نان ساتۋشى رىستى اپا: بالالارىمدى الا دوربانىڭ كومەگىمەن اسىرادىم

4577
Adyrna.kz Telegram

ەسىمدى بىلگەلى رىستى اپانىڭ نان ساتۋمەن اينالىساتىنىن كورىپ كەلەمىن. كىشكەنتايىمدا ءۇي اراسى جاقىن بولعان سوڭ ويىن بالالارىمەن ءبارىمىز بارىپ، ىستىق كۇلشەلەرىنە تالاسۋشى ەدىك. رىستى اپا قولىمىزدى قۇر قايتارمايتىن. سوعان ادەتتەنىپ العان بىزدەر دە سول ءۇيدىڭ اينالاسىن تورۋىلداپ كەتپەۋشى ەدىك. سول ۋاقىتتان بەرى تالاي جىلدار ءوتتى. كىشكەنتاي قىزىعۋشىلىقتان باستالعان رىستى اپانىڭ اياداي ەرمەگى، ەڭبەگىنە اينالعانىنا تۋرا 15 جىل تولدى. قازاقتىڭ انالارى قانداي باتىر دەسەڭشى.

ءۇيدىڭ قاۋىرت تىرلىكتەرى، بالا تاربيەسىنە قاراماستان ءۇيدىڭ بەرەكسىن، نان ساتىپ مەرەكەسىن كەلتىرىپ وتىر. ءيا، راسىمەن «نان بار جەردە – ءان بار» دەپ بەكەر ايتىلماسا كەرەك. رىستى اپانىڭ وتباسىندا شۋاقتى كۇندەرى دۋماندى ۇندەرى، قۋانىشتارى ءجيى بولىپ تۇرادى. وسى كۇندەردىڭ بىرىندە رىستى اپادان نان الۋعا بارىپ، جاقىنىراق سىر تارتىپ كورگەن ەدىم. "ادىرنا" ۇلتتىق پورتالىنىڭ كەزەكتى سۇحباتى نان ساتۋشى رىستى حانىممەن بولدى.

- رىستى اپا، كىشكەنتايىمىزدان سانامىزدا «رىستى ىستى، ىستىق نانى ءپىستى» دەگەن جولداردى اندەتىپ ءجۇرۋشى ەدىك. اۋىلىمزدا اۋەلى قاراپايىمدىلعىڭىزبەن، كەيىن ناۋبايحاناڭىبەن تانىمالسىز. بۇل كاسىپتى باستاۋعا نە تۇرتكى بولدى؟

- اۋەلى ۇكىمەتتىڭ جۇمىسىندا بولماعان سوڭ باستادىم. العاشقىدا كۇندەلىكتى تاماققا جەتەتىن اقشا بولسا جەتكىلىكتى دەيتىنمىن. قازىر جۇمىسىم ىلگەرلەپ، ناۋبايحانام بولادى دەپ كىم ويلاعان؟

- ءسىزدىڭ ءتاتتى كۇلشەلى ناندارىڭىزدى جەپ وستىك. ءيىسى مۇرىن جارۋشى ەدى. قازىر ناننىڭ ىستىق ءيىسى ودان ءارى بارلىق اۋىلدى شارلاپ كەتەدى. كۇنىنە قانشا نان پىسىرەسىز؟

- كۇنىنە ناندى 40-50-دەن پىسىرەمىن. كەيدە ءبىر كۇندە ەكى ەسە جۇمىستانىپ تا جۇرەتىن كەزدەر بولادى. بارلىعى تاپسىرىسقا بايلانىستى.

