اقتوبە وبلىسىنا ىسساپارمەن كەلگەن قر دەنساۋلىق ساقتاۋ ءمينيسترى الەكسەي تسوي كوروناۆيرۋس ينفەكتسياسىنا قارسى شتابتىڭ وتىرىسىن وتكىزدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
— بۇگىنگى جاعدايعا بايلانىستى ۇيىمداسقان-ادىستەمەلىك كومەك كورس ەتۋ ءۇشىن وڭىرگە دەنساۋلىق ساقتاۋ مينيسترلىگىنىڭ جۇمىس توبى كەلىپ وتىرمىز. ءبىزدىڭ مىندەتىمىز — بارلىق وزەكتى ماسەلەلەردى قاراپ، انىقتاۋ جانە قايسىسىن ەرەكشە باقىلاۋعا الۋ كەرەكتىگىن ءتۇسىنۋ، — دەدى الەكسەي تسوي.
سانيتارلىق-ەپيدەميولوگيالىق باقىلاۋ دەپارتامەنتى مەن دەنساۋلىق ساقتاۋ باسقارماسىنىڭ باسشىلارى سانيتارلىق-ەپيدەميولوگيالىق جاعداي تۋرالى باياندادى.
پاندەميا باستالعالى اقتوبە وبلىسىندا كوروناۆيرۋس ينفەكتسياسىنىڭ 14 مىڭنان اسا زەرتحانالىق راستالعان جاعدايى تىركەلگەن.
ازىرلەنگەن 24 ينفەكتسيالىق ستاتسيوناردىڭ 18-ءى ىسكە قوسىلعان. 795 كەرەۋەتكە ادام جاتقىزىلعان، ونىڭ115-ءى — رەانيماتسيالىق، 2808 كەرەۋەت رەزەرۆتە تۇر.
بۇگىندە بۇل وڭىردە 37 مەديتسينالىق مەكەمە حالىققا امبۋلاتوريالىق-ەمحانالىق كومەك كورسەتەدى، 173 ءموبيلدى بريگادا جۇمىس جاسايدى.
مەديتسينالىق مەكەمەلەردىڭ ماتەريالدىق-تەحنيكالىق بازاسىن نىعايتاتىن جانە ولاردى دارىلەرمەن قامتاماسىز ەتەتىن بارلىق قاجەتتى شارالار قابىلداندى.
اقتوبە وبلىسىنا 398 575 مولشەك ۆاكتسينا اكەلىنگەن. ەكپەنىڭ ءبىرىنشى كومپونەنتىن 206 271 ادام، ەكىنشى كومپونەنتىن 112 304 تۇرعىن العان.
رەيدتىك تەكسەرۋلەردىڭ ناتيجەسى بويىنشا 47 باقىلاۋ توبى 57 ملن تەڭگەگە 464 ايىپپۇل سالعان.
بۇگىندە وبلىستا بيزنەستىڭ 930 سۋبەكتىسى «Ashyq» قوسىمشاسىن قولدانادى. وقشاۋلاۋ ءتارتىبىن بۇزعان 204 ادام انىقتالىپ، «قىزىل» مارتەبەسى بار بەس اقتوبەلىك اكىمشىلىك جازاعا تارتىلعان.
دەنساۋلىق ساقتاۋ ۆيتسە-ءمينيسترى اجار عينيات وڭىردەگى ىندەتپەن اۋىراتىن ناۋقاستارعا مەديتسينالىق كومەك كورسەتۋدى باقىلاۋدىڭ ناتيجەلەرىن اتادى.
قر دەنساۋلىق ساقتاۋ مينيسترلىگى سانيتارلىق-ەپيدەميالىق باقىلاۋ كوميتەتىنىڭ ءتورايىمى ايجان ەسماعامبەتوۆا كوروناۆيرۋسپەن اۋىرۋ بويىنشا ەپيدەميولوگيالىق جاعدايدىڭ ساراپتاماسىن ۇسىندى.
قر دەنساۋلىق ساقتاۋ مينيسترلىگىنىڭ جۇمىس توبىنىڭ ۇسىنىستارىن ورىنداۋ ماقساتىندا وبلىستىق دەنساۋلىق ساقتاۋ باسقارماسى جانىنان، سونداي-اق، العاشقى مەديتسينالىق-سانيتارلىق كومەك كورسەتۋ ۇيىمدارىندا احۋالدىق ورتالىقتار ۇيىمداستىرىلىپ، م.وسپانوۆ اتىنداعى باتىس قازاقستان مەديتسينا ۋنيۆەرسيتەتىنىڭ پروفەسسور-وقىتۋشىلار قۇرامىن قاتىستىرىپ، ونلاين رەجيمدە ساتىلاي وقىتۋ جۇرگىزىلدى. سونىمەن قاتار كۆي مەن ەكپەگە قاتىستى سۇراقتار بويىنشا كولل-ورتالىق ۇيىمداستىرىلدى.
— ءبىزدىڭ مىندەتىمىز — كوروناۆيرۋسقا قارسى كۇرەستە بۇكىل كۇشتى بىرىكتىرىپ، مەملەكەت باسشىسىنىڭ مەديتسينالىق مەكەمەلەردى جارىقتاندىرۋ، ناۋقاستاردى ەمدەۋ تاكتيكاسىن ەنگىزۋ جانە باسقا دا وزەكتى سۇراقتاردى شەشۋ بويىنشا تاپسىرمالارىن ورىنداۋ، بۇل باعىتتاعى جۇمىستاردى كۇشەيتۋ. ءبىز بارلىق باعىت بويىنشا قولداۋ كورسەتۋگە دايىنبىز،— دەدى دەنساۋلىق ساقتاۋ ءمينيسترى.
وتىرىس سوڭىندا اقتوبە وبلىسى اكىمىنىڭ ورىنباسارى رۋسلان حامباروۆ جۇمىس توبىنىڭ ۇسىنىستارىن ورىنداۋ جانە مەديتسينالىق كومەك كورسەتۋ ساپاسىن جاقسارتۋ بويىنشا بارلىق شارالار قابىلداناتىنىن ايتتى.
— اقتوبەنىڭ دەنساۋلىق ساقتاۋ سالاسىنىڭ الەۋەتى جوعارى. ەڭ باستىسى، جاقسى ماتەريالدىق-تەحنيكالىق بازا، جوعارى بىلىكتى ماماندار بار،— دەپ اتاپ ءوتتى رۋسلان حامباروۆ.
"ادىرنا" ۇلتتىق پورتالى.
