ماڭعىستاۋ وبلىستىق كوپسالالى بالالار اۋرۋحاناسىندا «ءسابي» قايىرىمدىلىق قورى سالعان شۇعىل بالالار حيرۋرگياسىنىڭ جاڭا ۋلترا-زاماناۋي ءبولىمى اشىلدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
اقتاۋداعى شۇعىل بالالار حيرۋرگياسى باعدارلاماسى «ءسابي» قورىنىڭ اياسىنداعى ەڭ ءىرى جوبا، ونى ىسكە اسىرۋعا 306 ميلليون تەڭگە جۇمسالعان. حالىقارالىق دەڭگەيدە زاماناۋي ۇلگىدەگى يننوۆاتسيالىق قۇرىلعىلار مەن اپپاراتتارمەن جابدىقتالعان بۇل بولىمشە بۇگىندە مىڭداعان بالالاردىڭ ءومىرىن ساقتايتىن ورتالىققا اينالدى.
سوڭعى ۇلگىدەگى مەديتسينالىق قۇرال-جابدىقتار، سونىڭ ىشىندە كوپ پارامەترلى پاتسيەنتتىڭ مونيتورى، ەلەكتروكارديوگراف، ۋلترادىبىستىق دياگنوستيكالىق جۇيە، لارينگوسكوپ، جەلدەتكىش جانە گازبەن قامتاماسىز ەتەتىن جانە مەديتسينالىق مەكەمەدەگى ستەريلدى جاعدايلاردى قامتاماسىز ەتەتىن ارنايى جابدىقتار ساتىپ الىندى.
جوعارى تەحنولوگيالىق وپەراتسيالىق قوندىرعىنى جانە جاس پاتسيەنتتەرگە ارنالعان ىڭعايلى بولىمدەردى تولىقتاي جابدىقتاۋدان باسقا، قور ەمدەۋ جىلدامدىعىن ارتتىرۋ ماقساتىندا اۋرۋحانادا قوسىمشا جوندەۋ-قۇرىلىس جۇمىستارىن جۇرگىزدى. دارىگەرلەرگە نوۋتبۋكتار، امبۋلاتوريالىق تىركەۋ جۇيەسى، Smart TV جانە كەڭسە جيھازدارى ساتىپ الىندى.
«ءبىزدىڭ جوبانىڭ باستى ماقساتى – بۇكىل قالاعا جانە جاقىن ەلدى مەكەندەرگە قىزمەت كورسەتەتىن ءبىر عانا بالالار اۋرۋحاناسى بار ايماقتارداعى مەديتسينالىق قىزمەتتەردىڭ ساپاسىن ارتتىرۋ بويىنشا جۇيەلى شارالار جاساۋ. جاعداي قاجەتتى قۇرال-جابدىقتاردىڭ جەتىسپەۋشىلىگىنەن كۇردەلەنە تۇسەدى، ال جەدەل مەديتسينالىق كومەكتىڭ جەتىلدىرىلگەن جۇيەسى، ونىڭ ورتالىعىندا شۇعىل حيرۋرگيا پاتسيەنتتەردىڭ ءومىرىنىڭ قاۋىپسىزدىگىن قامتاماسىز ەتەدى»، – دەيدى «ءسابي» قايىرىمدىلىق قورىنىڭ پرەزيدەنتى اسەل تاسماعامبەتوۆا.
"ادىرنا" ۇلتتىق پورتالى.
