پاۆلوداردا ءبىر جاسار بالا كوروناۆيرۋستان كەيىن جانساقتاۋ بولىمىنە ءتۇستى، دەپ حابارلايدى “ادىرنا” ۇلتتىق پورتالى Sputnik قازاقستان سايتىنا سىلتەمە جاساپ.
وبلىستىق اۋرۋحانانىڭ ينفەكتسيالىق ستاتسيونار ديرەكتورىنىڭ ورىنباسارى زەرە ساداقوۆانىڭ ايتۋىنشا، ونداي اسقىنۋلار سيرەك كەزدەسەدى.
باس كەزىندە بۇلدىرشىندە ارالاس كوروناۆيرۋستىق پنەۆمونيا انىقتالعان. وكپەسىنىڭ 36 پروتسەنتى قابىنىپ كەتكەن.
"ول كەزدە ديناميكاسى جاقسى بولدى. بىراق ەكى كۇننەن كەيىن كوروناۆيرۋس كەزىندە سيرەك كەزدەسەتىن پنەۆمومەدياستينۋمنىڭ (كوكىرەك تۇسىندا اۋانىڭ جينالۋى - Sputnik) سالدارىنان جاعدايى كۇرت ناشارلاپ كەتتى", - دەيدى ساداقوۆا.
قازىرگى كەزدە ءبۇلدىرشىندى وكپەنى جاساندى جەلدەتۋ اپپاراتىنا قوسىپ قويعان. بىراق جاعدايى وتە اۋىر.
ينفەكتسيالىق اۋرۋحانادا 15 جاستاعى بالا دا بار. نەگىزگى اۋرۋى – نەفروزدىق سيندروم. باس كەزىندە استانادا ەمدەلگەن. بىراق ول جاتقان بولىمدە ءبىر ناۋقاستان كوروناۆيرۋس تابىلعاندىقتان، كارانتين جاريالاندى.
تامىزدىڭ باسىندا ول پاۆلودارداعى ينفەكتسيالىق بالالار اۋرۋحاناسىنا ءتۇستى. پتر-تەست وڭ ناتيجە كورسەتتى. سودان بىردەن ستاتسيونارعا جاتقىزىلعان.
"قازىرگى كەزدە ءجاسوسپىرىمنىڭ جاعدايى جاقساردى. ونى نەگىزگى بولىمگە اۋىستىرايىن دەپ جاتىر", - دەيدى ساداقوۆا.
رەسمي مالىمەتكە سايكەس، پاۆلودار وبلىسىندا 144 بالادان كوروناۆيرۋس انىقتالدى. 56 بالا اۋرۋحانادا ەمدەلىپ جاتىر. قالعانى ۇيدە ەم-دوم قابىلداپ ءجۇر.
پاۆلودار وبلىسى "قىزىل" ايماققا كىرەدى. سوڭعى ءبىر تاۋلىكتىڭ ىشىندە 265 ادام ىندەت جۇقتىرعان.
