دەنساۋلىق ساقتاۋ ءمينيسترى الەكسەي تسوي پرەزيدەنتكە ەلىمىزدەگى ەپيدەميولوگيالىق جاعداي، ەكپە ەگۋ جۇمىستارىنىڭ بارىسى تۋرالى بايانداپ بەردى. ونىڭ ايتۋىنشا، الەمدە كوروناۆيرۋس ىندەتىنىڭ جاڭا «ليامبدا» شتاممى پايدا بولعان. بۇل ۆيرۋس العاش رەت 2020 جىلعى جەلتوقساندا پەرۋدە تىركەلگەن. بۇگىندە ىندەتتىڭ وسى ءتۇرىن 30 مەملەكەتتە، نەگىزىنەن سولتۇستىك جانە وڭتۇستىك امەريكا مەن ەۋروپا ەلدەرىندە 3 مىڭعا جۋىق ادام جۇقتىرعان دەپ حابارلايدى "ادىرنا" ۇلتتىق پورتالى.
الەكسەي تسوي قاسىم-جومارت توقاەۆقا بىرقاتار وڭىردە كارانتين شارالارىنىڭ كۇشەيتىلگەنى، جۇقپالى اۋرۋلار ستاتسيونارلارى مەن جان ساقتاۋ بولىمدەرىندە ەم قابىلداپ جاتقان ناۋقاستار سانى، ءدارى-دارمەكتەر مەن باسقا دا قاجەتتى جابدىقتار قورى، ۆاكتسينا سالۋ قارقىنى باياۋ وڭىرلەرگە كورسەتىلىپ جاتقان ادىستەمەلىك كومەك جايىندا مالىمەت بەرگەن.
ونىڭ ايتۋىنشا، ماۋسىم ايىنداعى جاعدايمەن سالىستىرعاندا شىلدەنىڭ سوڭعى ەكى اپتاسىندا ىندەت جۇقتىرعانداردىڭ سانى 4,8 ەسەگە كوبەيگەن.
كۇندەلىكتى جۇرگىزىلگەن مونيتورينگ بويىنشا 24 شىلدەدەگى مالىمەتكە سايكەس، جۇقپالى اۋرۋلار بولىمدەرىنىڭ 51 پايىزىندا، جان ساقتاۋ بولىمدەرىنىڭ 41 پايىزىندا ناۋقاستار ەم قابىلداپ جاتىر.
ۆيرۋس جۇقتىرعاندار سانىنىڭ كوبەيۋىنە جانە دەنساۋلىق ساقتاۋ جۇيەسىنە تۇسكەن سالماقتىڭ ارتۋىنا بايلانىستى شىلدە ايىندا قوسىمشا 10 مىڭ توسەك-ورىن ازىرلەندى.
قازىرگى ۋاقىتتا 21,4 مىڭعا جۋىق ورىن رەزەرۆتە تۇر.
"ادىرنا" ۇلتتىق پورتالى.
