اقتوبەدە حيدجاب ماسەلەسى كۇننەن كۇنگە ۋشىعىپ بارادى. ەكى جاقتى ءبىر مامىلەگە كەلتىرە الماعان ورامال داۋى اقىرى تەكەتىرەسكە اكەلدى. ورتاق زاڭعا باعىنعىسى كەلمەيتىن دىنشىلدەردىڭ قارسىلىعى ۇدەگەنى سونشا، ءتىپتى، اتا-انالار ۇستازدارمەن توبەلەسۋگە دەيىن بارىپ جاتىر. ءتىپتى كەيبىر نارازىلىق تانىتۋشىلاردىڭ مەكتەپ الدىنا بارىپ، كوپشىلىك كوزىنشە ناماز وقىعانداردى دا ەلدى شوشىتقان ەدى. مۇڭسىز ءارى ءۇنسىز وتىراتىن بيلىك وكىلدەرى حيدجاب ماسەلەسىنە ەندى الاڭداي باستاعان سياقتى. ءتىپتى قازىر وبلىستاعى كەيبىر مەكتەپتەردى پوليتسەيلەر كۇزەتەتىن جاعدايعا جەتتىك.
الەۋمەتتىك جەلىگە لەزدە تاراعان مىنا بەينەجازبا اقتوبە قالاسىنداعى مەكتەپتەردىڭ بىرىندە بۇگىن تاڭەرتەڭ بولعان جاعداي. باسىنداعى ورامالى ءۇشىن مەكتەپكە كىرگىزىلمەگەن وقۋشىنىڭ اتا-اناسى ءوز بالاسىنا ءبىلىم بەرەتىن ۇستازعا كۇش كورسەتىپ جاتىر.
ەلەنا ساقاتوۆا، تۇرعىن:
— ول ءبىزدىڭ شاريعاتتان كەلگەن، قۇراندا جازىلعان باليعاتقا تولعان قىزدارىڭدى كيدىرىڭدەر، ورىنداڭدار دەگەن. ول ول كەزدە ليتسەمەرستۆو بولادى. بىرەسە تاعادى، بىرەسە تاقپايدى. ۋجە بالانىڭ دا تاربيەسى بۇزىلادى عوي.
ال مىناۋ تۇسكى اۋىسىمداعى باسقا مەكتەپتەگى جاعداي. بۇل مەكتەپ تە ورامالمەن كەلگەن وقۋشىلاردى ىشكە كىرگىزبەي كەرى قايتارىپ جاتىر. وقۋشىلاردىڭ ايتۋىنشا، ءۇشىنشى توقسان باستالعالى، ياعني قاڭتاردىڭ 8-نەن بەرى ساباققا قاتىسپاعان. ال مەكتەپ باسشىلىعى بولسا، تالاپ پەن ءتارتىپ بارلىق وقۋشىعا بىردەي دەيدى. ايتۋىنشا، مەكتەپكە ورامال تاعىپ كەلەتىن 19 وقۋشىنىڭ ازىرگە ەشقايسىسىنىڭ اتا-اناسى مەكتەپتىڭ بىرىڭعاي كيىم فورماسىنا باعىنعىلارى كەلمەگەن.
ساۋلە بايماعانبەتوۆا، اقتوبە قالاسى №31 قازاق ورتا مەكتەبىنىڭ ديرەكتورى:
— قازىرگى تاڭدا ءبىز ەسىكتى اشىپ قويىپ وتىرمىز. وقۋشىلاردى كىرگىزۋگە رۇقسات. بىراق مەكتەپ فورماسى بويىنشا ورامالدارىن شەشىپ كەلۋ كەرەك. بۇنى اتا-انالار ورىنداعىسى كەلمەيدى. بىراق زاڭ جۇزىندە ءبارى جازىلعان. ءبىز تەك تالاپتى ورىنداپ وتىرعاندارمىز.
31 ارنانىڭ "ينفوربيۋرو" باعدارلاماسى
