م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا «جۇرەگىمنىڭ يەسى» اتتى پسيحوفيزيكالىق قويىلىمنىڭ پرەمەراسى ءوتتى.
جاس دراماتۋرگ ايدانا الاماننىڭ پەساسى بويىنشا جاس رەجيسسەر اريداش وسپانباەۆا ساحنالاعان قويىلىمدا بويجەتكەندەردىڭ تۇرمىس قۇرۋ ماسەلەسىن العا تارتادى. قۇربى قىزدار داريعا مەن جانسايانىڭ تاعدىرى ارقىلى ءومىر اعىمىنا ىلەسكەن قىز-كەلىنشەكتەردىڭ جاي-كۇيىن سۋرەتتەيدى:
داريعا بويجەتكەن شاعىنان اسىپ كەتسە دە قيالىنداعى ازاماتتى ىزدەۋدەن جالىققان ەمەس. ءۇمىتتى. قايسار. الدىنا ايقىن ماقسات قويعان. بىراق، تاعدىر ءوز دەگەنىن ىستەدەدى ەمەس پە!؟ بىلدەي ءبىر مەكەمەنىڭ باسشىسى بولعانىمەن، ەكىنشى جارتىسىن تابا الماي كەلەدى. جىگىتى جوقتىقتان ەمەس، تالعامىنا ساي بولماۋىنان.
جانسايا جاستىق شاعىندا تۇرمىس قۇرعان بالا-شاعالى كەلىنشەك.
قويىلىمنىڭ ەڭ باستى شارتى كورەرمەندى سەندىرە ءبىلۋ دەسەك، اكتەرلەردىڭ شەبەرلىك دەڭگەيىنە ايتار ءسوز جوق. تەك كەيبىر تۇستاردا عانا بەيادەپتىك كورىنىستەر ورىن الدى. بىراق، ول كورىنىستەر ءار ادامنىڭ سانا دەڭگەيىندەگى قابىلداۋىنا بايلانىستى دۇنيە ەكەنى ايدان انىق. كوكەيگە كەلگەن وسى ساۋال مەن پەسا تۋرالى دراماتۋرگ پەن قويۋشى-رەجيسسەرگە قويعان ەدىك.
اريداش وسپانباەۆا، قويۋشى-رەجيسسەر: –ساحناداعى انايىلىق كورىنىستى چارلين ءچاپليننىڭ قىزىنا (بالەرينا بولعان) جازعان حاتىمەن مىسال ەتەيىن. چاپلين سول حاتىندا «قىزىم، سەن ساحنادا جاساعان دۇنيەڭدى ومىردە كورسەتپە» دەگەن ەكەن. ال بىزدە ءبارى كەرىسىنشە. ومىردە كورسەتەدى بىراق، ساحنادا ىستەي المايدى. ءبىز، ساحنادا وسىنداي كورىنىستەردى قويۋ ارقىلى ومىردە مۇنداي قادامعا بارۋعا بولمايتىنىن ايتقىمىز كەلدى. ءومىر بولعان ءارتۇرلى جاعاي بولادى. بىردە جولىڭ بولمادى ەكەن دەپ، ءۇمىتىڭى ۇزۋگە بولمايدى. قويىلىمنىڭ نەگىزگى ءتۇيىنى وسى جەردە. سونى قاندايدا ءبىر جولمەن جەتكىزدىك دەپ ويلايمىن. ايدانا الامان، دراماتۋرگ: –قازىرگى زامانداعى قىزداردىڭ كوزقاراسى ەكى توپقا بولىنگەن دەپ ويلايمىن. وسى ەكى كەرەعار پىكىردىڭ قاقتىعىسى رەتىندە دراماتۋگيالىق كونفليكت جاساعىم كەلدى. پەسانى 23 جاسىمدا جازدىم. ول كەزدە «كارى قىز» دەگەن اتاۋ ءبىر قاراعاندا قورقىتا بەرمەيتىن. بىراق، مەن سول كەزدەن باستاپ ويلاناتىنمىن. سەبەبى، عىلىم اكادەمياسىندا جۇمىس جاساعانىما بەس جىلداي بولىپ قالدى. وكىنىشكە قاراي سوندا ءجۇرىپ، اينالامىزداعى «وتىرعان» قىزداردى كورىپ، ولاردى ءتۇسىنىپ، ءوزىمنىڭ دە بولاشاققا دەگەن قورقىنىشىمنان تۋعان شىعارما بولدى.
جاسۇلان ناۋرىءزالى
