اتىراۋ وبلىسىنىڭ يساتاي اۋدانىنداعى تۇششىقۇدىق اۋىلىندا جوعالىپ كەتكەن ءۇش جانە ءتورت جاستاعى ەكى بالا تابىلدى، دەپ حابارلايدى "ادىرنا" ۇلتتىق پورتالى.
الدىن الا مالىمەتكە سايكەس، وقيعا 17 شىلدە كۇنى كەشكى ۋاقىتتا بولعان. بالالاردىڭ جوعالعانى تۋرالى حابار تۇسكەننەن كەيىن ولاردى ىزدەۋگە پوليتسيا قىزمەتكەرلەرى، توتەنشە جاعدايلار قىزمەتىنىڭ ماماندارى مەن اۋىل تۇرعىندارى جۇمىلدىرىلدى.
باستاپقى مالىمەت بويىنشا، بالالاردى اۋىلدىڭ 25 جاستاعى تۇرعىنى وزىمەن بىرگە الىپ كەتكەن. كۋاگەرلەردىڭ ايتۋىنشا، ول بۇلدىرشىندەرگە بالمۇزداق الىپ بەرەتىنىن ايتىپ، ەرتىپ كەتكەن. ىزدەستىرۋ جۇمىستارىنىڭ ناتيجەسىندە شامامەن ءۇش ساعاتتان كەيىن ەكى بالا دا امان-ەسەن تابىلدى. كۇدىكتى ۇستالىپ، اۋداندىق پوليتسيا بولىمىنە جەتكىزىلدى.
الەۋمەتتىك جەلىلەردە كۇدىكتىنىڭ پسيحيكالىق دەرتكە شالدىققانى تۋرالى اقپارات تاراعانىمەن، بۇل مالىمەتتى قۇزىرلى ورگاندار رەسمي تۇردە راستاعان جوق.
