سولتۇستىك قازاقستاندا مال قىرىلىپ جاتىر. مورتىق اۋىلىندا كەيىنگى ايدا بىردەن 16 بۇزاۋ ولگەن. جانۋارلار ءولىمىنىڭ سەبەبىن انىقتاۋ مۇمكىن بولماي وتىر، ولەكسەسى دەرەۋ ورتەلگەن، دەپ حابارلايدى «ادىرنا» ۇلتتىق پورتالى ەۋرازيا ءبىرىنشى ارناسىنا سىلتەمە جاساپ.
تەلەارنا مالىمەتىنشە، مال دارىگەرلەرى تالداۋعا قان سىناماسىن الىپ ۇلگەرمەگەن، بىراق مالدىڭ قىرىلۋ سەبەبى ەمفيزەماتوز كاربۋنكۋلى دەگەن بولجام جاساپ وتىر. وڭىردە بۇل اۋرۋ كوپتەن بەرى بايقالماعان. ينفەكتسيا ءبىرىنشى كەزەكتە اعزاسى جەتىلمەگەن جانۋارلارعا قاۋىپتى، ال جاس بولعاندىقتان ەكپە سالۋعا بولمايدى ەكەن. جازدىڭ اپتابى دا تەرىس ىقپالىن تيگىزگەن بولۋى مۇمكىن.
مال اقمولا وبلىسىندا دا قىرىلعان. ازات جانە قارابۇلاق اۋىلدارىندا 500-دەن اسا باس ءىرى قارا اۋىرىپ، ونعا جۋىق مال ولگەن. تەلەارنا جۋرناليستەرىنىڭ ايتۋىنشا، مال دارىگەرلەرى بۇعان تاعى دا اپتاپتى كىنالاپ وتىر. ولاردىڭ پىكىرىنشە، قۇرعاق ءشوپ سيىرلاردىڭ اۋىز قۋىسىن جاراقاتتاپ، سوسىن ول ستوماتيتكە ۇلاسادى. بۇل مالعا اۋىر تيەتىن، ولىمگە اكەپ سوعاتىن اۋرۋ ەكەنى ايتىلادى.
"ادىرنا" ۇلتتىق پورتالى