- نانىڭىز بولكە سەكىلدى سونداي ءتاتتى. بۇرىن انامنان «رىستى اپانىڭ نانى نەگە سونداي ۇلپىلدەك اپپاق؟»-, دەپ سۇراعانىم بار ەدى. انام: «كەز كەلگەن تاماقتى اپپاق نيەتپەن پىسىرسەڭ، سولاي اپپاق بوپ شىعادى دەۋشى ەدى». قازىر وسە كەلە ناندى جوعارى سۇرىپتاعى ۇنمەن پىسىرەتىنىڭىزدى تۇسىندىك قوي. ايتىڭىزشى، ازىق-تۇلىك باعاسى قۇبىلعان ۋاقىتتاردا نان باعاسىن كوتەرەسىز بە؟ جانە ءتاتتى ناندارىڭىزدىڭ ءبىز بىلمەيتىن قۇپيا قوسپاسى بار ما؟

- نان باعاسىنا 10 تگ قوسامىن. حالىققا قولجەتىمدى بولۋ ءۇشىن نان باعاسىن قارىشتاتۋدى ءجون كورمەيمىن. تۇراقتى 170تگ-دەن ساتامىن. وسىلايشا كۇنىنە 10 000تگ تابىس تۇسەدى. اۋىلدىق جەر بولعاندىقتان بارلىق قوسپالار- ناعىز تازا، تابيعي ءونىم. ءسۇت، مايدىڭ سۋى، ايران قوسقان كەزدە نان وتە ءدامدى شىعادى. ءارى اشىتقىنى قويعان كەزدە كوڭىل كۇيىڭ، ىشكى سەزىمىڭنىڭ كوتەرىڭكى بولۋى وتە ماڭىزدى.

- جۇمىسىڭىزدان شارشايتىن كەزدەر بولا ما؟ كەيىنگى ۇرپاققا قانداي كەڭەس ايتاسىز؟

- جۇمىسىمنان شارشاعان كەزىم بولعان ەمەس. ناننىڭ ءيىسى مەنىڭ ءىشىمدى عانا ەمەس، كوڭىلىمدى دە تويدىرىپ كەلەدى. ەڭبەك ەتۋگە قولايلى جەر، اياۋلى مەكەن ىزدەپ، شارق ۇرۋدىڭ قاجەتى جوق. باستىسى تازا نيەت پەن شىناي ىنتا بولعانى ءجون. قازىرگى جاستار مۇنداي كاسىپتى ونشا قۇپ كورە بەرمەيدى. الايدا «تەڭگە-تيىننان قۇرالادى» دەگەن ءسوز بار.

كۇن سايىنعى تابىستى جيناپ، كاسىبىڭدى ودان ءارى جانداندىرۋعا ابدەن بولادى. ونىڭ ايقىن دالەلى مىنا ءوزىم ەمەس پە؟

العاش نان پىسىرگەن ۋاقىتتاردا قىس مەزگىلىندە نانداردى ءپىسىرىپ، دورباعا سالىپ، ءۇي-ۇيلەردى ارالاپ ءوزىم اپارۋشى ەدىم. وسىلايشا بالالارىمىزدى الا دوربانىڭ كومەگىمەن اسىرادىق.

مىنە، بارلىعى بىردەن ورىندالىپ كەتپەيدى. ايتكەنمەن تالماي قىزمەت قىلساڭ، تاۋداي جەمىسىن كورەسىڭ.

- اسەرلى اڭگىمە بولدى، رىستى اپا! ءۇيدىڭ ىرىس-نەسىبەسىن كىرگىزەتىن ناندى ساتىپ، اق ادال ەڭبەگىڭىزدىڭ جەمىسىن كورىپ وتىرسىز. بۇل ءىسىڭىز كوپكە ۇلگى. ءىسىڭىز ىلگەرىلەي بەرسىن! ساۋ بولىڭىز!

رىستى اپا جاستىق شاعىمدى تاعى ەسكە ءتۇسىرىپ، ىستىق كۇلشە ناندى قولىما ۇستاتتى. مەن دە ناۋبايحانادان اياڭداي شىعىپ، جالعىز اياق جولعا ءتۇسىپ ۇيگە جول تارتتىم.

ءىنجۋ ومىرزاق،

"ادىرنا" ۇلتتىق پورتالى 

پىكىرلەر