولداعان.
