اۋىل شارۋاشىلىعىنداعى ءوندىرىس كولەمى 100,9 پايىزدى قۇراعان. بۇل تۋرالى وبلىس اكىمدىگىندەگى ءبىرىنشى جارتىجىلدىق قورىتىندىسى بويىنشا وتكەن جيىندا اۋىل شارۋاشىلىعى باسقارماسىنىڭ باسشىسى امانگەلدى سالامات مالىمدەدى.
«وبلىستىڭ اۋىل شارۋاشىلىعى سالاسىندا وتكەن جىلدىڭ وسى كەزەڭىمەن سالىستىرعاندا ءوسىم بار. اۋىل شارۋاشىلىعى ءوندىرىسى كولەمى 100,9 پايىزدى قۇرادى. ونىڭ ىشىندە، وسىمدىك شارۋاشىلىعى -100 %، مال شارۋاشىلىعى -100,9 %، ەت ءوندىرىسى -101,4%، سيىر ءسۇتى -104,6% قۇراپ وتىر»،-دەدى ا.سالامات.
سونداي-اق، باسقارما باسشىسىنىڭ سوزىنشە، وسى جىلى 180 مارتە جارمەڭكە ۇيىمداستىرىلىپ، ال، كوكونىس باعاسى وتكەن اپتاعا قاراعاندا 15 پايىزعا ارزانداعان. باعا تۇراقتىلىعىنا جەرگىلىكتى ونىمدەردىڭ ءپىسۋى دە وڭ ىقپال ەتۋدە.
ايماق باسشىسى ماحامبەت دوسمۇحامبەتوۆ باعانى تۇراقتى ۇستاپ تۇرۋ ءۇشىن بارلىق ءىس-شارالاردى قابىلداۋ كەرەكتىگىن ايرىقشا ەسكەرتتى. «اتىراۋ» الەۋمەتتىك-كاسىپكەرلىك كورپوراتسياسى ارقىلى بۇل ماقساتتا قوماقتى قارجى ءبولىنىپ كەلە جاتقانى ايتىلدى. كوپتەگەن ازىق-تۇلىك ونىمدەرىنىڭ سىرتتان جەتكىزىلەتىنىنە توقتالعان ول اۋىل شارۋاشىلىعىن دامىتۋعا ەرەكشە كوڭىل ءبولۋ جالعاساتىنىن اتاپ ءوتتى.
سونىمەن قاتار، باسقارما باسشىسى 2021-2025 جىلدارعا ارنالعان كەشەندى دامۋ جوسپارىنا سايكەس، 23 جوبا جۇزەگە اساتىنىن مالىمدەدى. ونىڭ ىشىندە 6 جوبانى بيىل ىسكە قوسۋ جوسپارلانسا، بۇگىنگى تاڭدا 4-ءى جۇمىس جاساۋدا. ولاردىڭ قاتارىندا جىلىجايلار، ءسۇت ءوندىرىسى تسەحى، مال بورداقىلاۋ مەن جاڭبىرلاتىپ سۋارۋ الاڭدارى بار.
ايتالىق، اتىراۋ قالاسىنداعى «يمانباەۆ» جانە «وتباسى» شارۋا قوجالىقتارىنىڭ جىلىجايلارى، جىلىنا 72 توننا ەت وندىرەتىن «اتىراۋ-چيفتليك» مال بورداقىلاۋ الاڭى ىسكە قوسىلىپ، «اسىل اگرو» جانە «جۇماعاليەۆا» شق-نىڭ جاڭبىرلاتىپ سۋارۋ قوندىرعىلارى جۇمىس جاساۋدا.
ال، ماحامبەت اۋدانىنداعى «جۇماعاليەۆ» شارۋا قوجالىعىنا قاراستى جىلىجاي كەشەنىنىڭ قۇرىلىسى جۇرگىزىلۋدە. سونداي-اق، جىلىوي اۋدانىندا ءسۇت ءوندىرۋ تسەحى، اتىراۋ قالاسىنداعى جىلىنا 235 توننا ەت وندىرەتىن «دجۋماگاليەۆا» جك جانە «Jan&Adil» جشس مال بورداقىلاۋ الاڭدارى الداعى ۋاقىتتا حالىق يگىلىگىنە بەرىلمەك.
جيىندا ءوڭىر باسشىسى ماحامبەت دوسمۇحامبەتوۆ باعا تۇراقتىلىعىن باقىلاۋدا ۇستاۋدى باسا تاپسىردى. وعان قوسا، شاعىن جانە ورتا كاسىپكەرلىك سۋبەكتىلەرى وندىرەتىن ونىمدەردىڭ كولەمىن ارتتىرۋدى، اۋىل شارۋاشىلىق جانە كاسىپكەرلىك جوبالارىن جۇزەگە اسىرۋ بويىنشا جۇمىستاردى جەتىلدىرىپ، جاڭا جۇمىس ورىندارىن قۇرۋدى جۇكتەدى. سونداي-اق، ازىق-تۇلىك، جەم-ءشوپ جانە حالىق جاپپاي تۇتىناتىن تاۋارلاردىڭ باعاسىنا تۇراقتى باقىلاۋ جاساپ، مونيتورينگ جۇرگىزۋدى مىندەتتەدى.
